Málþóf um misskilning
Í frétt mbl.is segir að umræðurnar snúist um bókun 35 við EES-samninginn. Það var mikill misskilningur hjá utanríkisráðherra og ráðuneyti hans að kenna þetta frumvarp við bókun 35.
Í frétt á mbl.is í dag, sunnudaginn 15. júní, segir að Sigmundur Davíð Gunnlaugsson formaður Miðflokksins hafi verið síðastur á mælendaskrá þingfundar sem lauk um klukkan 02.00 í nótt. Þá segir að þingfundur sé boðaður klukkan 13.00 í dag og fyrst á mælendaskrá sé Ingibjörg Davíðsdóttir þingmaður Miðflokksins sem ætli að halda 43. ræðu sína um málið.
Á dagskrá er breytingin á EES-lögunum frá 1993 vegna túlkunar dómstóla á 3. gr. laganna sem hefur skert réttindi Íslendinga sem EES-samningurinn veitir þeim.
Í frétt mbl.is segir að umræðurnar snúist um bókun 35 við EES-samninginn. Það var mikill misskilningur hjá utanríkisráðherra og ráðuneyti hans að kenna þetta frumvarp við bókun 35. Það snýst alls ekki um breytingu á bókuninni. Íslenska ríkið gerðist aðili að henni fyrir rúmum 30 árum. Hún stendur óhögguð hvað sem þessu frumvarpi líður.
Frumvarpið snýr að EES-lögunum sem alþingi samþykkti í ársbyrjun 1993 og ætlunin er nú að breyta til að bæta réttarstöðu íslenskra borgara. Alþingi getur hvenær sem er afturkallað breytinguna sem nú er á döfinni og verður samþykkt af miklum meirihluta þingmanna þegar kemur til atkvæðagreiðslu um málið.
Skjáskotið sýnir Þórunni Sveinbjarnardóttur þingforseta við stjórn málþófsins um breytingu á EES-lögunum,
Alþingi er ekki að afsala sér neinum rétti til lagasetningar með þessu frumvarpi. Það er rangt að halda því fram. Hér skal viðurkennt að efnið í ræðum þingmanna Miðflokksins hefur farið fyrir ofan garð og neðan hjá mér. Ef til vill snúast þær allar um breytt orðalag á lagagreininni sem ætlunin er að setja inn í EES-lögin og það sé rangt sem segir í fréttum að þingmennirnir telji um brot á stjórnarskránni eða fullveldi þjóðarinnar að ræða.
Á þessi lög verður unnt að láta reyna fyrir íslenskum dómstólum eins og 3. gr. EES-laganna núna og fá úr því skorið hvort lagabreytingin stenst stjórnarskrána eða ekki. Brjóti breytingin gegn stjórnarskránni víkja dómstólar henni einfaldlega til hliðar. Sé breytingin talin rúmast innan stjórnarskrárinnar reynir á efni hennar og hvort réttarstaða íslenskra ríkisborgara samkvæmt EES-samningnum batni.
Þegar öllu er á botninn hvolft hlýtur andstaða miðflokksmanna við þetta mál að vera reist á andstöðu við aðild Íslands að EES-samningnum þótt þeir viðurkenni það ekki. Sú andstaða er nefnilega ávísun á stuðning við aðild Íslands að ESB. Hér og í Noregi er aðildin að EES frábær lausn fyrir þjóðirnar til að njóta kjarnaþáttar ESB-samstarfsins, aðildar að sameiginlega markaðnum, án þess að afsala sér ráðum yfir auðlindum til lands og sjávar.
Ríkisstjórn Kristrúnar Frostadóttur ætlar fyrir lok kjörtímabilsins að láta á það reyna hvort hún fær umboð til að ganga til viðræðna um aðild að ESB. Nú á þessu stigi reyna talsmenn stjórnarstefnunnar að telja fólki trú um að þeir sem andæfa stefnunni séu andvígir því að þetta mál verði borið undir þjóðina. Þetta er lygi eins og svo margt annað sem úr þessum herbúðum kemur. Ríkisstjórnin verður að segja ekki seinna en núna um hvað hún ætlar að spyrja þjóðina. Um þetta ættu miðflokksmenn að ræða en ekki rúmlega 30 ára gamla bókun sem stendur óbreytt þótt þeir flytji 1.000 ræður.