18.2.2026 13:04

Stjórnin lifir á lýðskrumi

Þegar Kristrún Frostadóttir forsætisráðherra sagði það á dögunum pólitík að meingallað frumvarp Ingu Sæland, sem Ragnar Þór Ingólfsson, arftaki hennar og flokksbróðir, fylgir nú fram, ætti að verða að lögum var hún að bjarga lífi ríkisstjórnar sinnar.

Nú er svo komið fyrir Kristrúnu að Flokkur fólksins gengur á lagið og stjórnarsinnar láta hann komast upp með hverja vitleysuna eftir aðra. Á þingi þriðjudaginn 17. febrúar var upplýst að Lilja Rafney Magnúsdóttir sem nú er í Flokki fólksins og stýrir atvinnuveganefnd þingsins hefði níðst á rétti minnihlutans og beitt meirihlutavaldi til þess að útiloka lögfræðilega athugun á draumafrumvarpi flokks síns um grásleppuveiði.

Líf ríkisstjórnarinnar ræðst af grásleppufrumvarpi.

Á nefndarfundi 17. febrúar kom Lilja Rafney með tillögu um að ákvörðun atvinnuveganefndar frá því 3. febrúar um að óska eftir úttekt Lagastofnunar yrði dregin til baka. Minni hluti nefndarinnar vissi ekki annað en að verið væri að undirbúa þessa beiðni til Lagastofnunar. Síðan kom óvænt í ljós að meiri hlutinn ætlaði í krafti atkvæðamagns að stöðva það verkefni að fá úttekt á lagalegum grundvelli málsins. Skaut minni hlutinn þá málinu til forseta alþingis eins og þingsköp leyfa og urðu harðar umræður um vinnubrögðin í nefndinni í sal alþingis 17. febrúar.

Það er merkilegt að fulltrúar stjórnarandstöðu á þingi skuli treysta á óhlutdrægni Þórunnar Sveinbjarnardóttur þingforseta í þessu máli. Hún hefur sýnt í verki að minnihlutinn eigi í raun engan rétt, ekki einu sinni til að flytja ræður, telji hún það andstætt hagsmunum ríkisstjórnarinnar. Ótti þingmanna Flokks fólksins við að þetta mál hljóti lögfræðilega skoðun er nú orðinn að stjórnarslitamáli í herbúðum ríkisstjórnarinnar og þess vegna verður að beita öllum ráðum til að hafna óskum stjórnarandstæðinga.

Ásthildur Lóa Þórsdóttir, formaður þingflokks Fólks flokksins, gaf þingforseta og stjórnarmeirihlutanum línuna í grásleppumálinu á fundi þingsins 17. febrúar:

„Þetta mál snýst nefnilega um pólitík, þetta snýst ekkert um neitt annað. Við í þessari ríkisstjórn viljum vinna með byggðunum og byggðasjónarmiðum. .. Þetta snýst um pólitík og við erum ríkisstjórn sem stendur með fólkinu í landinu og gegn sérhagsmunum.“

Lýðskrumið birtist varla í skýrari mynd og stjórnarliðar falla fyrir því vegna þess að annars fellur stjórnin þeirra.

Forsætisráðherrann hefur sætt sig við að landinu skuli stjórnað á þessum forsendum. Það tryggir henni og Samfylkingunni völdin. Viðreisn spilar með af því að hún á allt sitt undir að efnt verði til þjóðaratkvæðagreiðslu án þess að stjórnskipulegar og lögfræðilegar hliðar séu ræddar eða skoðaðar.