Dagbókin

Sunnudagur 31.12.2000

Klukkan 10.30 var ríkisráðsfundur að Bessastöðum. Klukkan 14.00 fórum við Rut í útvarpshúsið, þar sem rithöfundarnir Þorvaldur Þorsteinsson og Ingibjörg Haraldsdóttir fengu verðlaun úr Rithöfundasjóði Ríkisútvarpsins. Um klukkan 15.00 var ég þátttakandi í umræðum í Silfri Egils.

Senda grein

 

Fimmtudagur 28.12.2000

Klukkan 14.00 ritaði ég undir samning við Skýrr um nýtt upplýsingakerfi fyrir framhaldsskólana. Klukkan 16.00 fórum við Rut í Sunnusal Hótels Sögu, þar sem Talnakönnun og Frjáls verslun tilefndu Olgeir Kristjónsson mann ársins í viðskiptalífinu og kom það í minn hlut að afhenda honum viðurkenningarskjalið. Síðan fórum við í Norræna húsið, þar sem Haraldur Sigurðsson jarðfræðingur hafði fengið Ásu Wright verðlaunin. Um kvöldið var ég síðan að Hótel Loftleiðum, þar sem Vala Flosadóttir var tilnefnd íþróttamaður ársins.

Senda grein

 

Þriðjudagur 26.12.2000

Fórum í Þjóðleikhúsið kl. 20.00 og sáum Antigónu eftir Sófókles í nútímalegri uppfærslu Kjartans Ragnarssonar. Er ég sammála þeim, sem veita sýningunni góða dóma.

Senda grein

 

Laugardagur 23.12.2000

Í hádeginu á Þorláksmessu hélt ég þeim sið að borða skötu í Þjóðleikhúskjallaranum með Árna Johnsen og frændum hans úr Vestmannaeyjum.

Senda grein

 

Miðvikudagur 20.12.2000

Fór í Hallgrímskirkju kl. 20.30 og hlustaði á þrjá kóra kvenna syngja undir stjórn Margétar Pálmadóttur fyrir fullu húsi.

Senda grein

 

Sunnudagur 17.12.2000

Klukkan 15.00 fór ég í Ráðhúsið í beina útsendingu á kaffispjalli við Kristján Þorvaldsson, þar sem við fórum yfir víðan völl, en sérstakt fréttaefni þótti það, sem ég sagði um kjaradeiluna við framhaldsskólakennara. Ég fór rakleiðis úr Ráðhúsinu í Langholtskirkju, þar sem jólatónleikar Kammersveitar Reykjavíkur hófust kl. 16.00.

Senda grein

 

Laugardagur 16.12.2000

Fór klukkan 9.30 með Jóhönnu Maríu aðstoðarmanni mínum akandi í Snæfellsbæ, þar sem verið var að opna nýtt og glæsilegt íþróttahús í Ólafsvík. Var kominn heim aftur rétt fyrir kl. 19.00. Færðin var góð þótt Þröstur bílstjóri þyrfti að sýna aðgát vegna hálku og snjóblindu á sunnanverðu Snæfellsnesi.

Senda grein

 

Föstudagur 15.12.2000

Ríkisstjórnin hittist eins og venjulega kl. 9.30 en klukkan 10.30 voru atkvæðagreiðslur í alþingi. Það lá í loftinu að ríkisstjórnin þyrfti að hittast aftur vegna þess að beðið var forúrskurðar Samkeppnisráðs vegna samruna Landsbanka og Útvegsbanka. Var fundurinn klukkan 14.00 og þá kom í ljós, að ráðið hafnaði samrunanum. Alþingi kom saman til fundar klukkan 16.00 og ræddi þennan úrskurð í klukkustund.

Senda grein

 

Fimmtudagur 14.12.2000

Við upphaf fundar þingfundar kl. 10.30 hófu þingmenn vinstri/grænna máls á því, að ég hefði beitt óeðlilegum aðferðum , þegar ég samþykkti tilmæli útvarpsstjóra um hækkun afnotagjalds. Ég hafnaði þessari skoðun með vísan til ákvæða í lögum um Ríkisútvarpið. Klukkan 11.00 var ég í Þjóðmenningarhúsinu, þar sem Rannskóknarráð Íslands og Össur kynntu stóran styrk til Össurar frá ESB.

Senda grein

 

Miðvikudagur 13.12.2000

Flaug heim með beinu flugi frá París, það var ekki unnt að leggja af stað þaðan fyrr en klukkstund eftir að við settumst í vélina vegna þrengsla á evrópska flugstjórnarsvæðinu.

Senda grein

 

Þriðjudagur 12.12.2000

Sat fundinn um menningarmál frá morgni til kvölds en hitti einnig Matsuura forstjóra UNESCO á einkafundi og flutti stutta ræðu.

Senda grein

 

Mánudagur 11.12.2000

Sat ráðstefnu um menningarmál á vegum UNESCO, en í hádeginu baup franski menningarmálaráðherrann fundarmönnum til málsverðar í Quai de Orsay-safninu. Að loknum fundum fór ég í Marais-hverfið, þar sem Erró var að opna sýninguna Erró émail sur acier í Galerie Montenay Giroux (monenaygiroux@claranet.fr) og hitti ég Erró þar og nokkurn hóp gesta. Er sýningin opin til 20. janúar 2001. Sunnudagur 10. desember 2000 Fór snemma dags í 13. hverfi og tók þar þátt í qigong utandyra með hópi fólks, sem hittist reglulega, en gekk síðan um Latínuhverfið, að Notre Dame, til Pompidou-safnsins, um Les Halles og að Lord Byron-götu skammt við Sigurbogann og hitti íslenskar fjölskyldur sem héldu litlu-jólin með börnum sínum. Tók þessi ganga mig rúmar fimm klukkustundir.

Senda grein

 

Laugardagur 9.12.2000

Flaug til Parísar um Kaupmannahöfn á menningarmálaráðherrafund á vegum UNECSO.

Senda grein

 

Fimmtudagur 7.12.2000

Var í umræðum á alþingi um fjögur frumvörp. Á meðan umræður fóru fram utan dagskrár á þingi skrapp ég í ráðuneytið og skrifaði undir samning við bílgreinamenn um umsýslu með sveinsprófum. Fór á tónleika Sinfóníuhljómsveitar Íslands klukkan 19.30

Senda grein

 

Miðvikudagur 6.12.2000

Þingflokkur sjálfstæðismanna kemur alltaf saman klukkan 16.00 á miðvikudögum og í dag lögðum við síðustu hönd á fjárlagafrumvarpið fyrir árið 2001. Er það óvenjulega snemma og hefur afgreiðsla fjárlagafrumvarpsins gengið snurðulaust og eftir áætlun í þinginu.

Senda grein

 

Þriðjudagur 5.12.2000

Klukkan 08.45 var ég í Melaskóla og opnaði nýja heimasíðu Námsgagnastofnunar. Klukkan 12.00 var ég í nýju geymsluhúsi Þjóðminjasafns í Vesturvör í Kópavogi og opnaði nýja heimasíðu safnsins. Klukkan 17.00 vorum við Rut í Kringlunni, þar sem afhjúpuð var mynd eftir Erró.

Senda grein

 

Mánudagur 4.12.2000

Klukkan 09.00 var samráðsfundur ráðherra með fulltrúum Sambands ísl. sveitarfélaga í Borgartúni 6 undir forystu félagsmálaráðherra. Klukkan 11.00 hófst þingfundur og atkvæðagreiðsla um fjárlagafrumvarp 2001 eftir aðra umræðu.

Senda grein

 

Sunnudagur 3.12.2000

Klukkan 17.00 var ég í Laugardalshöll og afhenti verðlaun í hönnunarkeppni 8. 9. 10 bekkjar grunnskólanema.

Senda grein

 

Föstudagur 1.12.2000

Klukkan 13.00 tók ég þátt í fullveldishátíð stúdenta við Háskóla Íslands og var þátttakandi í tveimur pallborðsumræðum, annars vegar um menntamál og hins vegar um menningarmál. Síðdegis fór ég í JL-húsið við Hringbraut, þar sem Myndlistarskólinn í Reykjavík, Alliance Française og Reykjavíkurakademían höfðu opið hús. Þá fórum við Rut í Gerðarsafn þar sem Búnaðarbankinn var að opna þriðju myndlistarsýninguna í tilefni af 70 ára afmæli sínu, Fullveldi, með listaverkum ungs fólks.

Senda grein

 

Dagbókin