Uppreisn gegn Kristrúnu
Ætla má að opið bréf vegna brottvísunarmiðstöðvar hefði aldrei verið sent stæði Kristrún með pálmann í höndunum eftir byggðakosningarnar. Það gerði hún ekki og glorían hvarf.
Hópur fólks innan Samfylkingarinnar og óflokksbundið jafnaðarfólk rís gegn forystu Samfylkingarinnar og þingflokki í dag (11. júní). Í opnu bréfi á vefsíðunni Vísi segir hópurinn að með stuðningi við frumvarp dómsmálaráðherra Viðreisnar hafi Samfylkingin tekið „krappa hægri beygju“.
Ákvörðunin um þetta hafi „ekki verið rædd á vettvangi flokksins“. Hún er að mati hópsins „í andstöðu við meginstefnu hans og grundvallarsjónarmið“.
Telur hópurinn „rétt að doka við og íhuga pólitíska vegferð sem [sé] í andstöðu við sjónarmið mannréttindasamtaka, sjónarmið mannúðar og mildi “ Er það talið sérstaklega ámælisvert að halda þessari vegferð áfram þar sem þingmenn Sjálfstæðisflokksins hrósi Samfylkingunni fyrir „sinnaskiptin“!
Með opna bréfinu segist hópurinn mótmæla þessari lagasetningu um brottvísunarbúðir. Þá krefst hann þess að „framkvæmd laganna verði stöðvuð þar til tryggt hefur verið að börn verði ekki frelsissvipt vegna stöðu foreldra“.
Jafnframt krefst hópurinn þess „að Samfylkingin taki málið til formlegrar umræðu á vettvangi flokksins og endurskoði afstöðu sína í samræmi við samþykkta stefnu flokksins um mannúð, réttaröryggi og mannhelgi umsækjenda um alþjóðlega vernd“.
Vísir segir frétt af opna bréfinu.
Þetta er alvarlegasta opinbera uppreisn innan Samfylkingarinnar gegn stjórnarháttum Kristrúnar Frostadóttur síðan hún var „krýnd“ flokksformaður árið 2022.
Þegar Kristrún orðaði það í hlaðvarpsviðtali 10. febrúar 2024 að hún teldi að Samfylkingin ætti að breyta um stefnu í útlendingamálum fór kviða- og hræðsluþytur um Samfylkinguna. Öll andmæli voru þó kæfð í fæðingu og bent á að sigurganga Kristrúnar í flokknum benti til þess að hún myndi leiða sig og flokkinn til vegs og virðingar. Það ætti alls ekki að leggja stein í götu hennar vegna ummæla um útlendingamál.
Kristrún kom vel frá þingkosningum 30. nóvember 2024 og myndaði svo ríkisstjórn sína 21. desember 2024. Síðan hefur margt snúist á verri veg og stjórninni hafa verið mislagðar hendur.
Úrslit byggðakosninganna 16. maí 2026 voru verulegt áfall fyrir Kristrúnu og liðsmenn hennar. Það má best ráða af niðurstöðunum þar sem Kristrún var áberandi þátttakandi í kosningabaráttunni.
Ætla má að opið bréf vegna brottvísunarmiðstöðvar hefði aldrei verið sent stæði Kristrún með pálmann í höndunum eftir byggðakosningarnar. Það gerði hún ekki og glorían hvarf. Við blasir gamalkunnur klofningur á vinstri kantinum. Enginn tekur lengur tillit til flokksfyrirmælanna sem banna opinbera gagnrýni samfylkingarfólks á Kristrúnu.
Einkenni stjórnarhátta Kristrúnar er að hún leitar í skjól þagnar og fjarveru þegar að henni, starfsháttum hennar og stefnu er sótt. Hún vill einnig geta leikið tveimur skjöldum eins og í ESB-málinu þar sem hún vill opna leið til aðildar en segist jafnframt ætla að loka henni, sýnist henni svo.
Nú er spurning hvort Kristrún svari opna bréfinu eða sýni bréfriturum fjandsamlega óvirðingu með þögninni.