Boltinn sendur til Péturs
Borgarstjóri hefði átt að geta þess að flokkur hennar, Samfylkingin, hefði nú í efsta sæti á lista sínum og sem borgarstjóraefni mann sem hefði reynslu af því að stunda fasteignaviðskipti á ríkislóðum.
Það hefur lengi verið liður í kosningabaráttunni í Reykjavík að vinstri flokkarnir í borgarstjórn nýti setu sína í ríkisstjórn til að spila út einhverju verkefni á kostnað skattgreiðenda rétt fyrir kosningar.
Fyrir kosningarnar 2002 hittust þau til dæmis framsóknarmaðurinn Jón Kristjánsson, heilbrigðis- og tryggingamálaráðherra, og samfylkingarkonan Ingibjörg Sólrún Gísladóttir borgarstjóri á Hótel Borg og skrifuðu undir loforð um hjúkrunarheimili eða eitthvað slíkt.
Viku fyrir borgarstjórnarkosningar 2022 rituðu þau Katrín Jakobsdóttir forsætisráðherra (VG), Ásmundur Einar Daðason íþróttaráðherra (Framsókn) og Dagur B. Eggertsson borgarstjóri (Samfylkingu) undir viljayfirlýsingu um að ríkið og Reykjavíkurborg myndu tryggja fjármögnun þjóðarhallar. Gott ef hún átti ekki að rísa á kjörtímabilinu.
Ragnar Þór Ingólfsson, Heiða Björg Hilmisdóttir og Daði Már Kristófersson ráðskast með ríkislóðir 28. apríl 2026 (mynd:stjórnaráðið.is).
Í gær (28. apríl) kynntu Ragnar Þór Ingólfsson, félags- og húsnæðismálaráðherra (Flokki fólksins), Daði Már Kristófersson, fjármála- og efnahagsráðherra (Viðreisn), og Heiða Björg Hilmisdóttir, borgarstjóri (Samfylkingu), „stórfellda íbúðauppbyggingu á ríkislóðum og í ríkiseignum í Reykjavík,“ eins og sagði í tilkynningu húsnæðismálaráðherrans.
Ragnar Þór sagði að byggðar yrðu 1.200-1.400 nýjar íbúðir á næstu árum á lóðum ríkisins og í húsnæði í eigu ríkisins sem breytt yrði í íbúðir. Taldi hann sig slá Íslandsmet með þessum áformum. Hann stofnaði þar til keppni um fjölda íbúða við þær sem reistar voru í Breiðholti á grundvelli kjarasamninga, júnísamkomulagsins 1964.
Í tilkynningu stjórnarráðsins voru birt ummæli Heiðu Bjargar Hilmisdóttur borgarstjóra sem sagði samningana „sýna hverju við getum áorkað þegar ríki og borg vinna saman af alvöru að húsnæðismálum. ... Þetta samstarf skilar fleiri heimilum, sterkara samfélagi og öflugri húsnæðismarkaði.“
Borgarstjóri hefði átt að geta þess að flokkur hennar, Samfylkingin, hefði nú í efsta sæti á lista sínum og sem borgarstjóraefni mann sem hefði reynslu af því að stunda fasteignaviðskipti á byggingarlandi sem ríkið hefði afsalað sér með samningi við borgina.
Í prófkjöri Samfylkingarinnar fyrr á árinu vöktu stuðningsmenn Heiðu Bjargar rækilega athygli á því að Pétur Marteinsson, keppinautur hennar um fyrsta sætið á framboðslista flokksins, hefði stundað lóðabrask á svonefndum Skerjafjarðarreit sem áður var hluti Reykjavíkurflugvallar. Í færslu á Facebook svaraði Pétur þessum ásökunum og lýsti hvernig hann hefði reynt að byggja ódýrar íbúðir í Reykjavík fyrir ungt fólk og fyrstu kaupendur.
Áformin mistókust en hins vegar tókst Pétri að losna við lóðina án þess að verða fyrir fjárhagslegu tjóni. Ekkert hefur enn verið byggt á þessari gömlu ríkislóð.
Nú er þess að vænta að á lokadögum kosningabaráttunnar í Reykjavík leggi Samfylkingin áherslu á að oddviti hennar hafi dýrmæta reynslu af ráðstöfun byggingarlands á ríkislóðum, einkum í þágu ungs fólks og fyrstu kaupenda. Kynning á þessari reynslu hafi orðið til þess að Pétur Marteinsson sigraði sjálfan borgarstjórann í oddvitaslag Samfylkingarinnar.