Pawel vill ekki varnarlínur
Nú berast þau skilaboð til Brusselmanna frá talsmanni stjórnarflokkanna í utanríkismálum á alþingi að ástæðulaust sé að leita að nokkurri leið til að tryggja varanlega vörn fyrir íslenska dýrastofna við ESB-aðild.
Halldór Runólfsson, fyrrv. yfirdýralæknir og skrifstofustjóri í atvinnuvega- og nýsköpunarráðuneytinu, varar eindregið við því að gengið sé til aðildarviðræðna við ESB án þess að sett séu skýr samningsmarkmið og þau kynnt þjóðinni.
Hann segir í Morgunblaðinu 21. febrúar að hann telji „gríðarlega mikilvægt að sett verði fram skýr markmið varðandi innflutning á lifandi dýrum“. Draga verði rauða línu, eða varnarlínu, því óbætanlegur skaði hlytist af því að fara yfir hana.
Halldór minnir á að innan ESB geti aðildarlönd ekki gert sérstakar kröfur varðandi innflutning dýra frá öðrum ESB-löndum. Hann vísar í vísindalegar niðurstöður og hagfræðilegt mat sem unnið var fyrir rúmum áratug af Daða Má Kristóferssyni, núverandi fjármálaráðherra, máli sínu til stuðnings þegar hann segir undir lok greinar sinnar: „Eitt helsta markmið ríkisstjórnarinnar verður að vera að alls ekki megi samþykkja frjálst flæði á lifandi dýrum ef af aðildarviðræðum verður. Það er hin nauðsynlega varnarlína.“
Tilefni þessarar alvarlegu ábendingar til stjórnvalda eru orð sem Pawel Bartoszek, þingmaður Viðreisnar og formaður utanríkismálanefndar alþingis, lét falla 11. febrúar sl. Hann sagði: „Ég vil byrja á því að taka fram að ég tel það ekki vera forsendu þess að Ísland gangi inn í Evrópusambandið að landið verði varanlega undanþegið þeim lögum sem þar gilda, að hluta eða heild.“
Hér hefur hvað eftir annað verið hvatt til þess að ríkisstjórnin upplýsi þjóðina um markmið sín með viðræðunum sem hún vill að haldið sé áfram við ESB. Forsætisráðherra og utanríkisráðherra þegja þunnu hljóði um þetta. Orðin sem hér eru höfð eftir Pawel Bartoszek gáfu Halldóri Runólfssyni tilefni til að birta varnaðarorð sín. Hann tók þátt í viðræðunum við ESB á árunum 2009 til 2012 og segir að þá hafi það verið „skýr og óumdeild markmið frá íslenskum stjórnvöldum, að ekki yrði samið um frjálst flæði á lifandi dýrum og erfðaefnis þeirra“. Þessu hafi verið „stíft haldið fram“ af fulltrúum Íslands og hann lagt sig fram um að sannfæra fulltrúa ESB um nauðsyn þessara verndaraðgerða.
Pawel Bartoszek (mynd: mbl.is)
Nú berast þau skilaboð hins vegar til Brusselmanna frá talsmanni stjórnarflokkanna í utanríkismálum á alþingi að ástæðulaust sé að leita að nokkurri leið til að tryggja varanlega vörn fyrir íslenska dýrastofna við ESB-aðild.
David Attenborough hefur gert óteljandi sjónvarpsþætti sem sýna hvernig breytingar af mannavöldum stuðla að útrýmingu dýrategunda. Það yrði kannski leið til áhrifa á Brusselmenn og innlenda ESB-aðildarsinna að fá þann heimsfræga öldung til að gera sjónvarpsþátt um aðför Pawels og skoðanasystkina hans að íslenskum dýrastofnum? Að forsögn þeirra yrði samið um útrýmingu þeirra með aðild Íslands að ESB.
Í skuggaviðræðum forystumanna Viðreisnar við félaga sína í Renew Europe-flokknum um aðild Íslands að ESB hefur Viðreisnarfólkinu verið bent á að allar hugmyndir um E$B-sérlausnir, það er varanlegar undanþágur, séu dauðadæmdar, þess vegna verði stjórnmálamenn að tala á þann veg sem Pawel gerði 11. febrúar 2026. Þess vegna er enn spurt: Hvaða samningsmarkmið hefur ríkisstjórnin? Talar Pawel fyrir hennar hönd og stjórnarflokkanna?