Flýja háskattaríki
Þá segir blaðið að útgjöld í flestum ríkjum með háa skatta vaxi einnig hraðar en tekjur, sem leiði til fjárlagahalla og krafna vinstrisinna um að hækka skatta enn frekar.
Bandaríska skattstofan (IRS) birti föstudaginn 27. mars gögn sem sýna hvernig skattahækkanir í þeim ríkjum Bandaríkjanna sem demókratar stjórna leiða til lægri skatttekna ríkjanna vegna þess að þeir sem fá mestu álögurnar flytja annað. Tekjur ríkisins hækka hins vegar í skattalágum ríkjum.
Kalifornía tapar nettó 11,9 milljörðum dollara, aðallega til Texas, Nevada og Arizona. Önnur ríki sem hafa tapað eru New York (9,9 milljarðar dollara), Illinois (6 milljarðar dollara), Massachusetts (4 milljarðar dollara), New Jersey (2,6 milljarðar dollara), Maryland (1,8 milljarðar dollara) og Minnesota (1,5 milljarðar dollara).
Þessi ríki leggja á þunga stighækkandi tekjuskatta sem bitna harkalega á hátekjufólki, fyrirtækjum og efri millistéttinni. Þó að hæsta skatthlutfall ríkis og sveitarfélaga í New York-borg sé 14,8% greiða einstaklingar sem þéna yfir 215.400 dollara íþyngjandi 10,7%. Hæsta skatthlutfall Minnesota, 9,85%, sem tekur gildi við 203.151 dollara, er það hæsta í Miðvesturríkjunum. Þar er einnig lagður 1% skattur á fjárfestingatekjur yfir 1 milljón dollara.
Til samanburðar jukust tekjur allra ríkja án tekjuskatts, að Alaska undanskildu, vegna flutninga milli ríkja, þar á meðal Flórída (20,6 milljarðar dollara), Texas (5,5 milljarðar dollara), Tennessee (2,8 milljarðar dollara) og Nevada (1,5 milljarðar dollara). Önnur ríki þar sem heildartekjur jukust mikið eru Suður-Karólína (4,1 milljarður dollara), Norður-Karólína (3,9 milljarðar dollara) og Arizona (2,8 milljarðar dollara).
Í forystugrein The Wall Street Journal þar sem um þetta er rætti segir að sólskinið sé ekki það eina sem laði til sín nýja skattgreiðendur því að ríkin New Hampshire, Wyoming og Suður-Dakóta, sem hafa engan tekjuskatt, juku einnig tekjur sínar, aðallega frá nágrannaríkjum með hærri skatta. New Hampshire fékk næstum 900 milljónir dollara frá Massachusetts, sem árið 2022 setti 4% aukaskatt á milljónamæringa. Það hækkaði hæsta skatthlutfallið í Massachusetts í 9%.
Þá segir blaðið að útgjöld í flestum ríkjum með háa skatta vaxi einnig hraðar en tekjur, sem leiði til fjárlagahalla og krafna vinstrisinna um að hækka skatta enn frekar. Þessi skatta- og útgjaldaspírall hreki hátekjufólk á brott og grafi þannig undan öflugu atvinnulífi. Í flestum ríkjum með háa skatta fækki störfum utan opinberrar þjónustu, heilbrigðisþjónustu og félagslegrar aðstoðar.
Bent er á fleira en háir skattar leiði til brottflutnings fólks en jafnframt er minnt á að skattar hafi áhrif á efnahagsumhverfið og svigrúm fyrir framtakssama einstaklinga. Stéttarfélög opinberra starfsmanna sem stjórni ríkjum með háa skatta vinni einnig að því að grafa undan gæðum menntunar í opinberum skólum og annarrar þjónustu á sama tíma og sífellt fjárfrekari félagsleg kerfi þrengi að útgjöldum sem stuðli að vernd og öryggi almennings.
Þetta er sláandi lýsing á breytingum sem orðið hafa í Bandaríkjunum á árunum eftir covid-heimsfaraldurinn. Lýsingin á erindi hingað því að nú stjórna hér flokkar sem hafa að leiðarljósi að auka hraðann á skatta- og útgjaldaspíralnum að fordæmi vinstrisinna í öðrum löndum og með sömu afleiðingum