Delluyfirlýsingar Frosta
Frosti Sigurjónsson ætti að lesa sér til um málefni áður en hann ber utanríkisráðherra röngum sökum, aðeins til að skemmta skrattanum.
Delluyfirlýsingar sem gefnar eru til heimabrúks um eitthvað sem er á döfinni hverju sinni skipta almennt engu máli. Yfirlýsingar sem gefnar eru um málefni sem snerta samskipti okkar við aðrar þjóðir eða vegna aðildar okkar að alþjóðlegu samstarfi eru vegnar og metnar af öðrum. Þær hafa áhrif á orðspor þess sem yfirlýsingarnar gefur, hvort hann sé marktækur eða ekki.
Á DV var miðvikudaginn 2. október sagt frá samtali sem Frosti Logason átti á hlaðvarpi sínu við Frosta Sigurjónsson, frumkvöðul og fyrrverandi þingmann Framsóknarflokksins. Samkvæmt endursögninni ber þingmaðurinn fyrrverandi Þórdísi Kolbrúnu Reykfjörð Gylfadóttur utanríkisráðherra mjög þungum sökum af því hún vinni gegn hlutleysi landsins (!) og gangi erinda NATO með því að standa með Úkraínu í stríðinu við Rússa og loka sendiráði Íslands í Moskvu. „Ég held að það eina sem hún fær út úr þessu sé að við fáum númeraða eldflaug á okkur, kjarnorkuflaug sko.“
Það var hárrétt ákvörðun hjá utanríkisráðherra að loka sendiráði Íslands í Moskvu. Sendiherrann, Árni Þór Sigurðsson, hafði að eigin ósk flust til Kaupmannahafnar. Tengslin við rússnesk stjórnvöld voru á ís og óttast var um öryggi þeirra sem störfuðu í sendiráðinu. Rússnesk stjórnvöld leggja sig fram um að gera vestrænum sendimönnum í Moskvu lífið eins erfitt og verða má.
Þá gerði lokunin íslenskum yfirvöldum kleift að krefjast brottflutnings rússneskra sendiráðsmanna héðan en fjöldi þeirra nálgaðist 30 og sendiherrann birti ögranir í garð utanríkisráðherra og sendi lygafréttir héðan til að sverta Íslendinga í augum Rússa og ala á þeirri skoðun að Íslendingar væru í hópi óvina þeirra. Gott ef hann hótaði ekki eins og Frosti með kjarnaflaug.
Frosti Sigurjónsson (mbl.is).
Á tíma Sovétstjórnarinnar sögðu talsmenn hennar hér oft að gerðu íslensk stjórnvöld þetta eða hitt fengjum við kjarnorkuflaug í hausinn. Orð Frosta sýna að þessi boðskapur hefur erfst til talsmanna Pútins og stuðningsmanna hans í Úkraínustríðinu. Frosti er að vísu enn orðljótari í vörn sinni fyrir Pútin og óvild í garð utanríkisráðherra en kommúnistar, andstæðingar NATO, voru í kalda stríðinu.
Frosti Sigurjónsson gerir líka bókun 35 við EES-samninginn að umræðuefni og segir hana „þyrnir í augum Evrópusambandsins“ sem hafi verið pirrað í 30 ár yfir því að alþingi þurfi að samþykkja öll lög sem hér gilda. Nú vilji utanríkisráðherra breyta þessu og ætli að brjóta EES-samninginn af þjónkun við ESB.
Vitleysan sem sögð er í umræðum um frumvarp utanríkisráðherra um breytingar á EES-lögunum sem alþingi samþykkti 1993 er takmarkalaus. Bókun 35 hefur gilt í rúm 30 ár. Túlkun íslenskra dómstóla á lögunum frá 1993 er ekki í samræmi við bókunina að mati ESA, Eftirlitsstofnunar EFTA. Þeir sem lúta lögsögu íslenskra dómstóla njóta ekki sama réttar og aðrir á EES-svæðinu vegna orðalags í íslenskum lögum. Lagt er til að alþingi breyti lögunum. Þegar það er gert afhjúpa menn vanþekkingu eða skort á lesskilningi á þann veg sem birtist í orðum Frosta Sigurjónssonar. Hann ætti að lesa sér til um málefni áður en hann ber utanríkisráðherra röngum sökum, aðeins til að skemmta skrattanum.