Miðlunartillaga í annað sinn
Morgunblaðið, laugardagur, 4. mars 2023
Efling stéttarfélag sleit viðræðum við Samtök atvinnulífsins (SA) 10. janúar 2023, rúmum mánuði eftir að Vilhjálmur Birgisson, verkalýðsforingi á Akranesi og formaður Starfsgreinasambandsins (SGS), samdi fyrir sitt fólk og tryggði samfellu á milli nýja samningsins og þess gamla sem rann út 1. nóvember 2022.
Nú þegar þrír mánuðir eru frá því að Vilhjálmur samdi og fjórir síðan félagsmenn í SGS fengu greitt samkvæmt nýjum kjarasamningi greiða félagsmenn í stærsta aðildarfélagi SGS, Eflingu, atkvæði um miðlunartillögu sem reist er á samningnum sem Vilhjálmur Birgisson gerði. Eflingarfólk hefur ekki notið sömu hækkunar og aðrir frá 1. nóvember 2022. Hún fæst ekki nema miðlunartillaga setts sáttasemjara sé samþykkt.
Ástráður Haraldsson, settur sáttasemjari (mynd: mbl.is).
Þegar Ástráður Haraldsson, settur sáttasemjari, kynnti miðlunartillögu sína miðvikudaginn 1. mars var það með þeim orðum að hún kæmi í stað miðlunartillögunnar sem Aðalsteinn Leifsson ríkissáttasemjari lagði fram fimmtudaginn 26. janúar og væri eins og hún. Launahækkanir félagsmanna Eflingar yrðu í meginatriðum þær sömu og í samningum aðildarfélaga SGS við SA. Gert væri ráð fyrir fullri afturvirkni til 1. nóvember eins og í þeim samningum.
Þegar á reyndi neitaði Efling að afhenda kjörskrá vegna atkvæðagreiðslu um tillögu Aðalsteins. Héraðsdómur taldi að afhenda bæri skrána en mánudaginn 13. febrúar var landsréttur á öðru máli og sama dag sagði Aðalsteinn sig frá deilunni. Þriðjudaginn 14. febrúar var Ástráður Haraldsson settur sáttasemjari í deilu Eflingar og SA.
Daginn eftir ræddu deiluaðilar saman undir stjórn Ástráðs og fram á sunnudag 19. febrúar þegar hann sagði „of mikið“ bera á milli til að halda viðræðum áfram, að svo stöddu sæi hann ekki ástæðu til að boða til nýs fundar. Hann endurtók þetta laugardaginn 25. febrúar en þá um helgina átti hann þó viðræður við fulltrúa deiluaðila.
Að kvöldi mánudagsins 27. febrúar var að sögn Morgunblaðsins reynt til þrautar að finna viðræðufleti milli Eflingar og SA undir stjórn sáttasemjara. Halldór Benjamín Þorbergsson, framkvæmdastjóri SA, sagði fyrir fundinn að „úrslitastund“ væri upp runnin og Sólveig Anna Jónsdóttir, formaður Eflingar, talaði um að hún mundi „sitja eins lengi og þarf“.
Stefán Ólafsson, fyrrv. prófessor við Háskóla Íslands og ráðgjafi Eflingar, rauf trúnað um þennan fund. Talaði hann niður til fulltrúa SA og sagði samninganefnd Eflingar hafa þurft að bíða hátt í 5 klst eftir því hvort SA „myndi leyfa settum sáttasemjara að leggja fram svokallaða miðlunartillögu“. Fékk prófessorinn ákúrur frá Ástráði í fréttaviðtali þriðjudaginn 28. febrúar.
Miðlunartillaga sáttasemjara lá sem sagt í loftinu í byrjun þessarar viku og var hún kynnt á blaðamannafundi miðvikudaginn 1. mars.
Sólveig Anna Jónsdóttir tók nýju miðlunartillögunni betur en þeirri sem lögð var fram 26. janúar. Hélt hún því ranglega fram að tillaga Aðalsteins hefði verið „ólögleg“ vegna þess að hann hefði ekki haft samráð við deiluaðila. Ummælin endurspegla óvild formanns Eflingar í garð ríkissáttasemjara. Sólveig Anna eirir engum eins og best sannast á ummælum hennar um eigin félagsmenn, sem andmæla henni, eða um forystumenn innan Alþýðusambands Íslands (ASÍ) sem dansa ekki eftir pípu hennar.
Þá lagði Sólveig Anna áherslu á að nýja miðlunartillagan væri „ekki samningur“. Mátti skilja þau orð hennar sem enn eina staðfestinguna á því að hún vill nota kjaradeilur til verkfalla en ekki til samninga.
Þegar Aðalsteinn ríkissáttasemjari lagði fram miðlunartillögu sína 26. janúar 2023 ályktaði miðstjórn ASÍ strax sama dag að traust í garð ríkissáttasemjara hefði skaðast, tillagan væri „ótímabær“. Sáttasemjari hefði hugsanlega „farið út fyrir þær valdheimildir sem embættinu [væru] settar í lögum“. Framganga sáttasemjara væri „atlaga að sjálfstæðum samningsrétti stéttarfélaga“ og var skorað „á ríkissáttasemjara að draga [tillöguna] til baka“. Miðlunartillaga væri „neyðarúrræði“ eftir að „öll önnur úrræði“ hefðu „verið tæmd og neyðarástand skapast“. Auk þess mætti ekki leggja miðlunartillögu fram án náins samráðs við aðila um efni hennar og með að minnsta kosti „þegjandi samþykki beggja aðila“. Hvorugt þessara skilyrða væri uppfyllt.
Þetta er óvenjulega harðorð yfirlýsing. Ef svo harkalega var brotið gegn lögum eins og þarna er sagt er einkennilegt að ekki skuli hafa verið látið reyna á lögmæti sjálfrar tillögunnar fyrir dómstólum þegar deilt var um afhendingu kjörskrárinnar. Tækifæri gafst til að hnýta í tillöguna fyrir þremur dómstólum en var ekki gert.
Nú þegar ný miðlunartillaga hefur verið lögð undir atkvæði heyrist hvorki hósti né stunda frá miðstjórn ASÍ. Væntanlega á að túlka þögnina á þann veg að nú sé tímabært að leggja tillöguna fram þar sem öll önnur úrræði hafi verið tæmd og neyðarástand skapast. Fyrir utan að formskilyrðum um samráð og að minnsta kosti þegjandi samþykki aðila sé fullnægt. Þar með má einnig álykta að forysta ASÍ mæli með samþykkt miðlunartillögunnar til að leysa deiluna.
Mikið er félagslega í húfi fyrir ASÍ. Fyrir verkalýðshreyfinguna snýst þetta um hvort meginreglan um fordæmi samflots við gerð kjarasamninga við SA haldi eða hvort reglan verði að engu vegna neitunarvalds jaðarfélags – þótt fjölmennt sé.
Þrír mánuðir eru nú síðan verkalýðshreyfingin klofnaði í þessari kjaradeilu. Samþykkt miðlunartillögunnar leysir deiluna en óeiningin innan ASÍ er enn óleyst.