Stríð hafið gegn Íran
Nýr kafli átaka í Mið-Austurlöndum, púðurtunnu heimsins, er hafinn. Nýr kafli í þeim bútasaumi átaka sem æ fleiri kalla þriðju heimsstyrjöldina.
Þegar birti í Mið-Austurlöndum að morgni laugardagsins 28. febrúar gerðu ísraelskar þotur loftárásir á skotmörk í Íran. Þetta var forvarnaraðgerð að sögn varnarmálaráðherra Ísraels. Um svipað leyti gerði Bandaríkjaher loftárásir á skotmörk í Íran.
Í The New York Times sagði að í fyrstu árásarbylgjunni væri markmiðið að fella eins marga af æðstu mönnum Írans og kostur væri. Hafði blaðið þetta eftir þremur heimildarmönnum með aðgang að trúnaðargögnum Ísraela.
Í júní 2025 kom til 12 daga átaka milli Írana, Ísraela og Bandaríkjamanna. Þá var skipst á loftárásum milli Ísraels og Írans en Bandaríkjamenn sendu langdrægar sprengjuþotur til að eyðileggja kjarnorkumannvirki í Íran. Þóttu átökin niðurlægjandi fyrir Írani.
Nú er svar Írana mun víðtækara en í júní og fréttir berast af flugskeytaárásum þeirra á herstöðvar Bandaríkjanna í Barhein, Kúveit, Katar og víðar við Persaflóa. Í Jerúsalem heyrast sprengjuhvellir sem benda til þess að þar sé flugskeytum frá Íran grandað í háloftunum.
Undanfari átakanna nú er mikil hervæðing Bandaríkjamanna umhverfis Íran samhliða viðræðum fulltrúa ríkjanna tveggja um kjarnorkuvæðingu Írans. Það slitnaði upp úr þessum viðræðum fimmtudaginn 26. febrúar. Báðir aðilar voru enn langt frá samkomulagi. Íranir höfnuðu hugmynd um að flytja úranbirgðir til útlanda. Þeir mótmæltu einnig að hætta auðgun úrans, að taka niður kjarnorkumannvirki sín og að setja varanlega takmörkun á áætlun sína.
Ríkisstjórn Trumps hafði ekki útilokað að slaka á kröfum sínum. Viðræðum um langdrægar eldflaugar Írans mætti fresta, ef réttar kjarnorkutilslakanir fengjust. Íranir gætu jafnvel haldið áfram takmarkaðri innlendri auðgun úrans og þar með leitt leið að eigin sprengju í kjarnaofni ofanjarðar í Teheran eða sem lið í svæðisbundnu samstarfi.
Áður en átökin hófust núna var jafnvel talið að hugsanlega myndi Trump undirrita eitthvað sem styrkti írönsku stjórnina án þess að loka leið hennar að sprengju. Þess í stað tilkynnti Trump í ávarpi til bandarísku þjóðarinnar aðfaranótt laugardagsins 28. febrúar að Bandaríkin hefðu hafið „major military combat operations“ gegn Íran, það er meiriháttar hernaðaraðgerðir.
Ajatollah Ali Khamenei, æðsti klerkur Írans, taldi greinilega að eftirgjöf gagnvart kröfum Bandaríkjamanna væri meiri áhætta fyrir stjórn sína en að verða fyrir árás.
Bandaríkjaher hefur nú stefnt tveimur flugmóðurskipum í nágrenni Írans eða að minnsta kosti 16 herskipum. Þá er talið að alls um 50.000 bandarískir hermenn og 200 flugvélar séu til taks gegn Íran. Hefur Bandaríkjastjórn ekki virkjað meiri herafla síðan 2003 þegar ráðist var inn í Írak.
Í lok desember 2025 sagði Trump að hann myndi standa að annarri árás Bandaríkjanna eða Ísraels ef Íranir hæfu aftur kjarnorkuþróun eða stórfellda framleiðslu á langdrægum eldflaugum. Í janúar varaði hann Ajatollah við því að hefja fjöldadráp á mótmælendum í Íran: „Þú skalt ekki byrja að skjóta því þá byrjum við líka að skjóta.“
Stjórn Írans efndi til blóðbaðs á heimavelli. Að minnsta kosti 32.000 féllu, að sögn Trumps, og Ajatollah ögraði forsetanum, hann hefði enga stjórn í sínu eigin landi. Trump hét stuðningi við mótmælendur stjórnarinnar í Íran og Írsaelar hafa hvað eftir annað hvatt til uppreisnar í Íran.
Nýr kafli átaka í Mið-Austurlöndum, púðurtunnu heimsins, er hafinn. Nýr kafli í þeim bútasaumi átaka sem æ fleiri kalla þriðju heimsstyrjöldina.