Inga ávarpar kennara
Allt er þetta rétt hjá ráðherranum en af fréttum mátti ráða að nokkurt uppnám hafi orðið á fundi kennaranna vegna þessara orða ráðherrans og formanni samtaka þeirra var misboðið.
Umræður um innra starf skóla eru litlar á opinberum vettvangi. Foreldrum er sagt að fræðilegar úttektir og niðurstöður skipti meira máli en opinber miðlun upplýsinga um árangur í skólastarfi. Frásagnir af lítilli raunhæfri fræðslu kennaranema og skorti á starfsnámi benda til akademískrar einangrunar.
Inga Sæland mennta- og barnamálaráðherra talar á kennaraþingi 15. apríl 2026 (mynd: vefsíða stjórnarráðsins).
Í ræðu sem Inga Sæland mennta- og barnamálaráðherra flutti á þingi kennara miðvikudaginn 15. apríl vék hún að því að foreldrar ættu „rétt á skýrum upplýsingum um stöðu barna sinna í námi“. Á hinn bóginn væri það erfitt þar sem börn fengju „ítrekað ekki að taka prófin sín með sér heim“.
Í framhaldi af því að ráðherrann benti á þennan ótrúlega skort á gagnsæi sagðist Inga Sæland telja eðlilegt að við notuðum „tölustafi í einkunnagjöf eins og tíðkast í framhaldsskólum og háskólum, en ekki bókstafi eða önnur form, s.s. liti sem getur verið erfitt að skilja“.
Hún sagði að nýleg könnun Maskínu sýndi að yfir 88% landsmanna teldu að birta ætti einkunnir í íslenskum skólum í tölustöfum en einungis 2,6% teldu að birta ætti einkunnirnar í bókstöfum.
„Vandfundinn er meiri stuðningur við eitthvert málefni í okkar samfélagi en einmitt breytingu í þessa átt,“ sagði ráðherrann og bætti við að hlusta yrði á raddir foreldra. Það vildi hún gera.
Allt er þetta rétt hjá ráðherranum en af fréttum mátti ráða að nokkurt uppnám hafi orðið á fundi kennaranna vegna þessara orða ráðherrans og formanni samtaka þeirra var misboðið þar sem ráðherrann hefði ekki fyrir fram borið þessa skoðun sína undir hann. Vilji forystumenn kennara að fluttar séu ritskoðaðar ráðherraræður á fundum þeirra er skörin farin að færast upp í bekkinn. Hvar á ráðherra frekar að lýsa skoðun sinni en fyrir framan forystumenn kennara?
Í ágúst 2025, þegar Ásdís Kristjánsdóttir bæjarstjóri í Kópavogi kynnti umbætur í grunnskólastarfi, réðst fyrrverandi formaður samtaka kennara á hana. Hann sakaði Ásdísi um að ætla að eyðileggja „matferilinn“, tólið sem hefur verið í þróun hjá sérstakri stofnun síðan 2018. Á þeim tíma hefur stöðugt sigið á ógæfuhliðina en svar kennaraforystunnar er að það sé mælitækjunum að kenna en ekki því sem mælt er.
Jafnaðarmaðurinn Mattias Tesfaye menntamálaráðherra Dana er eindreginn talsmaður samræmdra prófa með tölustöfum. Í blaðaviðtali þar sem hann áréttaði þessi sjónarmið segir blaðamaðurinn að ráðherrann viti að þessi skoðun hans brjóti „gegn tíðarandanum á vinstri vængnum“, þar sem einkunnir hafi orðið blóraböggull alls þess sem er að í skólakerfinu. Í áraraðir hafi vinstrisinnar gagnrýnt „afrekssamfélagið“, „einkunnakapphlaupið“ og samræmdu prófin. Gagnrýnendur segi þau beinlínis skaðleg fyrir velferð barnanna og grafa undan menntunarhugsjón skóla. Ef við prófum of mikið læri börnin aðeins til prófs og bogni síðan hægt undan pressunni, sé sagt. Mattias Tesfaye menntamálaráðherra sér þetta hins vegar allt öðrum augum:
„Það er gott að búa í samfélagi með afreksfólki. Þá er líka gott að lifa í samfélagi þar sem sumir vilja vinna afrek og skapa verðmæti fyrir okkur hin.“