Ríkisstjórn býður til málþófs
Átökin í þingsalnum um auðlindagjaldið eru fyrst og síðast um aðferð ríkisstjórnarinnar, þvermóðsku og virðingarleysi fyrir rökstuddum sjónarmiðum sem kynnt eru vegna hækkunar auðlindagjaldsins.
Það verður spennandi að sjá hvernig ríkisstjórnin ætlar að koma frumvarpinu um tvöföldun auðlindagjaldsins í gegnum þingið fyrir 13. júní. Í frétt Morgunblaðsins í dag (29. maí) er sagt frá morgunverðarfundi Samtaka atvinnulífsins (SA) 28. maí um áhrif veiðigjalda og annarra skatta á fyrirtæki.
Þar eins og annars staðar þar sem fulltrúar atvinnulífs og nýsköpunar segja álit sitt á frumvarpinu sætti aðferðafræðin sem beitt er við gerð þess mikilli gagnrýni. Hanna Katrín Friðriksson atvinnuvegaráðherra tók þátt í pallborði, sagðist skilja óánægju margra, hún ætti víst í samráði við ýmsa um efni frumvarpsins en hún „haggaðist ekki tommu“ segir blaðamaðurinn.
Vissulega getur verið gott og máli til framdráttar að ráðherra bíti í skjaldarrendurnar og haggist ekki tommu vegna frumvarps sem hann flytur, sérstaklega þegar ráðherra veit að hann styðst við órofa fylkingu stjórnarsinna.
Rætt var við Sigmar Guðmundsson, þingflokksformann Viðreisnar, á mbl.is 28. maí. Hann hafði ekki áhyggjur af afgreiðslu mála ríkisstjórnarinnar fyrir sumarleyfi þingmanna. Ætlunin er að það hefjist að loknum þingfundi föstudaginn 13. júní, það er eftir tvær vikur.
Þessi dagsetning er að vísu kynnt til viðmiðunar; ekki er ólíklegt að þingfundir verði boðaðir að loknum þjóðhátíðardeginum 17. júní.
Sigmar, sem gegnir nú formennsku þingflokks í fyrsta sinn, segir þetta svipaða stöðu og oft áður fyrir þinglok. Hann telur að nú nálgist sú stund að samið verði um þinglokin og eftir það gangi afgreiðsla mála hratt fyrir sig. Fyrst þurfi stjórnarflokkarnir þó að athuga „hvort að vinna þurfi ákveðin mál betur og svo leggja þau aftur fram í haust“.
Sigmar telur eðlilegt að miklar umræður fari fram um veiðigjaldafrumvarpið á þingi en kveinkar sér jafnframt undan hve mikið það var rætt við fyrstu umræðu, það hafi klárlega verið málþóf. Hvað sem menn kjósa að kalla það að þingmenn hafi sagt skoðun sína á þessu umdeilda frumvarpi við fyrstu umræðu, þar sem ræðutími er þó takmarkaður, eru þessar ræður aðeins vísbending um það sem vænta má við aðra umræðu, haggist ráðherrann ekki tommu.
Þetta er dæmigert mál sem óskynsamlegt er að sækja á þann veg sem atvinnuvegaráðherra gerir nema hún sé í bardaganum átakanna vegna til að sanna að hún þori til atlögu við stórfyrirtækin sem hafa nýtt sér lögbundið kerfi til að leggja grunn að mestu hagsæld í sögu þjóðarinnar.
Það er undarlegt að flokkur á borð við Viðreisn sem kennir sig við frjálsræði skuli nú vera brimbrjótur í þessari vinstrisinnuðu stjórn við að útfæra hækkun skatta og annarrar gjaldtöku á atvinnufyrirtæki. Þetta kallar á átök og setur eðilega svip á störf alþingis.
Átökin í þingsalnum um auðlindagjaldið eru fyrst og síðast um aðferð ríkisstjórnarinnar, þvermóðsku og virðingarleysi fyrir rökstuddum sjónarmiðum sem kynnt eru vegna hækkunar auðlindagjaldsins.
Ríkisstjórnin skapar kjöraðstæður fyrir raunverulegt málþóf sem getur staðið langt fram yfir 13. júní.