Heift vegna Hamasáskana
Þetta er ekki í fyrsta skipti sem viðkvæm staða myndast í samskiptum lögreglu og blaðamanna. Það er mikils virði fyrir báða aðila að gagnkvæmur trúnaður ríki.
Forsíðufrétt Morgunblaðsins frá 25. mars um að hluti þeirra manna sem handteknir voru eftir grófa líkamsárás í bílakjallara á Höfðatorgi í Reykjavík fyrir skömmu væri grunaður um að tengjast víga- og hryðjuverkasamtökunum Hamas hefur fengið mikla og verðskuldaða athygli.
Sama dag og hún birtist sendi lögreglan frá sér tilkynningu um að „á þessu stigi málsins“ ætti fréttin ekki við rök að styðjast. Í dag (27. mars) segir í blaðinu að allar upplýsingar og ábendingar sem leiddu til birtingar fréttarinnar hafi verið „bornar undir yfirmann hjá lögreglunni á höfuðborgarsvæðinu áður en fréttin var birt“. Hann hafi hvorki viljað neita né staðfesta nokkuð um gang og gögn rannsóknarinnar, en sagði blaðamanni að hann væri á réttri leið.
Blaðið segir að þessar upplýsingar hafi blaðamenn Morgunblaðsins fengið frá tveimur trúverðugum heimildarmönnum innan lögreglunnar. Eftir birtingu fréttarinnar hafi fleiri lögreglumenn borið um hið sama.
Ógnvekjandi Hamasliðar.
Þetta er ekki í fyrsta skipti sem viðkvæm staða myndast í samskiptum lögreglu og blaðamanna. Það er mikils virði fyrir báða aðila að gagnkvæmur trúnaður ríki. Hvorugur hefur hag af því að beita vísvitandi blekkingum í þeim samskiptum. Fyrir almenning skiptir að sjálfsögðu miklu að samræmi sé milli þess sem lögreglumenn segja í skjóli nafnleyndar og opinberlega.
Á þessu máli er önnur hlið sem ætti að greina. Þetta rannsóknarefni snýr að viðbrögðunum við frétt Morgunblaðsins.
Viðhorf í útlendingamálum tóku stakkaskiptum hér í janúar 2024 þegar Bjarni Benediktsson, þáv. formaður Sjálfstæðisflokksins, gagnrýndi tjaldbúðir á Austurvelli sem meirihluti borgarstjórnar Reykjavíkur leyfði aðgerðarsinnum að reisa til stuðnings málstað Palestínumanna og til að heimta að íslensk stjórnvöld færu inn á Gaza og næðu þar í skyldmenni þeirra sem í tjöldunum bjuggu.
Þriðjudaginn 23. janúar 2024 sagði Þórunn Sveinbjarnardóttir, nú forseti alþingis, í samtali við Morgunblaðið að með gagnrýni sinni hefði Bjarni Benediktsson skrifað „sig út úr ábyrgri og lýðræðislegri umræðu um málefni útlendinga hér á landi með ósmekklegri samsuðu útlendingaandúðar og hræðsluáróðurs“.
Þetta viðhorf Þórunnar birtist nú að nýju vegna fréttar Morgunblaðsins. Sigmundur Ernir Rúnarsson, flokksbróðir Þórunnar, sagði á alþingi 25. mars að Morgunblaðið teiknaði upp þá mynd að það stafaði ógn af öllum palestínskum flóttamönnum sem hefðu leitað skjóls á Íslandi. „Þetta er beinlínis hættulegt. Þetta er fréttamennska sem er stórhættuleg,“ sagði þingmaðurinn.
Heiftin í viðbrögðunum er út fyrir öll hæfileg mörk.
Það varð töluvert uppnám innan Samfylkingarinnar um árið þegar spurðist að í hlaðvarpssamtali 10. febrúar 2024 hefði Kristrún Frostadóttir flokksformaður viðrað sjónarmið í anda orða Bjarna Benediktssonar um tjaldbúðirnar.
Í Samfylkingunni eru öfl sem umturnast í hvert sinn sem vikið er gagnrýnisorðum að palestínsku flóttafólki hér. Lögreglan á höfuðborgarsvæðinu stígur mjög varlega til jarðar gagnvart þessu flóttafólki eins og opinberu yfirlýsingarnar vegna Höfðatorgsmálsins sýna. Lögreglan sætti gagnrýni fyrir að gera ekkert gegn tjaldbúðunum á sínum tíma. Hún taldi þær í pólitísku skjóli.