Myrk RÚV-frétt um þjóðarhöll
Fréttin um þjóðarhöllina er dæmigerð fyrir hvernig tekið er á málum
í Efstaleiti. Í stað þess að upplýst sé hvernig staðið sé að undirbúningi og áætlanagerð
er talað um skort á fjárheimildum.
Viku fyrir borgarstjórnarkosningarnar í vor fóru Katrín Jakobsdóttir forsætisráðherra, Ásmundur Einar Daðason íþróttamálaráðherra og Dagur B. Eggertsson borgarstjóri í Laugardal og rituðu undir yfirlýsingu um að þjóðarhöll fyrir íþróttir risi árið 2025.
Í fréttatíma ríkisútvarpsins þriðjudaginn 20. september sneri Kristín Sigurðardóttir sér til Bjarna Benediktssonar, fjármála- og efnahagsráðherra, og spurði hann um framkvæmd þessarar yfirlýsingar. Í fréttinni sagði:
„Guðmundur Gunnarsson landsliðsþjálfari var myrkur [svo!] í máli í viðtali 16. apríl sl. „Það er eitthvað sem er óskiljanlegt og mér finnst þetta [skortur á þjóðarhöll] þjóðarskömm hvernig þetta er orðið.““
Guðmundur var alls ekki myrkur, það er óskýr, í máli sínu heldur ómyrkur eins og orð hans sýna. Fréttastofan gaf til kynna að Bjarni Benediktsson stæði í vegi fyrir því að eitthvað gerðist, aðeins hundrað milljónir væru eyrnamerktar þjóðarhöllinni í fjárlagafrumvarpi 2023. Fjármálaráðherrann sagði málið ekki stranda á skorti á fjárheimildum.
Á ruv.is í dag (21. sept.) segir:
„Var þessi yfirlýsing undirrituð vitandi það að það fengist ekki fjármagn?
„Ja, nú undirritaði ég ekki þessa yfirlýsingu. Þetta mál er ekki að stranda á neinu fjármagni. Fyrst þarf að ákveða hvað á að byggja, hver ætlar að byggja það, í hvaða hlutföllum á kostnaðarskiptingin að vera milli ríkis og borgar, í hvaða tilgangi verður húsið reist? Verður þetta eingöngu fyrir íþróttir eða á þetta að vera meira fjölnota hús? Hver ætlar að reka húsið?,“ segir Bjarni.“
Ráðherrar og borgarstjóri rituðu undir yfirlýsingu um þjóðarhöll 6. maí 2022 (mynd Reykjavíkurborg).
Þá er fjármálaráðherra spurður hvort það verði fjárheimildir árið 2024! Hann segir „algjörlega út í hött að velta fyrir sér fjárheimildum einhvern tímann í framtíðinni í tengslum við þetta mál. Þetta mál er ekki stranda á skorti á fjárheimildum. Þetta mál er í undirbúningi og hefur tekið of langan tíma vegna þess að það hefur ekki fengist niðurstaða í það hvers konar hús á byggja, hver ætlar að eiga það og hver ætlar að reka það“.
Fréttin um þjóðarhöllina er dæmigerð fyrir hvernig tekið er á málum í Efstaleiti. Í stað þess að upplýst sé hvernig staðið sé að undirbúningi og áætlanagerð er rokið í þann stjórnmálamann sem ekki á hlut að þeim þætti málsins og látið í það skína að málið strandi á honum.
Sé rétt munað talaði Dagur B. Eggertsson borgarstjóri um að hann hefði 2,5 milljarða handbæra til að einhenda sér í smíði þjóðarhallarinnar strax og hann fengi endurnýjað umboð í kosningunum. Hann tapaði að vísu fylgi en situr þó áfram sem borgarstjóri og nú í skjóli flokks Ásmundar Einars Daðasonar, Framsóknarflokksins.
Það er alveg óþarfi að flytja myrkar fréttir um þetta mál til að beina ábyrgðinni á því á herðar annarra en bera hana. Spurningunum sem Bjarni Benediktsson varpaði fram við fréttamann ríkisútvarpsins verður að svara. Skyldi fréttastofan leita þeirra svara?