Farage segir Timmermans „oftækismann“
Leiðtogarnir sátu árangurslaust yfir þessari tillögu tímunum saman. Mörgum var misboðið vegna tilraunarinnar til að setja sér afarkosti.
Í dag (þriðjudag 2. júlí) klukkan 09.00 að íslenskum tíma hófst þriðji formlegi fundur leiðtogaráðs ESB um það hverjir eigi að skipa æðstu embætti innan Evrópusambandsins næstu fjögur ár. Í Norðurlandablöðum nota fréttaskýrendur orðið ragnarök til að lýsa ástandinu innan leiðtogaráðsins.
Nokkrir stjórnarleiðtogar ESB-ríkja sátu leiðtogafund 20-ríkjanna í Osaka fyrir helgi og á fundi ESB-leiðtogaráðsins sunnudaginn 30. júní kynntu þeir það sem kallað er Osaka-málamiðlunin. Þar var gert ráð fyrir að hollenski jafnaðarmaðurinn Frans Timmermans yrði forseti framkvæmdastjórnarinnar en þýski mið-hægrimaðurinn Manfred Weber yrði forseti ESB-þingsins.
Leiðtogarnir sátu árangurslaust yfir þessari tillögu tímunum saman. Mörgum var misboðið vegna tilraunarinnar til að setja sér afarkosti. Aðrir snerust gegn tillögunni af pólitískum ástæðum.
Frans Timmermans.
Angela Merkel Þýskalandskanslari var harðlega gagnrýnd á fundi EPP-þingflokksins fyrir utan að sæta harðri gagnrýni á heimavelli fyrir að hverfa frá stuðningi við Weber, frambjóðanda stærsta þingflokksins, EPP.
ESB-þingið var sett í Strassborg morgun. Þar sýndi breski Brexit-flokkurinn undir forystu Nigels Farage þinginu og ESB óvirðingu með því að snúa baki í þingheim þegar Óðurinn til gleðinnar eftir Beethoven, þjóðsöngur Evrópu, var leikinn.
Brexit-flokkurinn á alls 29 ESB-þingmenn, jafnmarga og kristilegi flokkur Angelu Merkel. Fyrir framan þinghúsið sagði Nigel Farage við blaðamenn: „Við erum stærsti flokkurinn í Evrópu, dágott, er það ekki?“
Farage sagði hiklaust skoðun sína á leiðtogakjörinu með árás á Frans Timmermans:
„Rætt er um Frans Timmermans sem arftaka Jean-Claudes Junckers. Hann er ofstækismaður. Hann vill mylja þjóðríkið, hann vill Bandaríki Evrópu. Að mínu áliti er hann stórhættulegur maður og veit að mjög er þrýst á Thereseu May að styðja hann, mér finnst raunar að forsætisráðherrann eigi ekki að greiða atkvæði þar sem við erum á útleið.“
Emmanuel Macron Frakklandsforseti hefur látið orð falla um það að forystuleysi ESB skaði sambandipð út á við og komi sér ákaflega illa á tímum alþjóðlegrar spennu í viðskiptum og efnahagsmálum.