Flokkur á flótta
Við myndun núverandi ríkisstjórnar nýtti Inga Sæland sér þetta gráa svæði til að ganga til samstarfs við Viðreisn um þjóðaratkvæðagreiðslu um „framhald viðræðna“ við ESB.
Þegar Flokkur fólksins var í stjórnarandstöðu flutti Inga Sæland flokksformaður sex sinnum tillögu um að alþingi ályktaði að draga ESB-aðildarumsóknina til baka. Tillagan náði aldrei fram að ganga en með henni vildi Inga sanna hve mikla óbeit hún hefði á öllu sem varðaði frekari tengsl okkar við ESB.
Þessi tillaga og málflutningur annarra um að samskiptin milli Íslands og ESB væru á gráu svæði þrátt fyrir afdráttarlausar ákvarðanir ríkisstjórnarinnar snemma árs 2015 um slit viðræðnanna eru nú meðal þess sem Viðreisn og stækkunardeild ESB nota til að skilgreina Ísland sem ESB-umsóknarríki.
Við myndun núverandi ríkisstjórnar nýtti Inga Sæland sér þetta gráa svæði til að ganga til samstarfs við Viðreisn um þjóðaratkvæðagreiðslu um „framhald viðræðna“ við ESB.
Í grein í Morgunblaðinu í dag leitast Inga Sæland við að rökstyðja þessa kúvendingu sína með því að þjóðin klofni hvorki meira né minna með þjóðaratkvæðagreiðslunni 29. ágúst. Eftir hana birtist meirihluti og eftir það þurfi „ekki lengur að takast á um áreiðanleika skoðanakannana“.
„Flokkur fólksins hefur frá upphafi talað fyrir auknu beinu lýðræði,“ segir Inga sem flutti sex sinnum tillögu um lyktir þessa máls með þingsályktun. Nú sé um einfalda þjóðaratkvæðagreiðslu að ræða og samþykki alþingi ályktun um að til hennar verði gengið sé „framtíð þessa máls í höndum þjóðarinnar“ þar sem það hafi alltaf átt heima.
Morgunblaðið, 23. maí 2026.
Popúlisminn tekur á sig ýmsar myndir eftir því hvort hann er boðaður af ráðherrabekknum eða í von um að komast á hann. Málstaður Flokks fólksins gagnvart ESB-aðildinni er ótrúverðugur.
Inga Sæland telur það móðgun við sig sé hún spurð hvernig hún ætli að greiða atkvæði 29. ágúst 2026. Ráðherrann Inga Sæland er þeirrar skoðunar að viðræður um aðild að ESB séu ekki um aðild að ESB enda sé hún á móti aðild að ESB sem formaður Flokks fólksins. Ef Inga Sæland verður enn ráðherra 29. ágúst 2026 segir hún já til að halda embætti sínu. Falli ríkisstjórnin fyrir 29. ágúst 2026 segir Inga Sæland nei.
Að þessu leyti er þjóðaratkvæðagreiðslan ekki flókin fyrir mennta- og barnamálaráðherrann. Hún er hins vegar flókin að öllu öðru leyti eins og best hefur sannast á því að utanríkisráðuneytinu mistókst að orða spurningu ríkisstjórnarinnar á viðunandi hátt. Hún er líka flókin vegna þess að ríkisstjórnin er ósammála um það sem við tekur, hvort sem utanríkisráðherra fær opna viðræðuumboðið eða ekki.
Í stað þess að tala skýrt fyrir þeim málstað sem lagður verði til grundvallar í viðræðum við ESB hafa ráðherrarnir sem mynda forystuteymi Samfylkingarinnar, Kristrún Frostadóttir og Jóhann Páll Jóhannsson, boðað að leggi utanríkisráðherra fyrir þau viðræðuniðurstöðu gagnvart ESB sem þeim sé ekki að skapi verði hún ekki lögð fyrir þjóðina. Inga Sæland mun örugglega skjóta sér á bak við þessi nýju leiktjöld sem ætlað er að blekkja þjóðina til stuðnings við já-ið 29. ágúst. Vandi þeirra sem kynna þessa nýju vendingu í upplýsingafölsun stjórnarherranna er gagnsæi blekkingarinnar.