Nöldur að fréttnæmum mótmælum
Í nágrenni Höfða voru fánastengur fyrirtækja nýttar til að láta í ljós skoðun á skoðunum varaforsetans sem hann hreyfði hvergi í samtölum við neinn, megi marka frásagnir fjölmiðla.
Nokkra undrun vekur þegar einstaklingar eða hópar nota komu erlendra manna til landsins í því skyni að vekja á sér athygli því að sjaldan verða uppákomur hér til annars en að skapa umræður á heimavelli.
Þetta kemur í hugann þegar litið er til sjö klukkustunda sem Mike Pence, varaforseti Bandaríkjanna, dvaldist hér miðvikudaginn 4. september. Að minnsta kosti 11 samtök stóðu fyrir fámennri mótmælaaðgerð á Austurvelli í sama mund og varaforsetanum var ekið úr Höfða til Keflavíkurflugvallar.
Í fréttatíma ríkisútvarpsins klukkan 18.00 var gert jafnmikið með þennan fund á Austurvelli og viðburði sem snertu viðræður varaforsetans við fulltrúa íslenskra stjórnvalda. Bein útsending var frá Austurvelli eins og frá Höfða. Í aðdraganda komu varaforsetans lét fréttastofan þess yfirleitt getið að efnt yrði til mótmæla vegna hans og hverjir kæmu þar við sögu.
Fyrir þá sem ekki átta sig á að unnt er að mótmæla með fatavali eða armböndum var á það bent á Facebook að flokka mætti klæðnað íslensku forsetafrúarinnar undir mótmæli. Í nágrenni Höfða voru fánastengur fyrirtækja nýttar til að láta í ljós skoðun á skoðunum varaforsetans sem hann hreyfði hvergi í samtölum við neinn, megi marka frásagnir fjölmiðla.
Frá aldaöðli hafa menn mótmælt einu eða öðru með táknum og hátterni sem innvígðir skilja betur en þeir sem líta á málin frá almennum sjónarhóli. Þetta gerist enn eins og sannaðist við komu Pence.
Þarna leitast Guðni Th. Jóhannesson, forseti Íslands, og Mike Pence, varaforseti Bandaríkjanna, við að endurvekja minningu um fund Mikhaíls Gorbatsjovs og Ronalds Reagans í Höfða í október 1986.
Í aðdraganda heimsóknarinnar skrifaði Helga Vala Helgadóttir, þingmaður Samfylkingarinnar og formaður stjórnskipunar- og eftirlitsnefndar alþingis, Pence opið bréf í Morgunblaðinu (31. ágúst). Tók hún Pence þar á beinið eins og hún gerði við Piu Kjærsgaard, þáv. forseta danska þingsins, þegar hún var gestur alþingis í fyrra í tilefni af 100 ára fullveldisafmælinu. Helga Vala laumaðist út af þingfundi á Þingvöllum þegar danski þingforsetinn flutti hátíðarræðu.
Í vetur kom hingað breskur blaðamaður og rithöfundur, Douglas Murray, í tilefni útgáfu íslenskrar þýðingar á bók hans, Dauði Evrópu. Þá sá Viðar Þorsteinsson, framkvæmdastjóri Eflingar-stéttarfélags, tilefni til að skrifa forstjóra Hörpu bréf og krefjast þess að Murray fengi ekki að tala í einum sal hússins, Kaldalóni.
Að sjálfsögðu tíðkast í öðrum löndum að hópar eða einstaklingar fara í mótmælagírinn vegna komu útlendinga. Almennt þykir slíkt þó ekki fréttnæmt nema verulegur kraftur sé í mótmælendum. Hér í fréttaleysinu verður nöldur einkennilega oft að fréttnæmum mótmælum.