Davíð og EES
Á tímum sem þessum er ómetanlegt að eiga greiðan aðgang að mörgum upplýsingaveitum og nú er unnt að fela vitvélum að leita í gagnagrunnum og draga allt saman sem menn hafa sagt og er tiltækt í netheimum.
Neðst til hægri hér á síðunni er tengillinn Pistlar sem ég hætti að skrifa árið 2016 þegar ég lengdi dagbókarfærslur mínar. Þarna er margvíslegan fróðleik að finna um stjórnmál og það sem á daga mína hefur drifið. Laugardaginn 24. janúar 2004 segi ég meðal annars frá því að þá um morguninn kl. 11.00 hafi ég setið spjallfund með Davíð Oddssyni, formanni Sjálfstæðisflokksins og forsætisráðherra, í Valhöll.
Davíð Oddsson
Hafsteinn Þór Hauksson, formaður SUS, stjórnaði umræðum. Að lokinni um 20 mínútna ræðu Davíðs svaraði hann fyrirspurnum, sem snerust um útflöggun skipa, skattamál, varnarmál, Evrópumál, heilbrigðismál, borgarmál og pólitíska framtíð Davíðs sjálfs. Á vefsíðu minni segir meðal annars:
„Davíð minnti á, að það hefði í raun verið einstakt happ á árunum 1989 til 1993, að sú glufa opnaðist gagnvart Evrópusambandinu að unnt var að gera við það samning eins og EES-samninginn. Eftir að hann tók við formennsku í flokknum hefði verið horfið frá þeirri stefnu hans að gera tvíhliða samning við Evrópusambandið og sjálfstæðismenn hefðu á alþingi haft forystu um gerð EES-samningsins og rutt honum þar braut. Hefði það verið mikið gæfuspor og samningurinn reynst okkur vel, sambærilegur samningur við Evrópusambandið hefði ekki síðan staðið neinum þjóðum til boða. Þær hefðu annað hvort orðið að gerast aðilar að sambandinu eða standa alfarið utan samrunaþróunarinnar í Evrópu. Af samtölum sínum við ýmsa evrópska stjórnmálamenn væri sér ljóst, að þeir hefðu gjarnan viljað fá það tækifæri, sem Íslendingar nýttu sér með gerð EES-samningsins.
(Hér verð ég enn innan sviga að lýsa undrun minni á þeim sjónarmiðum, sem gægjast fram í greinum ýmissa vinstrisinnaðra andstæðinga Davíðs, að hann eigi það sérstaklega Jóni Baldvini Hannibalssyni, þáverandi utanríkisráðherra, að þakka, að Ísland varð aðili að EES. Ég var á þessum tíma formaður utanríkismálanefndar alþingis og fylgdist náið með framvindu mála og hafði stundum á orði, að mál tengd samningsgerðinni næðust fram á þingi, þrátt fyrir framgöngu Jóns Baldvins við afgreiðslu þeirra, að sjálfsögðu voru það við sjálfstæðismenn, sem lögðum til þann atkvæðafjölda á þingi, sem dugði til að koma þessum samningi í höfn. Eftir á vilja ýmsir þá Lilju kveðið hafa, meðal annars sagði Ingibjörg Sólrún einhvern tíma, að hún hefði haft sömu afstöðu til EES-samningsins og ég, hún sat þó hjá, þegar ég og aðrir greiddu atkvæði með samningnum!)“
Á tímum sem þessum er ómetanlegt að eiga greiðan aðgang að mörgum upplýsingaveitum og nú er unnt að fela vitvélum að leita í gagnagrunnum og draga allt saman sem menn hafa sagt og er tiltækt í netheimum. Þetta leiðir ekki til þess að allar skoðanir falli í sama farveg en ætti þó að minnka hættuna á að rangar eða villandi fullyrðingar standi án þess að andmælum sé hreyft þótt gömul séu.