VG gagnrýnir Katrínu
Þessi tilvitnaða setning verður ekki skilin á annan veg en sem sneið til Katrínar Jakobsdóttur. Hitt lýsir hins vegar furðulegheitunum í þessum málflutningi VG að það að kalla mannvirki „lykilinnviði“ geri þá og Ísland að skotmarki.
Utanríkismálanefnd alþingis fjallar nú um tillögu utanríkisráðherra um varnar- og öryggismál. Grunnsjónarmið tillögunnar eru góð en útfærslan veik.
Það kemur í ljós hvað þingmenn í nefndinni segja um tillöguna þegar þeir gefa álti sitt á henni. Líklegt er að breið samstaða sé um meginstef tillögunnar. Enginn þingflokkanna er andvígur aðildinni að NATO eða varnarsamningnum við Bandaríkin. Sérstöðuflokkarnir í öryggis- og varnarmálum Píratar og VG hafa ekki átt neina þingmenn eftir kosningarnar sem fóru fram fyrir ári.
Hér var oft haft á orði í tíð Katrínar Jakobsdóttur sem forsætisráðherra hve eindregin hún væri í afstöðu sinni til öryggis- og varnarmála miðað við skjölin sem hún ritaði undir og samþykkti á norrænum vettvangi og innan NATO.
Þá vakti einnig athygli að VG ályktaði alls ekkert eða mjög óljóst um þessi mál á meðan Katrín réð þar innan dyra. Sjálf sagði hún ávallt að sér væri skylt að fylgja þjóðaröryggisstefnunni sem samþykkt var á alþingi 13. apríl 2016.
VG sendi nú inn umsögn um tillögu utanríkisráðherra um varnar- og öryggismál. Í lok umsagnarinnar segir að tillagan sé „fráhvarf frá friðarstefnu Íslands“ án þess að skilgreina það frekar. Við gerð þjóðaröryggisstefnunnar var gerð málamiðlun við VG um það sem flokkurinn kallar „friðlýsingu“, sé rétt skilið snýr orðið helst að kjarnorkuvopnum á íslensku yfirráðasvæði. Ekkert í núverandi tillögu breytir þeirri stefnu að kjarnavopn verði ekki hér án samþykkis ríkisstjórnarinnar.
Þegar VG var í ríkisstjórn 18. apríl 2023 var heimilað að þjóna kjarnorkuknúna bandaríska kafbáta í íslenskri lögsögu.
Katrín Jakobsdóttir forsætisráðherra sagði þjónustuna við þá samræmast skuldbindingum Íslands innan NATO þar sem eftirlit með kafbátum hefði farið fram á Íslandi. Hún undirstrikaði að kafbátar sem kæmu í íslenska lögsögu yrðu ekki búnir kjarnorkuvopnum í samræmi við þjóðaröryggisstefnu Íslands.
Miklar framkvæmdir fóru fram á öryggissvæðinu á Keflavíkurflugvelli þegar VG sat í ríkisstjórn og unnið var að undirbúningu á stækkun Helguvíkurhafnar sem nú hefur verið tímasett. Í umsögn VG um tillöguna um varnar- og öryggismál núna segir að ríkisstjórnin viðurkenni „að varnarmannvirki, hafnir og flugvellir verði „lykilinnviðir“ í aðdraganda átaka og eftir að átök hefjast“. Í reynd sé „þar verið að segja að Ísland verði skotmark“ í átökum. Þá segir „Það hefur lengi verið vitað og á það bent af friðarhreyfingunni og ábyrgir leiðtogar ættu að leitast við að draga úr slíkri hættu, ekki að auka á hana.“
Þessi tilvitnaða setning verður ekki skilin á annan veg en sem sneið til Katrínar Jakobsdóttur. Hitt lýsir hins vegar furðulegheitunum í þessum málflutningi VG að það að kalla mannvirki „lykilinnviði“ geri þá og Ísland að skotmarki.
Loftárásir Rússa á leikskóla, sjúkrahús, íbúðahverfi og veitukerfi í Úkraínu sýna fáránleika þess að telja að skilgreing stjórnvalda á innviðum ráði hvort á þá sé ráðist af stríðsóðum einræðisherra. Hann eirir engu og fer sínu fram svo lengi sem hann mætir ekki ofurefli. Einmitt þess vegna óttast hann NATO og gerir allt sem í hans valdi er til að grafa undan stuðningi almennings við bandalagið og stuðla að óeiningu innan þess. VG sýnir nú á sér Rússa-hlið í nafni friðar!