Svanasöngur Heimssýnar
Heimssýn gengur þarna erinda afturhaldsaflanna sem berjast gegn virkjun endurnýjanlegra orkugjafa og beitir til þess lygi um dulinn tilgang bókunar 35. Það er dapurlegt að Heimssýn verði eigin dellukenningum að bráð.
Á sínum tíma þjónuðu samtökin Heimssýn verðugu hlutverki sem sameiginlegur vettvangur manna úr öllum flokkum sem töldu óskynsamlegt að Ísland gengi í Evrópusambandið. Þá voru þar í forystu menn sem voru vandir að virðingu sinni þegar þeir reifuðu sjónarmið sín opinberlega. Þeim var annt um að halda sig við staðreyndir og elta ekki villuljós.
Nú er Heimssýn svipur hjá sjón. Í sjálfu sér varð upphaflegt hlutverk samtakanna að engu í tíð ríkisstjórnar Jóhönnu Sigurðardóttur (2009-2013) þegar Samfylkingin barðist fyrir því undir daglegri verkstjórn Össurar Skarphéðinssonar utanríkisráðherra að Ísland gengi í ESB.
Össur sá í janúar 2013 að aðildargangan væri vonlaus og hætti henni í von um að hún spillti ekki fyrir Samfylkingunni í kosningum um vorið 2013. Sú von rættist ekki og nú býr Samfylkingin sig undir að ná miklu fylgi í kosningum á árinu 2025 án þess að flagga ESB-aðildarstefnu.
Í stað þess að draga saman seglin ákvað Heimssýn að helga sig baráttu gegn EES-samningnum. Hún er sögð háð í nafni fullveldis en er undir svo miklum norskum áhrifum að tal Heimssýnar um sjálfstæði er orðið marklaust. Stundum má ætla að samtökin séu deild í samtökunum Nei til EU í Noregi. Þau hafa farið halloka í dómsmálum gegn norska ríkinu vegna þriðja orkupakkans. Ágreiningur um hann í Noregi var notaður til pólitísks upphlaups hér með samvinnu Heimsýnar og Miðflokksins.
Þriðja-orkupakkadeilan er stórundarlegt tilvik í sögu samskipta Íslands við ESB – hana má rekja til misskilnings, þekkingarleysis eða vísvitandi rangtúlkana. Hún sýnir að aukinn aðgangur að réttum upplýsingum skiptir engu fyrir þá sem smíða eigin veruleika til að rækta samsærisgróður sinn.
Nú helgar Heimssýn sig baráttunni gegn bókun 35. Hér rita menn greinar í blöð og eru andagtugir yfir yfirvofandi landráðum verði þessi bókun við EES-samninginn innleidd. Staðreyndin er að hún hefur gilt sem hluti af þjóðréttarlegum skuldbindingum Íslands vegna EES-samningsins í rúm 30 ár. Þrátt fyrir þessa staðreynd stóð t.d. á vefsíðu Heimssýnar þriðjudaginn 24. september:
„Eins og menn þekkja eru allar horfur á að þrýstingur á umhverfið geti aukist til muna ef bókun 35 nær fram að ganga. Evrópusambandið þyrstir í hreina orku og leggur töluvert á sig til að koma málum þannig fyrir að hægt verði að sækja hana t.d. til Íslands, í fyllingu tímans. Á það vitaskuld jafnt við um vatnsorku, jarðvarma og vindorku.“
Í þessari samsærisklausu er slegið saman kenningu um að breyting á íslensku EES-lögunum til réttarauka fyrir íslenska borgara á sameiginlega EES-markaðnum í samræmi við bókun 35 snúi að leynilegum áformum ESB gagnvart Íslandi í orkumálum. Illi andi þriðja orkupakkans svífur sem sagt enn yfir vötnunum.
Heimssýn gengur þarna erinda afturhaldsaflanna sem berjast gegn virkjun endurnýjanlegra orkugjafa og beitir til þess lygi um dulinn tilgang bókunar 35. Það er dapurlegt að Heimssýn verði eigin dellukenningum að bráð.