Söguleg fjölmiðlaumbrot
Á ritstjórnarstefnu blaðanna er greinilegur munur þegar litið er til þess hvernig tekið er á viðfangsefnum í ritstjórnardálkum þeirra.
Um þessar mundir eru 17 ár frá því að Jón Ásgeir Jóhannesson keypti Fréttablaðið með leynd af Gunnari Smára Egilssyni. Jón Ásgeir beitti blaðinu í kosningabaráttunni 2003 í þágu Samfylkingarinnar. Þetta var á tíma Borgarnesræðu Ingibjargar Sólrúnar Gísladóttur, þáv. formanns Samfylkingarinnar, þar sem hún sagði kaupsýslumenn skiptast í tvö horn, þá sem styddu Davíð Oddsson og andstæðinga hans.
Ári síðar logaði allt í illdeilum vegna fjölmiðlafrumvarps ríkisstjórnar Davíðs Oddssonar. Efnt var til fjöldamótmæla af hálfu aðstandenda Fréttablaðsins sem ákölluðu Ólaf Ragnar Grímsson, forseta Íslands, sér til hjálpar. Fjölmiðlafrumvarpið rann út í sandinn. Um allt þetta má lesa hér á þessum vefmiðli, bjorn.is, og í bók minni Rosabaugur yfir Íslandi.
Þegar hér voru
gefin út áskriftarblöð blómstraði Morgunblaðið
og bar höfuð og herðar yfir aðra íslenska fjölmiðla. Stofnun fríblaðsins, Fréttablaðsins, var til höfuðs Morgunblaðinu.
Þessa mynd birti Fréttablaðið þegar það sagði frá nýjum eiganda blaðsins, Helga Magnússyni.
Um nokkurt skeið hefur Fréttablaðið verið á sölulista. Á dögunum var síðan skýrt frá því að Helgi Magnússon fjárfestir hefði keypt helmingshlut í Torgi, eiganda Fréttablaðsins. Þar með lauk 17 ára einráðum Jóns Ásgeirs og fjölskyldu hans yfir blaðinu.
Skömmu áður en Helgi keypti þennan eignarhlut í blaðinu og settist í stjórn þess var Davíð Stefánsson sem á sínum tíma var formaður Sambands ungra sjálfstæðismanna ráðinn ritstjóri Fréttablaðsins. Hann hefur ekki áður komið að ritstjórn eða blaðamennsku en hefur reynslu af störfum sem ráðgjafi fyrirtækja, þ. á m. alþjóðlegra.
Hvorki Fréttablaðið né Morgunblaðið styðja stjórnmálaflokka en gæta eins og eðlilegt er hagsmuna eigenda sinna. Á ritstjórnarstefnu blaðanna er greinilegur munur þegar litið er til þess hvernig tekið er á viðfangsefnum í ritstjórnardálkum þeirra.
Á Fréttablaðinu er hvatt til frjálsra viðskipta og lýst eindregnum stuðningi við EES-aðildina án þess að fyllast ótta vegna þriðja orkupakkans. Þá sætir framganga Miðflokksins og þingmanna hans harðri gagnrýni.
Á Morgunblaðinu er lýst efasemdum um frjáls viðskipti eins og þau þróast með EES-samningnum og hart barist gegn þriðja orkupakkanum. Þá sætir framganga Sjálfstæðisflokksins og þingmanna hans harðri gagnrýni.
Þetta má kalla sögulega kúvendingu á íslenskum fjölmiðlavettvangi og forvitnilegt verður að sjá til hvers hún leiðir.