Þrjár sögulegar ljósmyndir -70 afmælis Snorrahátíðar minnst
Á morgun verður þess minnst í Reykholti í Borgarfirði að 70 ár eru liðin frá því að Norðmenn afhentu þar að gjöf styttu af Snorra Sturlusyni, hefst athöfnin klukkan 14.00.
Myndin hér fyrir ofan er tekin á þaki prestsbústaðarins í Reykholti og sér yfir hluta mannfjöldans sem tók þátt í Snorrahátíðinni í júlí 1947.
Hér sitja í fremstu röð Sveinn Björnsson, forseti Íslands, og Ólafur, krónprins Noregs.
Fyrir aftan forseta Íslands og krónprinsinn sátu ráðherrar og fleiri fyrirmenn auk fylgdarmanna krónprinsins.
Snorrastofa í Reykholti býður til afmælishátíðar laugardaginn 15. júlí 2017 kl 14 í Reykholti – hér er kynning hennar á dagskránni sem hefst við Snorrastyttu framan við gamla héraðsskólahúsið:
- Reykholtsstaður heilsar
– Sr. Geir Waage - Setning hátíðar
– Ólafur Ragnar Grímsson fyrrv. forseti Íslands - Cecilie Landsverk sendiherra Noregs ávarpar gesti
- Foreningen Snorres venner
– Kim F. Lingjærde formaður - Saga Snorrastyttu – styttan í vitund tveggja þjóða
– Óskar Guðmundsson - Ávarp
– Björn Bjarnason formaður stjórnar Snorrastofu - Sögusýning opnuð í Reykholtsskóla, Snorrahátíðin 1947 í lifandi myndum – og sjötugur hljóðheimur.
– Bergur Þorgeirsson forstöðumaður Snorrastofu
Reykholtskórinn syngur norsk og íslensk ættjarðarlög undir stjórn Viðars Guðmundssonar / Lúðraþytur í höndum Baldvins Oddssonar og Odds Björnssonar / Veitingar í sölutjaldi frá kl. 12:30.
Í kynningu Snorrastofu segir:
„Fullyrða má að einhver merkasti viðburður í sögu héraðsins á seinni tímum hafi verið afhending Snorrastyttunnar í júlímánuði 1947 – en þá var haldin fjölmennasta þjóðhátíð í sögu héraðsins. Hátíðarhöldin 1947 voru í undirbúningi í áratugi – og var ótrúlega mikið við haft, þjóðhöfðingjar og ríkisstjórnir Íslands og Noregs tóku þátt í hátíðarhöldunum og talið er að á milli 10 og 14 þúsund manns hafi komið í Reykholt til að taka þátt í hátíðinni sem markaði djúp spor í menningarvitund þjóðarinnar. Nú þegar 70 ár eru liðin frá því að styttan af Snorra Sturlusyni eftir norska myndhöggvarann Gustav Vigeland var afhjúpuð við fjölmenna og virðulega athöfn, í júlímánuði 1947 er því verðugt tilefni til afmælishátíðar – og sögusýningar.
Viðburðirnir 1947 fóru fram undir styrkri stjórn Snorranefnda – þeirri i Noregi þar sem Ólafur krónprins var heiðursforseti og íslensku Snorranefndinni með formönnum flestra stjórnmálaflokkanna. Stór hópur Norðmanna kom til landsins af þessu tilefni; herskip og farþegaskip – leiðtogar úr norsku þjóðlífi og ástríðufullir aðdáendur Snorra Sturlusonar.
Á 70 árum hefur íslenskt þjóðfélag gjörbreyst – og það er einkar fróðlegt að kynna nútímafólki aðstæður og málafylgju frá þeim tíma sem styttan af Snorra Sturlusyni lagði af stað útí heiminn og þartil henni var komið á stöpul. En sjálf hátíðin var ekki síður eftirminnileg – og þótti ævintýri hversu vel Borgfirðingum tókst að sviðsetja hana á fögrum júlídegi árið 1947. Sjötíu árum síðar rifjum við upp þá sögu á sýningu – í máli og myndum í gamla héraðsskólanum.“