Feluleikur Samfylkingarinnar
Það bendir margt til þess að í aðdraganda 29. ágúst ætli Samfylkingin að stunda sama feluleikinn og hún hefur leikið árum saman í ráðhúsinu.
Fréttirnar um hve skipulega var unnið að því af borgarstjórum Samfylkingarinnar að stinga undir stól álitum borgarlögmanns vegna ráðstafana á lóðum á lykilstöðum í borginni vekja í senn óhug og undrun.
Undrunin er yfir ósvífninni sem felst í slíkri stjórnsýslu því að með undanskotinu var leitast við að fegra ákvarðanir borgarstjórans sem átti að vita betur þótt honum kunni að hafa verið talin trú um það af einhverjum ráðgjöfum sínum að álit borgarlögmanns skipti engu.
Óhug vegna þess að stjórnarhættirnir virðast hafa mótast af pólitísku viðhorfi innan Samfylkingarinnar sem leiðir núna ríkisstjórn þar sem markvisst er neitað að upplýsa um einstök málefni eða skýra hvað fyrir stjórnvöldum vakir.
Kristrún Frostadóttir, formaður Samfylkingarinnar og forsætisráðherra, mun ef til vill lýsa skömm á þessum stjórnarháttum og segja að vitneskjan um þá hafi einmitt ráðið þegar hún sagði að kjósendur gætu strikað yfir nafn Dags B. Eggertssonar, fyrrverandi borgarstjóra, í þingkosningunum 30. nóv. 2024.
Slík afsökun dugar þó skammt því að Kristrún hefur gert Dag B. að helsta talsmanni flokks síns í ESB- og NATO-málum. Þau mál ber hátt og ESB-málið getur auðveldlega orðið banabiti ríkisstjórnar Kristrúnar og þar með formennsku hennar í flokknum.
Eins og laumuspilið með álit borgarlögmanns afhjúpar sýnir Dagur B. aldrei á öll spilin, það er falið sem honum er óþægilegt, hinu er gjarnan hampað umfram efni. Keppni um völd innan Samfylkingarinnar er háð á þessum grunni.
Þeir sem utan Samfylkingarinnar eru verða að reyna að greina hvert flokkurinn leiðir landstjórnina undir tvískiptri forystu þeirra Kristrúnar og Dags B. Það kraumar reiði innan flokksins vegna þess hve illa var haldið á málum hans og málstað í byggðakosningunum þar sem hann fékk hörmulega útreið og náði hvergi settu markmiði sem áréttað var með beinni þátttöku Kristrúnar í kosningabaráttunni.
Nú er tekist á um það innan Samfylkingarinnar hvernig kosningabaráttunni skuli háttað fyrir þjóðaratkvæðagreiðsluna 29. ágúst. Megi taka mark á yfirlýsingum Kristrúnar fyrir kosningarnar í nóvember 2024 og á þjóðhátíðardaginn 2025 lét hún undan Degi B. og Þorgerði Katrínu Gunnarsdóttur utanríkisráðherra þegar ákveðið var að ganga til atkvæða um aðildina nú í ágúst í stað þess að miða við árslok 2027 eins og forsætisráðherra vildi.
Það bendir margt til þess að í aðdraganda 29. ágúst ætli Samfylkingin að stunda sama feluleikinn og hún hefur leikið árum saman í ráðhúsinu. Það eigi ekki að segja þjóðinni annað en talið er henta hverju sinni og alls ekki að leggja öll spilin á borðið.
Á þann hátt telur flokksforystan að hún geti best falið ágreininginn á æðstu stöðum og einnig komist hjá því að kynna nokkur samningsmarkmið. Þetta muni örugglega reddast.
Í Reykjavík snerist þetta um lóðir sem voru gefnar. Gagnvart ESB snýst þetta um Ísland sem Kristrún ætlar að selja fokdýrt þótt Dagur B. vilji líka gefa það eins og lóðirnar.