Dagbók: september 2002
Mánudagur 30.9.2002
Klukkan 14.00 var ég í klukkustund á Hrafnaþingi hjá Ingva Hrafni Jónssyni á útvarpi Sögu. Klukkan 16.00 fór ég á ársfund Slökkviliðsins á höfuðborgarsvæðinu í Slökkvistöðinni.
Laugardagur 28.9.2002
Fórum akandi frá Akureyri um hádegisbil og komum til Reykjavíkur rúmlega 17.00.
Föstudagur 27.9.2002
Við Rut fórum kl. 20.00 á frumsýningu á Hamlet hjá Leikfélagi Akureyrar og skemmtum okkur vel,
Miðvikudagur 25.9.2002
Flaug kl. 11.00 norður á Akureyri, þar sem 17. landsþing Sambands íslenskra sveitarfélaga hófst klukkan 13.00
Sunnudagur 22.9.2002
Klukkan 10.00 fór ég að fjársafninu, sem staðið hafði um nóttina í girðingu fyrir neðan Kvoslæk og tók þátt í að reka féð í hólfið við Fljótshlíðarrétt og síðan í réttina. Var ég þar og aðstoðaði eftir mætti við að draga fé í dilka fram yfir 12.00. Höfðu menn á orði, að eitthvað af fé hefði greinilega sloppið frá okkur gangnamönnunum í þokunni.
Laugardagur 21.9.2002
Klukkan 07.30 sóttu nágrannar mínir í Fljótshlíðinni mig að Kvoslæk og við ókum að Reynifelli, eyðibýli fyrir vestan Þríhyrningin, þar sem hestar biðu okkar. Þaðan héldum við í göngur og fór ég í áttina að Austurdal og smalaði þaðan í hlíðunum fyrir austan Eystri-Rangá í sæmilegri birtu en þegar dró nær Þríhyrningi fórum við inn í niðaþoku og rákum í henni austur fyrir Þríhyrning þar til við komum til byggða fyrir ofan Lambalæk um klukkan 18.00. Var ég kominn heim að Kvoslæk um klukkan 19.00.
Föstudagur 20.9.2002
Klukkan 11.00 var ég með viðtalstíma eins og venjulega á föstudögum, þegar ég er í Reykjavík. Viðtölin hef ég í skrifstofu minni á vegum alþingis og er auðveldast að panta tíma með því að hringja í Rakel í síma 563 0500. Klukkan 16.00 var ég í umræðuþætti á útvarpi Sögu hjá Hallgrími Thorsteinssyni og ræddi fréttir líðandi viku við Katrínu Júlíusdóttur og Pál Kr. Pálsson.
Fimmtudagur 19.9.2002
Klukkan 14.00 hófst borgarstjórnarfundur og stóð hann fram undir klukkan 18.00 - bókun okkar sjálfstæðismanna í borgarráði varð kveikja að umræðum um háa húsaleigu og lóðaskort. Þá ræddum við um framtíð Vatnsmýrarinnar og ráðagerðir R-listans um skipulagsslys á Norðlingaholti.
Miðvikudagur 18.9.2002
Klukkan 16.00 hittist borgarstjórnarflokksfundur sjálfstæðismanna eins og venjulega á miðvikudögum til að bera saman bækur sínar, fara yfir mál á vettvangi nefnda borgarinnar og leggja á ráðin um afstöðu og stefnumörkun.
Þriðjudagur 17.9.2002
Eins og venjulega var fundur í borgarráði klukkan 12.00 og stóð hann að venju um tvær klukkustundir. Á fundinum lögðum við sjálfstæðismenn fram bókun vegna glannalegra ummæla Páls Péturssonar félagsmálaráðherra um leigumarkaðinn.
Mánudagur 16.9.2002
Klukkan 11.00 til 12.00 var ég í viðtalsþætti Arnþrúðar Karlsdóttur´í útvarpi Sögu.
Föstudagur 13.9.2002
Um hádegisbilið var farið í siglingu um höfnina í Höfn í niðaþoku, fórum í land í Austurfjöru og ókum að Horni og skoðuðum hið einstæða bæjarstæði þar, er ógleymanlegt að þokunni létti í kringum bæinn, svo að við sáum Vestrahorn gnæfa yfir hann. Fórum síðan að Hólmi í Laxárdal og fræddi Bjarni Einarsson fornleifafræðingur okkur um blótshúsið þar. Lauk farskólanum síðan í kirkjunni í Bjarnarnesi. Á leiðinni í Fljótshlíðina áttum við Rut stutta viðdvöl í Kvískerjum, því að okkur langaði að hitta bræðurna þar og áttum við ógleymanlega stund með þeim Halfdáni, Helga og Sigurði.
Fimmtudagur 12.9.2002
Um hádegisbilið hélt farskólinn í ferðalag í Skaftafell undir góðri leiðsögn. Við snæddum hádegisverð í Smyrlabjörgum, stöðvuðum við Hala, fengum leiðsögn um þjóðgarðinn í Skaftafelli og skoðuðum kirkjuna að Hofi. Um kvöldið var hátíðarkvöldverður í boði bæjarstjórnar Hornafjarðar og þar kom það í minn hlut að afhenda Lýði Pálssyni, forstöðumanni Byggðasafns Árnessýslu, safnaverðlaunin árið 2002.
Miðvikudagur 11.9.2002
Um kl. 08.30 héldum við úr Fljótshlíðinni austur á Höfn í Hornafirði og komum þangað um hádegisbilið en klukkan 14.00 hófst þar Farskóli safnmanna og var ég þátttakandi í pallborðsumræðum alþingismanna síðdegis. Um kvöldið var eftirminnilegur humarnáttverður.
Þriðjudagur 10.9.2002
Klukkan 09.00 sat ég stjórnarfund Orkuveitu Reykjavíkur, Klukkan 12.00 sat ég fund borgarráðs. Klukkan 14.30 sat ég fund stjórnkerfisnefndar borgarinnar. Síðan ókum við Rut austur í Fljótshlíð og gistum þar að Kvoslæk, þar sem segja má, að við höfum eignast annað heimili.
Mánudagur 9.9.2002
Klukkan 10.30 sótti ég fyrsta stjórnarfund minn í Aflvaka, en það er félag á vegum Reykjavíkurborgar. Í ljós kom á fundinum, að ekki er auðvelt að átta sig á hlutverki Aflvaka, þrátt fyrir samþykktir félagsins
Fimmtudagur 5.9.2002
Klukkan 14.00 hófst borgarstjórnarfundur og stóð til kl. 19.30 með 30 mínútna matarhléi. Við sjálfstæðismenn lögðum fram tillögu okkar um stórlækkun fasteignaskatts á eldri borgara og öryrkja og var hún felld eins og tillaga um lækkun holræsagjalds. Ég var undrandi á því hvernig R-listinn brást við, því að rökin voru þau hjá borgarstjóra, að það mætti ekki mismuna í þágu þessa hóps, þá var sagt að borgarsjóður þyldi ekki tekjutapið og loks að gamla fólkið ætti að selja fasteignir sínar eða skuldsetja til að auka lífeyri sinn.
Miðvikudagur 4.9.2002
Klukkan 14.30 héldum við borgarfulltrúar Sjálfstæðisflokksins blaðamannafund í Ráðhúsinu og kynntum stefnumál, sem við ætlum að flytja í borgarstjórn á haustmánuðum. Fréttamenn spurðu mig einnig um umtalið um að Ingibjörg Sólrún ætti að bjóða sig fram til þings í tilefni að skoðanakönnun á vegum Kreml.is, sem sýndi, að undir leiðsögn ISG mundi Samfylkingin bæta við sig 8% fylgi. Klukkan 16.00 var síðan reglulegur fundur í borgarstjórnarflokknum.
Sunnudagur 1.9.2002
Flogið heim frá Stokkhólmi kl. 14.10 lent kl. 15.30 að íslenskum tíma í fyrsta haustrokinu og rigningu.