Kristrún og þjóðaratkvæðagreiðslan
Það er furðulegt að Kristrún Frostadóttir standi í þeim sporum núna að saka aðra um svik kosningaloforða árið 2013 miðað við yfirlýsingar hennar sjálfrar fyrir og eftir kosningar.
Kristrún Frostadóttir forsætisráðherra og formaður Samfylkingarinnar sá sér ekki fært að sitja í Silfri ríkisútvarpsins að kvöldi mánudagsins 9. mars og ræða þar við aðra flokksformenn um afdrifaríkasta mál stjórnar hennar, þjóðaratkvæðagreiðsluna um ESB-viðræðurnar.
Kristrún Frostadóttir forsætisráðherra.(mynd:;mbl.,is/Eggert).
Fyrr þennan sama mánudag svaraði forsætisráðherra óundirbúnum fyrirspurnum á alþingi um málið og er getum að því leitt að það sé eina sem hún ætli að segja um það á þingi.
Eitt af meginstefjunum í málflutningi Kristrúnar og Þorgerðar Katrínar Gunnarsdóttur utanríkisráðherra er að með tillögunni um þjóðaratkvæðagreiðsluna nú séu þær að „að efna hér svikið loforð“ Sjálfstæðisflokksins og annarra flokka í minnihluta á alþingi nú sem gefið hafi verið fyrir þingkosningar 2013. Tilvitnuðu orðin eru í Kristrúnu.
Hún sagði einnig: „Þingsályktunartillagan um þessa þjóðaratkvæðagreiðslu þar sem hlustað verður á þjóðina var samþykkt á hundraðasta – einn núll núll – fundi ríkisstjórnarinnar.“ Og einnig: „Mörgum sárnaði á sínum tíma að fá ekki að greiða atkvæði um þetta. Ég geri ekki lítið úr því að þetta er tilfinningaríkt mál. .. Það var líka tilfinningaríkt mál að ganga í NATO. Vá, hvað það var tilfinningaríkt mál í áratugi. Og það var líka tilfinningaríkt mál fyrir fólk að ganga í EES og það verður tilfinningaríkt mál að ræða um aðildarviðræður að ESB.“
Flokkarnir sem stöðvuðu ESB-viðræðurnar í janúar 2013, Samfylking og VG, kolféllu í þingkosningunum 2013. Það var enginn áhugi á ESB-aðild meðal meirihluta þingmanna á nýju þingi og þess vegna heldur enginn áhugi á að halda áfram viðræðum við ESB. Ekkert kosningaloforð var svikið ESB-málið var fellt í þingkosningunum.
Á kjörtímabilinu 2013 til 2016 var stofnaður nýr flokkur, Viðreisn, um að halda lífi í ESB-málinu. Hann myndaði stjórn með Sjálfstæðisflokknum í ársbyrjun 2017 og samdi um framkvæmd á ESB-baráttumáli sínu. Þriðji stjórnarflokkurinn, Björt framtíð, sprengdi stjórnina haustið 2017.
Það er furðulegt að Kristrún Frostadóttir standi í þeim sporum núna að saka aðra um svik kosningaloforða árið 2013 miðað við yfirlýsingar hennar sjálfrar fyrir og eftir kosningar í nóvember 2024 þegar hún talaði gegn því að kljúfa þjóðina með ESB-málinu. Hún situr nú uppi með opinberan klofning um ESB-málið í ríkisstjórn sinni og uppnám í þjóðfélaginu. Hún vildi ekki ESB fyrir kjördag!
Forsætisráðherra slær ekki á þessa ólgu með því að neita að sitja fyrir svörum í sjónvarpi. Hún kemst ekki heldur frá umræðum um efni málsins með því að vísa til ársins 2013 eða að hún hafi haldið 100 ríkisstjórnarfundi. Hún talaði á þingi í véfréttastíl um hugsanlegan ávinning af ESB-aðild eins og enginn vissi hvað í henni fælist. Annað sem hún sagði var í raun ekki annað en innanómt skrum. Stjórnin gæti bæði staðið að þjóðaratkvæðagreiðslu og sinnt öðrum málum.
Allt ber þetta því miður svip af því að Kristrún hafi verið plötuð við stjórnarmyndunina þótt fyrir kosningar hafi hún sagst ekki vera að plata þegar hún varaði við ESB-málinu. Nú vinnur stjórn hennar að því að plata kjósendur.