„Váleg tíðindi“ segir VG í Reykjavík
Áheyrnarfulltrúi Vinstri grænna í borgarráði bókaði að sex mánaða uppgjör borgarinnar nú væri boðberi „válegra tíðinda“.
Morgunblaðið
birtir frétt í dag (3. sept.) um að Reykjavíkurborg hafi verið rekin með 8.893
milljón króna halla fyrstu sex mánuði ársins 2022. Í tilefni af því hafi meirihlutinn bókað í borgarráði
1. september: „Mikilvægt er að bregðast strax við og vinna að því að stöðva
hallarekstur borgarinnar og mun fjármálahópur borgarinnar vinna að því.“
Borgarfulltrúar Viðreisnar, Framsóknarflokks, Samfylkingar og Pírata myndar meirihluta í borgarstjórn og ber ábyrgð á válegri stöðu í fjármálum Reykjavíkur (mynd: Morgunblaðið/Kristinn Magnússon).
Í fréttinni er bent á að þetta sé talsvert annar tónn en í bókun meirihlutaflokkanna í apríl sl. um mánuði fyrir borgarstjórnarkosningar. Þá var rekstrarniðurstaða ársins 2021 kynnt með þessum orðum „Ársreikningur Reykjavíkur skilar gríðarlega sterkri niðurstöðu við krefjandi aðstæður.“
Áheyrnarfulltrúi Vinstri grænna í borgarráði bókaði að sex mánaða uppgjör borgarinnar nú væri boðberi „válegra tíðinda“ fyrir borgarbúa og starfsmenn borgarinnar.
Sjálfstæðismenn vöktu athygli á þeirri staðreynd að samstæðuskuldir borgarinnar næmu nú 420 milljörðum króna og hækkuðu þær um 13 milljarða fyrstu sex mánuði ársins eða um rúma tvo milljarða á mánuði.
Núverandi borgarsjóri ræðir ekki „váleg tíðindi“. Blásið er á viðvaranir vegna skuldasöfnunar. Skuldadagurinn og uppgjörið er vandamál annarra.