Byggð með byggð - ekki Brussel
Nú á tímum er brýnt að árétta stefnu undir slagorðinu byggð með byggð. Enginn flokkur getur tileinkað sér þetta slagorð betur en Sjálfstæðisflokkurinn og fylgt því fram.
Þegar litið er á úrslit byggðakosninganna og styrk Sjálfstæðisflokksins um land allt birtist augljósa skýringin á því hvers vegna landsfundir flokksins eru fjölmennustu og öflugustu stjórnmálahátíðir þjóðarinnar. Enginn annar flokkur kemst í hálfkvisti við Sjálfstæðisflokkinn í þessu tilliti.
Kjörtímabili sveitarstjórnanna sem nú er hefst lýkur árið 2030 þegar þess verður minnst að 1100 ár verða liðin frá stofnun alþingis. Ári fyrr, 2029, fagnar Sjálfstæðisflokkurinn aldarafmæli sínu.
Úrslit kosninganna nú minna á að þrátt fyrir háan aldur er Sjálfstæðisflokkurinn síungur. Stefna hans og málstaður laðar alltaf til sín nýtt fólk sem tekur við merkinu og ber það fram til sigurs.
Ásdísi Kristjánsdóttur endurkjörnum bæjarstjóra Kópavogs fagnað á sigurhátíð sjálfstæðismanna 16. maí 2026 (mynd:mbl.is/Anton Brink).
Á það vorum við ánægjulega minnt í kosningunum 16. maí 2026.
Sjálfstæðisflokkurinn hitti á sínum tíma í mark með því að tala til þjóðarinnar með slagorðinu stétt með stétt. Nú á tímum er ekki síður brýnt að árétta stefnu undir slagorðinu byggð með byggð. Enginn flokkur getur tileinkað sér þetta slagorð betur en Sjálfstæðisflokkurinn og fylgt því fram.
Það er brýnt að árétta þetta hlutverk flokksins nú þegar næsta stórverkefni þjóðarinnar í heild á stjórnmálavettvangi er að koma í veg fyrir áform stjórnarflokkanna um að leiða Ísland skref fyrir skref inn í Evrópusambandið (ESB).
Sjálfstæðisflokkurinn hefur markað sér skýra stefnu gegn aðild að ESB. Hvað eftir annað hafa atkvæði fallið á þann veg á landsfundum flokksins. Samþykktir hans um þetta efni leiddu til þess fyrir 10 árum að stjórnmálaflokkurinn Viðreisn var stofnaður um það sérhagsmunamál að ganga til aðlögunarviðræðna við ESB.
Viðreisn kom þessu baráttumáli sínu í sáttmála ríkisstjórnar Kristrúnar Frostadóttur með stuðningi þingflokka Samfylkingarinnar og Flokks fólksins. Ríkisstjórnin ákvað skömmu eftir áramót að hefja ESB-átök á vettvangi alþingis með tillögu um þjóðaratkvæðagreiðslu 29. ágúst 2026.
Þetta var einkennileg ákvörðun í ljósi sveitarstjórnarkosninganna 16. maí. Hún var hins vegar tekin í takt við ofdrambið sem einkennt hefur stjórnarhætti forystukvenna ríkisstjórnarinnar og birtist til dæmis í beitingu þingforseta á kjarnorkuákvæðinu til að þagga niður í stjórnarandstöðunni á alþingi 14. júlí 2025. Nú átti að valta yfir sjálfstæðismenn í sveitarstjórnarkosningum.
Ákvörðunin um þetta reyndist álíka misráðin og afskipti Kristrúnar Frostadóttur af sveitarstjórnarkosningunum. Fylgi sjálfstæðismanna jókst þar sem Kristrún lét helst að sér kveða. Viðreisn náði sér hvergi á strik í kosningunum og Flokkur fólksins hvarf af vettvangi sveitarstjórna og verður að engu, fari fram sem horfir.
Vissulega er unnt að benda á einstök mál í Reykjavík til að skýra brottvísun Samfylkingarinnar úr ráðhúsinu: kortanotkun fráfarandi borgarstjóra, tilvist Suðurlandsbrautar eða smíðakofa í vesturbænum. Stóru málin segja hins vegar raunverulegu söguna: Ríkisstjórnin er þar á rangri braut. Hana skortir algjörlega tenginguna við það sem er að baki slagorðinu byggð með byggð. Brussel fellur ekki undir það.