Flugum frá Helsinki um Stokkhólm til Íslands. Fór á landsleik Íslands og Danmerkur í knattspyrnu klukkan 18.00, því miður unnu Danir, 2:1.

Fórum um hádegisbilið með bát til Tallinn í Eistlandi, hitti eistneska menningarmálaráðherrann, sótti tónleika Radda Evrópu, sigldum til Helsinki um kvöldið og vorum þar um miðnætti.

Flugum um Stokkhólm til Helsinki og vorum þar um kvöldið á tónleikum Radda Evrópu.

Þjóðardagur Íslands á EXPO 2000 frá klukkan 10.00 til klukkan 03.00.

Flugum snemma morguns um Kaupmannahöfn til Hannover og vorum þar um kvöldið í íslenska skálanum.

Klukkan 14.00 var ég á Bifröst í Norðurárdal, þar sem háskólinn var settur og flutti ég ávarp og afhjúpaði nýtt nafn og merki Viðskiptaháskólans á Bifröst, en samvinnuheitið hefur verið fjarlægt úr nafninu.

Klukkan 14.00 renndum við Rut í hlað að Hlíðarenda í Fljótshlíð og gengum þaðan að Nikulásarhúsum í nýjan lund, Nínulaund, sem var formlega vígður á afmælisdegi Nínu Sæmundsson myndhöggvara henni til heiðurs með því meðal annars, að ég afhjúpaði afsteypu af styttu hennar, Ung móðir, í lundinum. Klukkan 20.00 fórum við á tónleika Radda Evrópu í Hallgrímskirkju.

Snemma í sumar hafði verið ákveðið, að þennan dag yrðu ný húsakynni sjónvarpsins formlega opnuð í Efstaleiti með þátttöku minni. Gat ég ekki hlaupið frá því verkefni, þótt þingflokkur sjálfstæðismanna kæmi saman til mikilvægs fundar í Vík í Mýrdal þennan dag. Var athöfnin í Efstaleiti klukkan 17.15 og flutti ég þar ávarp og tók síðan þátt í Kastljósi klukkan 19.30.

Flutti erindi á ráðstefnunni og fjallaði um hlutverk tungumálsins í sjálfsmynd þjóða. Ráðstefnan var haldin í Svarta demantinum, eins og ný bygging við danska landsbókasafnið heitir, einstaklega glæsilegt hús, sem minnti mig á hve mikils virði er fyrir okkur Íslendinga að bæta aðstöðu hér til tónleika- og ráðstefnuhalds. Það er ekki síður mikilvægur liður í að gera þjóðina samkeppnishæfa en framfarir á öðrum sviðum. Flaug heim frá Kaupmannahöfn um kvöldið.

Flaug um hádegisbilið til Kaupmannahafnar á ráðstefnu um norræn menningarmál.

Klukkan 8.00 fór ég á fund, sem Skref fyrir skref skipulagði um nýjar aðferðir við mat á skólastarfi undir merkjum velvildarvogarinnar og flutti ég þar ávarp, þar sem ég andmælti þeim, sem leggja sig fram um að draga dökka mynd af íslenska skólakerfinu.

Klukkan 17.00 var Baldur frumfluttur í Laugardalshöll.

Klukkan 15.00 var nýtt húsnæði Miðstöðvar símenntunar á Suðurnesjum tekið í notkun og fjarkennsla Háskólans á Akureyri í hjúkrunarfræði og rekstrarfræði formlega hafin.

Klukkan 15.00 var athöfn í Nesstofu, þar sem Læknafélag Íslands afhenti ríkinu mikla dánargjöf Jóns Steffensens prófessors til að efla læknaminjasafn. Klukkan 16.00 var athöfn í bókasafni Flensborgarskóla, þar sem ný mannkynssaga frá Nýja bókafélaginu var kynnt og ég opnaði Söguvef, sem er gerður í tengslum við kennslubækurnar. Klukkan 18.45 hófst landsleikur Íslands og Svíþjóðar í knattspyrnu, sem okkar menn sigruðu á glæsilegan hátt, 2:1.

Flaug um Kaupmannahöfn frá Árósum til Keflavíkur og var lentum við klukkan 12.00 á hádegi.

Ráðstefna um háskólamálefni í Árósum.

Flaug um morguninn um Kaupmannahöfn til Árósa.

Á heimleið frá Kirkjubæjarklaustri höfðum við viðdvöl í Brydebúð í Vík í Mýrdal og hittum forsvarsmenn sveitarfélagsins og uppbyggingar á Brydebúð, þar sem vel hefur verið að verki staðið.

í hádeginu hitti ég þá, sem kenna íslensku erlendis, og ræddi við þá um íslenskukennslu innan lands og utan. Lýsti ég þeirri skoðun, að áhugi á íslenskri tungu og menningu eigi aðeins eftir að aukast á komandi árum og huga þurfi vel að mótun stefnu til að koma til móts við þennan vaxandi áhuga. Síðdegis héldum við Rut að Kirkjubæjarklaustri en um kvöldið vorum við þar á fyrstu tónleikum sumartónleikanna, sem Edda Erlendsdóttir píanóleikari hefur staðið fyrir og nú var efnti til í tíunda sinn.

Ók frá Chartres til Charles de Gaulle-flugvallarins, Flugleiðavélin var á réttum tíma eins og á leiðinni út og þjónustan um borð með miklum ágætum að vanda.

Ók frá Corréze til Chartres og skoðaði dómkirkjuna með hinum einstæðu gluggum.

Flaug til Parísar og ók þaðan í Corréze-héraðið.

Snorrastofa opnuð, kom það í minn hlut að þakka Norðmönnum höfðinglega gjöf þeirra. Um kvöldið vorum við Rut gestgjafar í veislu til heiðurs norsku konungshjónunum í nýjum sal Reykholtsskóla.

Fór klukkan 16.00 í Hafnarborg í Hafnarfirði og skoðaði þar einstæða sýningu gamalla franskra ljósmynda frá Íslandi með franska sendiherranum.

Opnaði síðdegis íslenskunámsvefinn Braga við hátíðlega athöfn í Ráðhúsi Reykjavíkur, en hann er samstarfsverkefni Námsflokka Reykjavíkur og Humboldt-háskólans í Berlín.

Fórum í Skálholt og tókum þátt í hátíðardagskrá við upphaf Sumartónleikana þar, sem halda nú upp á 25 ára afmæli sitt og flutti ég ávarp af því tilefni. Snæddum síðan höfðinglegan miðaldakvöldverð í Skálholtsskóla.

Fórum austur fyrir Fjall og heimsóttum skemmtilegar listsýningar á Eyrarbakka og Selfossi auk þess sem við heimsóttum Sögsetrið á Hvolsvelli, sem byggist á Njálssögu.

Fór í Perluna síðdegis og skoðaði sýningu Tedda.

Vorum komin að Alþingishúsinu klukkan 08.00 en þaðan héldu ráðherrar og makar í rútu klukkan 08.15, Nesjavallaleið. Ferðin gekk vel og áðum við þegar komið var að Nesjavöllum og sá yfir spegilslétt Þingvallavatn í morgunsólinni. Fórum ekki utan þjóðvegar síðasta spottann frá Gafningsvegi að Haki en komum þangað um 09.40 og gengum síðan klukkan 10.00 niður Almannagjá á þingpall. Klukkan var rúmlega 17.30 þegar við héldum frá Hakinu og ókum við hina venjulegu Þingvallaleið til baka, því að umferðin var greið, og komum við að þinghúsinu um klukkan 18.30. Var nokkur annar bragur á þessari heimferð en 1994, þegar hún tók óralangan tíma ekki síst vegna þess að rútan var föst inni á hátíðarsvæðinu sjálfu, þar sem ekki var unnt að hreyfa sig vegna gangandi mannfjölda. Nú var öll umferð bönnuð inni á hátíðarsvæðinu sjálfu og skipulag var þannig, að bifreiðum var ekki lagt með þeim hætti við þjóðveginn, að ekki væri unnt að aka fram hjá þeim.

Héldum til Þingvalla klukkan 9.30, fórum Nesjavallaleið samkvæmt akstursleyfi, umferðarþungi kallaði þó alls ekki á að við færum þessa leið og við ókum ekki utan þjóðvegarins á nýrri varaleið frá Grafningsafleggjara að Hakinu. Vegna þessa akstursleyfis máttum við halda aftur til Reykjavíkur fyrir klukkan 17.00 og gerðum við það rúmlega 16.00 og fórum nú utan þjóðvegar vegna þess að einstefna austur var á leiðinni frá Reykjavík.