Bandero undir lögreglustjórn
Áreiti af hálfu þeirra sem segjast stunda dýravernd með lögbrotum hefur verið mjög áberandi hér undanfarnar vikur bæði á sjó og á landi.
Sérsveit ríkislögreglustjóra og séraðgerðasveit landhelgisgæslunnar (LHG) tóku stjórn Badero, skips samtaka sem kennd eru við Paul Watson, í sínar hendur aðfaranótt 31. júlí.
Bandero hefur verið úti fyrir Faxaflóa og Vesturlandi í sumar til að hindra veiðar tveggja hvalveiðiskipa sem stunda lögmætar veiðar á þessum slóðum. Á sjötta tímanum 30. júlí fékk stjórnstöð LHG tilkynningu um að Bandero hefði siglt inn fyrir 12 sjómílna landhelgi Íslands og stefndi í átt að hvalveiðiskipinu Hval 9. Áhöfnin á Hval 9 tilkynnti gæslunni að skipi sínu hefði verið ógnað og óskaði eftir aðstoð.
Skipstjóra Bandero voru gefin fyrirmæli af stjórnstöð LHG sem hann hlýddi ekki.
Þyrla LHG sem var við eftirlit fór á vettvang og gaf áhöfn Bandero fyrirmæli um að yfirgefa landhelgina. Varðskipið Freyja var sent að Bandero. Skömmu síðar var skipstjóra Bandero fyrirskipað að stöðva vélar skipsins. Skipstjórinn hlýddi engum fyrirmælum starfsmanna LHG.
Þyrlusveit LHG var kölluð út til að flytja sérsveit ríkislögreglustjóra um borð í varðskipið Freyju og séraðgerðasveit LHG hélt á vettvang á aðgerðabátum. Á tólfta tímanum 30. júlí fóru sérsveitarmenn frá ríkislögreglustjóra og séraðgerðasveit LHG um borð í Bandero, handtóku skipstjórann og tóku stjórn skipsins í sínar hendur. Freyja fylgdi Bandero og komu skipin til Sundahafnar í Reykjavík á níunda tímanum að morgni 31. júlí.
Varðskipið Freyja og Bandero úti fyrir Sundahöfn 31. júlí 2026 (mynd: mbl.is/Anton Brink).
Þessi frásögn er reist á lýsingu í Morgunblaðinu 31. júlí á atviki sem ætti að beina athygli stjórnmálamanna og annarra að nauðsyn þess að efla þær löggæslusveitir sem hér eru nefndar og standa í framlínunni þegar gæta skal öryggis lands og þjóðar.
Fjárveitingar til þessara sveita og alls annars sem varðar öryggi þjóðarinnar eiga að vera gagnsæjar. Utanríkisráðuneytið heldur því leyndu bæði fyrir fjárlaganefnd og fjölmiðlum hvernig ríkisstjórnin ráðstafar þeim 50 milljörðum króna sem forsætisráðherra segir að varið sé til að fullnægja loforði sem hún og utanríkisráðherra gáfu á ríkisoddvitafundi NATO í Haag sumarið 2025.
Áreiti af hálfu þeirra sem segjast stunda dýravernd með lögbrotum hefur verið mjög áberandi hér undanfarnar vikur bæði á sjó og á landi. Þeir sem stunda þessa tegund af dýravernd telja málstað sinn réttlæta skemmdarverk í skjóli nætur, tjón á eignum og röskun á rekstri fyrir utan langvarandi áhrif á mannlífið og ótta meðal þeirra sem stunda búrekstur.
Þegar hætta skapaðist á hafi úti stóð ekki á skjótum viðbrögðum starfsmanna landhelgisgæslu og lögreglu. Vafstrið við að finna þá sem fara um og stunda lögbrot undir yfirskini dýraverndar á landi er stórundarlegt. Hvað veldur? Ummæli þeirra sem starfa innan regluverks matvæla- og dýraeftirlits eru oft næsta torskilin hvort sem athygli beinist að hvölum eða öðrum dýrum. Að réttlæta skemmdar- og ógnarverk í þágu dýraverndar stenst ekki. Þá sem ganga fram með ofbeldi ber að stöðva eins og gert var í nótt á hafi úti. Á sambærilegan hátt ber að taka á þeim sem brjóta lög í nafni dýra á landi.