Kóngurinn og Trump
Myndir frá heimsókn bresku konungshjónanna til Bandaríkjanna sem lýkur í dag þykja sýna að Trump beri ekki aðeins virðingu fyrir bresku krúnunni heldur falli honum einnig vel við konunginn.
Nú berast fréttir um að Donald Trump Bandaríkjaforseti íhugi að fækka í bandaríska hernum í Evrópu. Vangaveltur um að forsetinn ákveði þetta eru ekki nýjar. Að þessu sinni sér Trump fækkunina sem tækifæri til að ná sér niðri á Friedrich Merz Þýskalandskanslara sem telur forsetann hafa skapað sér næsta óleysanlegan vanda með árásinni á Íran.
Það má ekki orðinu halla um Trump án þess að hann grípi til gagnaðgerða sem sumir segja að einkennist af hefndarþorsta. Hann ráði einfaldlega ekki við sig,
Þetta hefur James Comey, fyrrverandi forstjóri FBI, fengið að reyna. Í fyrra var hann ákærður tvisvar fyrir refsiverð brot sem tengjast bandaríska forsetanum. Nú er ákæra gegn honum enn í fréttum. Þriðjudaginn 28. apríl höfðaði dómsmálaráðuneyti Bandaríkjanna mál gegn honum fyrir að hafa hótað lífi forsetans með mynd af nokkrum kúfskeljum sem birt var á Instagram í maí 2025. Þá hafi hann sent hótunina á milli ríkja innan Bandaríkjanna enda nái netið yfir mörg ríki.
Comey gæti átt yfir höfði sér allt að tíu ára fangelsi. Hann var á göngu á sendinni sjávarströnd þegar hann tók ljósmynd af tölunum 8647 sem höfðu verið skráðar í sandinn með kúfskeljum. Comey setti myndina á Instagram með texta þar sem hann sagðist hafa séð þetta flotta kúfskeljaverk þegar hann gekk á ströndinni.
Saksóknarinn vill að tölurnar fjórar séu afkóðaðar. Talan 86 er t.d. sögð notuð á veitingastöðum til að segja að réttur á matseðlinum sé ekki fáanlegur og þá er talan einnig notuð um að útrýma eigi einhverjum. Talan 47 er sögð vísa til 47. forseta Bandaríkjanna, Donald Trump.
Comey segist ekki hafa vitað hvað tölurnar ættu að tákna þegar hann birti myndina en hann hafi fjarlægt hana eftir að gagnrýni birtist um að í henni fælist árás á Trump. Talið er ólíklegt að dómari fallist á það sjónarmið að fyrrverandi forstjóri FBI hafi af ásetningi ógnað lífi forsetans með þessu dulmáli.
Í ljósi hefndarþorsta Trumps þykir enn aðdáunarverðara en ella að sjá hvaða lag Karl III. Bretakonungur hefur á forsetanum. Myndir frá heimsókn bresku konungshjónanna til Bandaríkjanna sem lýkur í dag þykja sýna að Trump beri ekki aðeins virðingu fyrir bresku krúnunni heldur falli honum einnig vel við konunginn.
Karl III. skemmtir Melaníu Trump í garði Hvíta hússins.
Í breskum blöðum segir að myndin sem hér fylgir og sýnir að kónginum tekst að vekja hlátur hjá Melaniu Trump á opinberum vettvangi sanni einstakan hæfileika hans til að brjóta ísinn og ná vinsamlegu sambandi við þá sem hann hittir.
Karl III. vakti hrifningu og aðdáun fyrir ræðuna sem hann flutti á Bandaríkjaþingi. Það vakti ekki síst gleði þingmanna demókrata að konungurinn vitnaði til Magna Carta, eða frelsisskjalsins mikla frá júní 1215 þegar Jóhann Englandskonungur í Runnymede lét undan þrýstingi frá uppreisnargjörnum barónum. Þar er mælt fyrir um þá grundvallarreglu að konungi beri að virða lögin, hann sé ekki hafinn yfir þau, þar er rétturinn til réttlátrar málsmeðferðar viðurkenndur og vernd gegn ólöglegri fangelsun.
Það segir sína sögu hve lófatak og fögnuður í þingsalnum var magnaður þegar Bretakonungur rifjaði upp þessar 800 ára gömlu grunnreglur um vald og nauðsyn þess að setja framkvæmdavaldinu skorður. „ Það kemur mánudagur eftir þennan dag,“ sögðu efasemdarmenn, enginn vissi hvað forsetinn segði þá.
Gott er að rifja upp hér og nú að hápunktur valdaframsals framkvæmdavalds og löggjafarvalds er að boða til þjóðaratkvæðagreiðslu um eitthvert álitaefni. Að kasta höndunum til þess verks eins og ríkisstjórn Íslands hefur nú gert er til háborinnar skammar.