Heimsfriður í húfi
Vonandi tekst að lækka varanlega rostann í íranska klerkaveldinu án þess að allt fari úr böndunum. Heimsfriður er í húfi.
Fyrirsögnin á pistlinum sem birtist hér í gær: Trump fer í stríð fór fyrir brjóstið á hópi lesenda eins og sjá má á athugasemdum á Facebook. Mátti skilja suma þeirra þannig að frekar ætti að nota pútínskt orðalag um og tala um „sérstaka hernaðaraðgerð“.
Við búum sem betur fer ekki við ritskoðun sem framfylgt er með fangelsun eins og hjá Pútin. Útilokunarþrá birtist í mörgum athugasemdum á Facebook. Reynt er að þagga niður í fólki eða gera orð þess svo tortryggileg að enginn treysti því lengur.
Fyrirsögnin sem fór fyrir brjóstið á gagnrýnendum hennar er réttmæt. Í ljósi alls þess sem Trump hefur sagt um andúð sína á stríði og þátttöku Bandaríkjamanna í átökum á fjarlægum slóðum var fréttnæmt að hann gæfi fyrirmæli um þátttöku í stríðsaðgerðum.
Myndin er frá Tel Aviv í Ísrael sunnudaginn 22. júní og sýnir fjölbýlishús eftir loftárás frá Íran.
Bandaríkjaher á einu sprengjuna og einu sprengjuþoturnar í heiminum sem búa yfir afli til að granda neðanjarðar kjarnorkustöðvum Írana og eyðileggja áætlun írönsku klerkastjórnarinnar um að eignast kjarnavopn. Til þessa vopns greip Trump. Varnarmálaráðherra hans og varaforseti lýstu aðgerðinni sem stríði (e. war), ekki gegn Írönum heldur kjarnavopnavæðingu klerkahersins sem hefur það meginmarkmið að afmá Ísrael og valda Bandaríkjamönnum óbærilegum skaða.
Í langan tíma hefur það verið yfirlýst alþjóðlegt markmið að útiloka að klerkastjórnin í Íran komi höndum yfir kjarnavopn. Stjórnin hefur beitt blekkingum og sviksemi gagnvart alþjóðlegum eftirlitsmönnum við þróun á tækni til að framleiða vopnin. Trump telur að með árásinni hafi tekist að binda enda á allar tilraunir Írana í þessum. Þeir sem draga það í efa viðurkenna þó að kjarnorkuáætlun Írana sé öll úr skorðum og framkvæmd hennar tefjist um nokkur ár. Endanlegt mat á tjóni Írana verður kannski aldrei kynnt.
Að morgni sunnudagsins 22. júní sagði JD Vance, varaforseti Trumps, að stríð forsetans beindist aðeins gegn kjarnavopnadraumum Írana en ekki gegn stjórn landsins eða stjórnarfari.
Þessi yfirlýsing er í samræmi við það sem Trump sagði í ræðu í Sádí-Arabíu fyrir skömmu. Hann taldi að þar og í Persaflóaríkjunum vegnaði mönnum vel vegna eigin stjórnarhátta. Trump gerði lítið úr þeim forverum sínum sem hefðu reynt að breyta stjórnarháttum á þessum slóðum með valdi.
Aðfaranótt mánudagsins 23. júní var annar tónn í Trump um stjórnarskipti í Íran. Á miðli sínum Truth Social gaf hann til kynna áhuga sinn á stjórnarskiptum í Íran. Hann sagði ekki pólitískt rétt að nota hugtakið stjórnarskipti (e. Regime Change) en gæti núverandi stjórn Írans ekki gert landið öflugt að nýju (e. great again) hvers vegna ætti þá ekki að skipta um stjórn. Trump kynnti síðan slagorðið MIGA! í anda eigin slagorðs, MAGA!
Benjamin Netanyahu, forsætisráðherra Ísraels, sagði að kvöldi sunnudagsins 22. júní að aðeins vantaði „mjög, mjög lítið“ til að tilgangurinn með árás Ísraela á Íran hefði náðst. Vonandi tekst að brúa þetta litla bil og lækka varanlega rostann í íranska klerkaveldinu án þess að allt fari úr böndunum. Heimsfriður er í húfi.