Dagbók

Laugardagur, 31. 01. 04. - 31.1.2004 0:00

Klukkan 13.15 hófst kjördæmisþing reykvískra sjálfstæðismanna á Hótel Sögu. Tók ég þar þátt í umræðum um hringamyndun og fleira og flutti ræðu.

Föstudagur, 30. 01.04 - 30.1.2004 0:00

Fór klukkan 20.00 í Þjóðleikhúsið og skemmti mér mjög vel, þegar flutt var dagskrá til tilefni af afmæli heimastjórnarinnar.

Fimmtudagur, 29. 01. 04 - 29.1.2004 0:00

Um klukkan 11.00 komu fjögur frumvörp mín sem dómsmálaráðherra á dagskrá alþingis um sölu fasteiga, lögmenn, fullnustu refsinga og breytingu á umferðarlögum. Lauk umræðu um þau um klukkan 12.45 og var þeim síðan vísað til nefnda.

Miðvikudagur, 28. 01. 04 - 28.1.2004 0:00

Héldum klukkan 13.20 frá Stokkhólmi með Icelandair og lentum 15.15 á Keflavíkurflugvelli.

Þriðjudagur, 27. 01. 04. - 27.1.2004 0:00

Hitti í hádeginu í Folkets hus í Stokkhólmi fréttamenn frá kínverskri sjónvarpsstöð, sem höfðu óskað eftir samtali við mig. Ræddu þeir einkum mannréttindamál - í mikilli vinsemd - en mig grunar að Falun gong reki stöðina.

Fór síðdegis í Utenrikspolitiska Instituttet í Stokkhólmi og hlustaði á Vidar Helgesen aðstoðar-utanríkisráðherra Norðmanna ræða um friðargæslu  Norðurlandanna og sáttastarf Norðmanna á Sri Lanka.

Klukkan 18.30 fórum við Svavar Gestsson sendiherra í bænahús gyðinga í Stokkhólmi og tókum þátt í ógleymanlegri minningarstund um þá, sem nasistar myrtu í helförinni - en þennan dag árið 1945 var Auschwitz lokað.

Mánudagur, 26. 01. 04 - 26.1.2004 0:00

Síðdegis flutti ég ræðu mína á Stokkhólmsráðstefnunni gegn þjóðarmorði, sem haldin var í Folkets hus.

Sunnudagur, 25. 01. 04 - 25.1.2004 0:00

Flaug klukkan 07. 45 til Stokkhólms til að sitja þar alþjóðlega ráðstefnu gegn þjóðarmorði.

Þegar á flugvellinum var augljóst að öryggisgæsla og móttökur yrðu sérstakar. Við Þorsteinn Davíðsson vorum leiddir út í sérstakan bíl við flugvélina og ekið með okkur í VIP-herbergi vallarins. Þar hittum við fulltrúa sænsku ríkisstjórnarinnar, sem var fylgdarmaður allan tíma, bílstjóra og bíl okkur til umráða auk lögreglubíls, sem ók á undan okkur, hvert sem ferðinni var heitið akandi. Hvarvetna á leiðinni til Stokkhólms (tæpir 50 km) voru lögreglumenn við allar aðreinar að hraðbrautinni og lokuðu henni fyrir almennri umferð. Hið sama gilti síðan á leiðum innan Stokkhólms og út á flugvöll við brottför, auk þess sem Grand Hotel, þar sem við bjuggum var innan stórs öryggissvæðis, sem var aðeins opið þeim, sem sýndu sérstök skilríki.

Laugardagur, 24. 01. 04. - 24.1.2004 0:00

Fór klukkan 11.00 á opin kaffifund með Davíð Oddssyni í Valhöll og ritaði frásögn um hann á vefsíðuna mína.

Fimmtudagur, 22. 01. 04 - 22.1.2004 0:00

Flutti klukkan 12 á hádegi erindi í Norræna húsinu á vegum Politicu félags stjórnmálafræðinema, Evrópusamtakanna og Félags stjórnmálafræðinga um Varnarsamstarf Evrópusambandsins og Ísland og tók síðan þátt í pallborðsumræðum.

Þirðjudagur, 20. 01. 04 - 20.1.2004 0:00

Fór klukkan 13.00 í heimsókn í Neyðarlínuna við Skógarhlíð og fræddist um starfsemi hennar af Þórhalli Ólafssyni framkvæmdastjóra og samstarfsmönnum hans.

Mánudagur, 19. 01. 04 - 19.1.2004 0:00

Fór í heimsókn til Guðmundar Sophussonar, sýslumanns í Hafnarfirði klukkan 13.00, skoðaði lögreglustöð og skirfstofur auk þess sem við rituðum undir árangursstjórnunarsamning. Einnig litum við inn í lögreglustöð embættisins í Garðabæ.

Úr Garðabæ fórum við í Kópavog og heimsóttum Þorleif Pálsson sýslumann og lögreglu þar auk þess að rita undir árangursstjórnunarsamning.

Laugardagur, 17. 01. 04 - 17.1.2004 0:00

Fórum klukkan 16.00 í Háskólabíó á velheppnaða afmælishátíð hf. Eimskipafélags Íslands.

Föstudagur, 16. 01. 04 - 16.1.2004 0:00

Klukkan 15.30 tók ég þátt í því að opna nýja vefsíðu Útlendingastofnunar í húsakynnum hennar við Skógarhlíð.

Miðvikudagur, 14. 01. 04. - 14.1.2004 0:00

Íslensku tónlistarverðlaunin afhent í Þjóðleikhúsinu klukkan 20.00 og tók Rut við þeim fyrir hönd Kammersveitar Reykjavíkur fyrir besta hljómdiskinn með Brandenborgarkonsertum Bachs.