Ísland í NATO – ekki ESB!
Á ruv.is var sagt frá því þriðjudaginn 3. febrúar að ný Gallup-könnun sýndi að Íslendingar væru hlynntari veru Íslands í Atlantshafsbandalaginu (NATO) en í fyrra en andvígari aðild að Evrópusambandinu (ESB).
Á ruv.is var sagt frá því þriðjudaginn 3. febrúar að ný Gallup-könnun sýndi að Íslendingar væru hlynntari veru Íslands í Atlantshafsbandalaginu (NATO) en í fyrra en andvígari aðild að Evrópusambandinu (ESB). Netkönnun sem Gallup gerði dagana 21. janúar til 2. febrúar 2026. Heildarúrtaksstærð var 1.672 og þátttökuhlutfall var 48,8%.
Ríflega 78% eru hlynnt veru Íslands í NATO og tæplega einn af hverjum tíu er andvígur. Í fyrra voru 71% hlynnt og 12% andvíg. Rúmlega 42% landsmanna sögðust hlynntir því að Ísland gengi í Evrópusambandið en álíka margir voru andvígir. Í fyrra sögðust 44% vera hlynntir því að Ísland færi í ESB og 35% andvíg.
Fólk milli fertugs og fimmtugs er jákvæðara gagnvart veru Íslands í NATO en yngra og eldra fólk. Þegar litið var til afstöðu til stjórnmálaflokka var jákvæðni mest meðal þeirra sem myndu kjósa Viðreisn. Þeir sem eru andvígastir NATO fylgja flokkum sem eiga ekki fulltrúa á alþingi.
Rúmlega 80% þeirra sem sögðust líklega kjósa Viðreisn, Sjálfstæðisflokkinn, Samfylkinguna, Framsóknarflokkinn eða Miðflokkinn kváðust hlynntir veru Íslands í NATO. 51% þeirra sem myndu kjósa Flokk fólksins sögðust hlynntir NATO.
Þegar kom að aðild að ESB sögðust 74% þeirra sem myndu kjósa Viðreisn fylgjandi aðild en 71% þeirra sem myndu kjósa Samfylkinguna og þar á eftir koma þeir sem myndu kjósa Flokk fólksins, 35%.
Innan Flokks fólksins er aðeins 2% munur á þeim sem eru hlynntir og andvígir inngöngu Íslands í ESB.
Stuðningsmenn Miðflokksins og Sjálfstæðisflokksins eru helst andvígir inngöngu í ESB, 84% þeirra sem myndu kjósa Sjálfstæðisflokkinn og 73% þeirra sem myndu kjósa Miðflokkinn.
Þessar tölur sýna svart á hvítu að áróður ESB-aðildarsinna um að nú sé nauðsynlegt að hraða sér í skjól ESB vegna yfirlýsinga Trumps um Grænland og fleira hefur ekki þann hljómgrunn sem ætla mætti miðað við stóryrðin og hræðsluáróðurinn sem fluttur er ESB-aðild til stuðnings um þessar mundir.
Þróunin er í þveröfuga átt. Stuðningurinn við NATO eykst og andstaðan við ESB-aðild eykst. Það er ekki síst Þorgerður Katrín Gunnarsdóttir utanríkisráðherra sem boðar nauðsyn þess að hraða öllu varðandi ESB vegna örra breytinga heimsmála. Þetta upphlaup hennar skilar ekki þeim almenna stuðningi sem hún hefur örugglega vænst.
Miðað við að 74% kjósenda Viðreisnar og 71% kjósenda Samfylkingar hafa gert upp við sig að gengið skuli í ESB er undarlegt hve talsmenn flokkanna bregðast illa við þegar bent er á að í boðaðri þjóðaratkvæðagreiðslu skuli spurt: Vilt þú að Ísland gangi í Evrópusambandið?
Æ fleirum verður ljós fáránleiki þess að spyrja um framhald viðræðna sem gengið var til á grunni frá 2009 við allt aðrar aðstæður. Þá var Donald Trump óþekktur og fjarri því að vera Bandaríkjaforseti. Nú verður hins vegar að kjósa strax af því að hann er í Hvíta húsinu og ásælist Grænland!