Davíð Oddsson
Með gamansögu á réttu augnabliki tókst Davíð oft að beina umræðum um vandleyst mál inn á réttar brautir og leiða þau til lykta á farsælan hátt hvort sem var á fámennum eða fjölmennum fundum.
Með Davíð Oddssyni hverfur góður vinur og mikill leiðtogi af sjónarsviðinu. Minning hans mun lifa í sögu Íslands og afrek hans í stjórnmálum. Hugurinn er hjá ástvinum hans.
Margar skýringar eru til á því hvað gerir einstakling að farsælum forystumanni í stjórnmálum. Ef ég á að velja eitt orð til að lýsa því sem gerði mig að eindregnum stuðningsmanni Davíðs og samstarfsmanni um langt árabil er það orðið réttsýni.
Í orðabókinni er réttsýni skýrð á þennan veg: það að vera sanngjarn. Þá eru nefnd skyld orð og má þar nefna: hreinlyndi, grandvarleika, ráðvendni, falsleysi, réttlætiskennd og skilvísi.
Allt þetta lýsir Davíð Oddssyni eins og ég kynntist honum. Hann fór aldrei leynt með skoðanir sínar á mönnum eða málefnum og sagði það sem honum bjó í brjósti án tillits til þess hvort hann teldi það falla öllum í geð. Orðfimi hans var mikil.
Með gamansögu á réttu augnabliki tókst Davíð oft að beina umræðum um vandleyst mál inn á réttar brautir og leiða þau til lykta á farsælan hátt hvort sem var á fámennum eða fjölmennum fundum.
Davíð sagði skilið við stjórnmálin í september 2005 og 13. október 2005 setti hann í síðasta sinn landsfund Sjálfstæðisflokksins en hann var kjörinn til formennskunnar snemma árs 1991, sama ár og hann settist á þing og myndaði síðan ríkisstjórn 30. apríl.
Þegar lesið er um lokadaga Davíðs í stjórnmálunum sést af hve mikilli heift var að honum sótt af Baugsmiðlunum svonefndu og í setningarræðu landsfundarins vék hann að Samfylkingunni og sagði að sumir þingmenn hennar virtust naumast líta á hana lengur sem flokk „en fremur sem tiltölulega léttvægt dótturfélag auðhrings“. Samfylkingin hefði „gefist upp á því að hafa nokkra sannfæringu eða stefnu“. Í staðinn legði flokkurinn „nú áherslu á svo kölluð umræðustjórnmál“.
Það sveið undan þessum pólitísku höggum.
Stjórnarhættir Davíðs einkenndust af reglufestu og virðingu fyrir hefðum og reisn. Hann var glöggur lögfræðingur og nýtti lögfræðina til að leiða mál til lykta og áttaði sig á valdmörkum. Hann sýndi sanngirni og dómgreind í embættisverkum. Í tíð hans sem forsætisráðherra voru stjórnsýslulög og upplýsingalög samþykkt, lög sem veita stjórnmálamönnum mikið aðhald um leið og þau sýna hvernig leysa á úr opinberum álitaefnum án ofríkis. Davíð fylgdi málum oft fram af festu en skynjaði jafnframt þegar hann hafði nýtt sér pólitíska svigrúmið og lagaði niðurstöðuna að því.
Þetta voru líflegir og glaðværir alvörutímar þar sem miklum árangri var náð.
Það var því oft stormasamt í kringum Davíð en hann vitnaði gjarnan í Hannes Hafstein og fór með kvæði hans Storm sem hefst á þennan veg:
Ég elska þig stormur, sem geisar um grund
og gleðiþyt vekur í blaðstyrkum lund,
en gráfeysknu kvistina bugar og brýtur
og bjarkirnar treystir, um leið og þú þýtur.