Haldið var upp á 75 ára afmæli Sjálfstæðisflokksins með glæsibrag og um 1000 manna veislu á hótel Nordica. Var hressandi að taka þátt í svo góðri hátíð og verða var við mikinn og einlægan stuðning við Davíð Oddsson meðal veislugesta.

Greidd voru atkvæði um fjölmiðlafrumvarpið klukkan 13.30 og varð það að lögum. Um kvöldið voru eldhúsdagsumræður á alþingi.

Ég sneri aftur frá London og lenti í Keflavík klukkan 15.00, á meðan ég var erlendis gerðist ekki annað á þingi en að stjórnarandstæðingar héldu áfram að tala um fjölmiðlafrumvarpið við 3. umræðu.

Við Rut flugum til London klukkan 07.45 til að dveljast hjá Sigríði Sól, dóttur okkar, Heiðari Má, manni hennar, og sonum þeirra Orra og Bjarka.

Fórum klukkan 20.00 í Gerðarsafn, þar sem opnuð var sýning á íslenskum málverkum í eigu manna í Danmörku, en til sýningarinnar var stofnað að frumvæði Klaus Ottos Kappels, fyrrverandi sendiherra Dana á Íslandi.

Annarri umræðu um fjölmiðlafrumvarpið lauk á alþingi með atkvæðagreiðslu rétt fyrir klukkan 19.00. Ég flutti tvær ræður í umræðunni þennan dag.

Vorum við setningu listahátíðar í Listasafni Íslands klukkan 17.45.

Fór á traktornum og fékk rabbabara hjá nágranna mínum til að setja í garðinn. Sló umhverfis húsið, en það hef ég ekki áður gert svona snemma. Vnur minn frá Kanada leit í heimsókn og fórum við í klukktíma gönguferð. Vélarnar mínar fóru allar í gang að lokum með aðstoð góðs granna og síðan var unnt að grilla kvöldmatinn í sólarblíðu. 

Ríkisstjórnin kom saman að venju klukkan 09.30. Hélt undir kvöldmat austur í Fljótshlíð og tók til við að búa mig undir vor- og sumarverkin í sveitinni.

Lenti klukkan 06.40 við heimkomu frá Baltimore.

Fór á borgarstjórnarfund klukkan 14.00.

Fundur með fulltrúum þjóðaröryggisráðs Bandríkjaforseta og John Ashcroft dómsmálaráðherra. Farið heim um kvöldið frá Baltimore.

Fundir í bandaríska heimavarnarráðuneytinu, varnarmálaráðuneytinu og hjá FBI.

Fundir í Washington með yfirmanni strandgæslunnar, Henry J. Hyde, formanni utanríkismálanefndar fulltrúadeilar þingsins, og í utanríkisráðuneytinu.

Fór klukkan 16.40 frá Keflavík til Baltimore og þaðan til Washington.

Fór rúmlega 17.00 í Ráðhúsið,  þar sem borgarstjóri hélt þeim sið að bjóða þeim Reykvíkingum, sem verða 70 ára á árinu,  til móttöku.