Hátíðarsalnum lokað
Ástæðan er líklega einfaldlega sú að þeir Baudenbacher og Ólafur Ragnar hafa báðir lýst afdráttarlausum og vel rökstuddum skoðunum sem ganga gegn viðhorfum þeirra sem vilja að Ísland gangi í ESB.
Það er forvitnilegt að kanna af hverju rektor Háskóla Íslands ákvað að úthýsa fundi sem boðaður hafði verið í dag (10. ágúst) í hátíðarsal skólans.
Um er að ræða fyrirlestur dr. Carls Baudenbacher, fyrrverandi forseta EFTA-dómstólsins, á vegum Rannsóknarseturs í stjórnmálum og efnahagsmálum. Baudenbacher er viðurkenndur sérfræðingur Evrópu á sviði EES- og Evrópuréttar. Dr. Ólafur Ragnar Grímsson, fyrrverandi forseti Íslands, verður fundarstjóri. Hann var á sínum tíma prófessor við Háskóla Íslands.
Fundurinn verður í Sjálfstæðissalnum við Austurvöll í dag klukkan hálffimm. Eins og áður sagði ákvað Silja Bára Ómarsdóttir rektor að rifta bókun hátíðarsalar skólans vegna þessa fundar. Skipuleggjendur hans, tveir fyrrverandi prófessorar, mótmæltu ákvörðun rektors í opnu bréfi á laugardaginn 8. ágúst. Sögðu þeir hana vega að akademísku frelsi og að salurinn hefði verið bókaður undir formerkjum Rannsóknarseturs í stjórnmálum og efnahagsmálum.
Silja Bára hafnar þessari gagnrýni í samtali við mbl.is sunnudaginn 9. ágúst og segir að það hafi verið hvernig fundurinn var auglýstur sem gaf vísbendingu um að salurinn hefði verið bókaður undir fölsku flaggi. „Auglýsingarnar hafa verið þannig að Áfram Ísland standi fyrir þessu.“ Vísaði hún til þeirra reglna sem gilda um hátíðarsalinn, eingöngu megi leigja hann út fyrir viðburði sem séu á vegum háskólans eða tengist starfsemi hans beint.
Í ljósi þess hvernig aflað er styrktaraðila og fjárhagslegs stuðnings við alls kyns málefni eða staðið er að kostun, til dæmis við miðlun íþróttaviðburða í ríkissjónvarpinu, er ekki beinlínis trúverðugt að nafn kostunaraðila auglýsingar um fund fræðimanna í hátíðarsal Háskóla Íslands kalli á þessa lokun salarins.
Ástæðan er líklega einfaldlega sú að þeir Baudenbacher og Ólafur Ragnar hafa báðir lýst afdráttarlausum og vel rökstuddum skoðunum sem ganga gegn viðhorfum þeirra sem vilja að Ísland gangi í ESB.
Einn úr hópi fyrrverandi prófessora skólans, Þorvaldur Gylfason, sagði á Facebook-síðu sinni laugardaginn 8. ágúst: „Nánast allir vinir mínir hér á Fb úr hópi háskólakennara segjast ætla að segja JÁ 29. ágúst.“
Ummæli Þorvalds sýna pólitískt andrúmsloft sem ríkir meðal margra háskólamanna. Við þær aðstæður hlýtur ákvörðun rektors um að loka hátíðarsalnum fyrir fundi tveggja þekktra gagnrýnenda ESB-aðildar að vekja spurningar um annað og meira en framkvæmd reglna um salarleigu.
Þegar rektor grípur til þess ráðs að rifta bókun hátíðarsalar vegna þess hvernig fundur er auglýstur, þótt þar eigi að flytja fræðilegt erindi sérfræðings sem var forseti EFTA-dómstólsins um árabil, vaknar óhjákvæmilega spurning: Hefði sama mælistika verið lögð á fund fræðimanna sem mæltu fyrir ESB-aðild?
Það er spurning sem Háskóli Íslands ætti að svara. Háskóli verndar ekki virðingu sína með því að loka dyrum fyrir umdeildum sjónarmiðum heldur með því að tryggja að þau fái að heyrast og sæti gagnrýni. Frjálst orð innan veggja háskóla er ekki vandamál heldur forsenda þess að stofnunin rísi undir nafni.