Liðsmenn Hamas á Íslandi
Það eykur enn á dapurleg örlög Palestínumanna að eiga svo ömurlega talsmenn í lýðfrjálsum löndum þar sem auðvelt er að sannreyna blekkingariðjuna og falsið.
Þeir sem hér ganga fram fyrir skjöldu til að bera blak af hryllingsverkum hryðjuverkamanna Hamas í byggðum Ísraela nálægt Gaza-svæðinu fyrir tæpri viku ættu að skýra hvers vegna engir nema harðstjórarnir í Íran fagna blóðbaðinu. Hvað veldur því að arabar hvarvetna í Mið-Austurlöndum rísa ekki til átaka við Ísraela og til stuðnings Hamas? Hvers vegna harðlæsa Egyptar landamærum sínum við Gaza?
Vinstrisinnar víða um lönd efna til mótmæla til stuðnings Hamas og hryðjuverkum þeirra og hér er fjöldamorðunum fagnað af þeim sem telja sig tala í nafni Palestínumanna.
Heimastjórn Palestínumanna (e. Palistine Authority, PA) á Vesturbakka Jórdanár fer sér hins vegar hægt í stuðningi sínum við Hamas. Meira að segja hatursmennir í Hezbollah sem halda úti eigin ríki og her við norðurlandamæri Ísraels sýna Hamas aðeins stuðning til málamynda.
Þeir sem taka gagnrýnislaust upp hanskann fyrir morðsveitir Hamas og segjast gera það í nafni Palestínumanna fara einfaldlega með rangt mál. Ágreiningurinn meðal Palestínumanna blasir við öllum sem vilja kynna sér hann.
Heimastjórnarmennirnir á Vesturbankanum hafa skömm á Hamas. Þar ræður Fatah-flokkurinn sem er afhelgaður stjórnmálaflokkur en Hamas er íslömsk öfgahreyfing súnni-múslima sem nýtur stuðnings sjíta-öfgamannanna í Íran vegna þess að báðar öfgahreyfingarnar hafa á stefnuskrá sinni að gjöreyða Ísrael og reka þá Ísraela sem þeim tekst ekki að drepa á haf út.
Heimastjórnarmennirnir og Hamas eru einnig keppinautar um völd. Á Vesturbakkanum hafa Palestínumenn ekki þorað að efna til kosninga af ótta við að íslamistar nái þá undirtökunum eins og Hamas tókst á Gaza árið 2007 þegar þeir hröktu heimastjórnarmenn þaðan.
Vesturbakkamenn líta grimmdarstefnu Hamas illu auga og þeim er ekki í mun að auka ítök Írana í samfélagi sínu. Súnnítar í Sádi-Arabíu leggja stjórnendum Vesturbakkans til fjárstuðning. Vesturbakkamenn hafa í áranna rás farið hörðum orðum gegn spillingar- og ofríkisstjórn Hamas á Gaza.
Egyptar líta þannig á að opni þeir landamæri sín gagnvart Gaza kalli þeir yfir sig hættu vegna stefnu Hamas sem eigi rætur í hugmyndafræði Bræðralags múslíma sem var gert útlægt í Egyptalandi árið 2013.
Allt þetta sýnir að unnt er að styðja málstað Palestínumanna án þess að fagna morðæði vígamanna Hamas. Vafalaust má afsaka einhverja sem taka upp hanskann fyrir Hamas með vísan til þess að þeir viti ekki betur, þeir haldi að með fagnaðarlátum sínum séu þeir að leggja öllum Palestínumönnum lið.
Afsökun vegna fávisku getur hins vegar ekki átt við um þá forystumenn fyrir málstað Palestínumanna hér á landi sem nú ganga fram fyrir skjöldu og lýsa stuðningi við illvirkjana. Þeir hljóta að vita betur. Hatrið á gyðingum og Ísrael sviptir þá hins vegar allri dómgreind.
Það eykur enn á dapurleg örlög Palestínumanna að eiga svo ömurlega talsmenn í lýðfrjálsum löndum þar sem auðvelt er að sannreyna blekkingariðjuna og falsið.