Klukkan 15.00 opnaði ég yfirlitssýningu á verkum Þórarins B. Þorlákssonar í Listasafni Íslands, einstæða sýningu og komu margir til að skoða hana þennan fyrsta dag hennar.

Klukkan 14.00 var ég í Þjóðmenningarhúsinu og tók þátt í athöfn, sem var haldin í tilefni af því, að Gísli Sigurðsson, umsjónarmaður Lesbókar Morgunblaðsins, var sæmdur verðlaunum Móðurmálssjóðsins, sem var stofnaður í nafni Björns Jónssonar, ritstjóra Ísafoldar. Klukkan 15.30 tók ég þátt í pallborðsumræðum um fjölmenningarþjóðfélag á Íslandi á ráðstefnu, sem Reykjavíkurborg efndi til að Grand hotel. Kom mér á óvart, að Jón Björnsson, embættismaður hjá Reykjavíkurborg, hafði orð á því úr ræðustól að loknu pallborði, þegar hann var að búa sig undir ráðstefnuslit. að ekki hefði verið miklu lofað af þeim, sem við pallborðið sátu og var þetta greinilega sagt í vandlætingartón, án þess að okkur gestum hans á ráðstefnunni gæfist færi á að gera athugasemd. Man ég ekki eftir slíkri framgöngu af hálfu gestgjafa áður og vissi raunar ekki að á mig hefði verið kallað að borðinu til að gefa einhver loforð eða gangast undir skuldbindingar.

Klukkan 10 fór ég í Kennaraháskóla Íslands og hitti þar Margrethe Vestager,, menntamálaráðherra Dana, sem ég hafði boðið hingað til lands meðal annars í því skyni að rita undir samstarfssamning um dönsku kennslu hér á landi. Ólafur Proppé, rektor KHÍ, flutti ávarp auk okkar ráðherranna. Síðan skoðuðum við teikningar af nýju húsi við skólann. Við ókum frá KHÍ í fallegu og björtu veðri til Selfoss, þar sem Óli Þ. Guðbjartsson, skólastjóri í Sólvallaskóla, tók á móti okkur og efndi til góðrar athafnar á sal skólans með upplestri á dönsku og söng barnakórs Selfosskirkju. Ég kvaddi ráðherrann á Selfossi að sinni en hún hélt í skoðunarferð til Gullfoss og síðan um Þingvöll til Reykjavíkur, þar sem við hittumst aftur um kvöldið. Síðdegis hélt ég til Keflavíkurflugvallar, þar sem ég tók á móti Völu Flosadóttur, bronsverðlaunahafa í stangarstokki á Ólympíuleikunum í Sydney.

Klukkan 15.40 var umræða utan dagskrár á alþingi að frumkvæði Kolbrúnar Halldórsdóttur, Vinstri-grænum, sem vildi ræða við mig um RÚV. Ekkert nýtt kom fram í þeim umræðum fyrir utan það, að tveir varaþingmenn Framsóknarflokksins, Páll Magnússon og Árni Gunnarsson, tóku til máls og voru jákvæðari í garð breytinga á lögum um RÚV en áður hefur komið frá meðal framsóknarmanna. Klukkan 16.30 var blaðamannafundur í Þjóðarbókhlöðunni, þar sem við Einar Sigurðsson landsbókavörður rituðum undir samning við fulltrúa fyrirtækisins Bell and Howell um aðgang allra Íslendinga að gífurlega miklum rafrænum gagnasöfnum og tímaritum fyrirtækisins.

Hitti í morgunverði Magnús Bjarnason og Pétur Óskarsson í viðskiptaskrifstofu sendiráðs Íslands í NY og Einar Gústavsson frá Ferðamálaráði, sem lýstu fyrir mér umfangi hinnar miklu kynningar, sem Ísland hefði fengið vegna komu Íslendings og Víkingasýningar Smithsonian. Sýndu mér mikið af blaðaúrklippum og löngum greinum auk mynda úr sjónvarpsþáttum. Fór með Magnúsi og Thor H. Thors í New York University, þar sem ég afhenti bóksafni þess Íslendingasögurnar að gjöf. Heimsóttum Museum of Natural History við Central Park West, þar sem Nancy Lynn sýndi okkur, hvernig að því er staðið að setja þar upp víkingasýninguna frá Smithsonian. Finnst mér hún jafnvel glæsilegri þarna en í Washington auk þess sem Ísland er meira áberandi í NY, vegna þess að sýndar eru sérstaklega stórar Íslandsmyndir eftir Pál Stefánsson, ljósmyndara. Við Thor fórum í Columbia University, þar sem ég afhenti Íslendingasögurnar í Butler-bókasafninu. Snæddum hádegisverð í mötuneyti skólans með tveimur íslenskum nemendum: Hauki Jónassyni, sem leggur stund á guðfræði, og Sigríði Björnsdóttur, sem er í Columbia School of Journalism. Fórum síðan með þeim á fund hjá Jonathan R. Cole sem er Provost skólans. Síðdegis var athöfn í Waldorf Astoria hótelinu til að minnast þess, að 1931 vann Nína Sæmundsson myndhöggvari samkeppni um styttu yfir anddyri þessa fræga hótels. Þarna var Ríkey Ríkharðsdóttir frænka Nínu, sem hefur beitt sér fyrir því, að minning hennar væri í heiðri höfð. Ég sagði nokkur orð og einnig Eric Lang hótelstjóri auk þess sem Egill Ólafsson og félagar fluttu tvö lög. Flaug heim um kvöldið.

Hitti Ólaf Jóhann Ólafsson, formann Íslensk ameríska verslunarráðsins, Kristján Ragnarsson, formann American Scandinavian Foundation (AFS) og Magnús Gústafsson, varaformann ASF, á morgunverðarfundi ásamt með Magnúsi Bjarnasyni, viðskiptafulltrúa og ræðismanni. Heimsótti klukkan 10.00 Scandinavian Foundation bygginguna við Park Avenue og skoðaði hana. Fór um hádegisbilið að skipinu Íslendingi við South Street Seaport, hitti Gunnar Marel Eggertsson og nokkra aðra úr áhöfninni. Hlustaði á Egil Ólafsson og félaga syngja á útisviði - kalt var í veðri og fólk var því frekar á gangi en að það næmi staðar til að hlusta, sem dágóður hópur gerði þó, Hitti síðdegis forráðamenn Artec-fyrirtækisins, sem eru að hanna hljómburð í tónlistarhúsið í Reykjavík. Klukkan 20.00 hófust tónleikar Sinfóníuhljómsveitar Íslands í Carnegie Hall, húsið var þéttsetið og tónlistinni var mjög vel tekið og lék SÍ tvö aukalög. Að tónleikum loknum bauð ég hljómsveitinni í stutta móttöku rétt við hótel hennar á Broadway.

Klukkan 13.30 fór ég í þáttinn Silfur Egils með Össuri Skarphéðinssyni, sem sótti fast að mér í menntamálum en hafði ekki kynnt sér þau nema að takmörkuðu leyti , sem ég marka af því, að hann hélt því fram, að ég hefði ekki gert neitt til að stytta nám til stúdentsprófs úr fjórum árum í þrjú. Sérkennilegast þótti mér þó, þegar hann sagði okkur Agli Helgasyni, að við skyldum bara bíða, Samfylkingin færi að ná sér á strik. Taldi ég þetta tal um bið eftir að sigurgangan hæfist væri orðin hlægileg, til dæmis hefðum við síðasta vetur átt að bíða, þar til formaður yrði kjörinn í Samfylkingunni, hann væri nú kominn en ekki hið aukna fylgi. Fór í viðtal við fréttastofu sjónvarps RÚV um prest á Þingvöllum. Flaug til New York klukkan 16.20.

Fagurt veður var á Akureyri og fórum við í gönguferð fyrir hádegi í Lystigarðinn og í Skautahöllina, sem var ánægjulegt að skoða. Flugum til Reykjavíkur uppúr hádeginu í Metro-vél, var það í fyrsta sinn, sem ég fór í slíkt farartæki, og fékk ég snert af innilokunarkennd, áður en lagt var í loftið, en ferðin tók ekki nema rúmar 30 mínútur.

Við Jóhanna María aðstoðarmaður minn flugum til Akureyrar klukkan 14.00 og var blíðviðri og 15 stiga hiti, þegar við lentum þar og hittum Þorstein Gunnarsson, rektor Háskólans á Akureyri, en með honum ókum við í Sólborg, þar sem ég opnaði formlega nýtt húsnæði skólans að viðstöddu margmenni. Um kvöldið tók ég þátt í málefnaþingi SUS á Akureyri og ræddi um Evrópumál.

Síðdegis var ég við hátíðlega setningu item, Informal European Theatre Meeting, sem hófst í Loftkastalanum. Um kvöldið tók ég þátt í umræðum um skólamál í félagsskapnum Round Table með þeim Elnu Katrínu Jónsdóttur, formanni Félags framhaldsskólakennara, og Þorvarði Elíassyni, skólameistara í Verzlunarskóla Íslands.

Síðdegis tók ég þátt í því í Þjóðmenningarhúsinu, þegar fulltrúar Eimskips, Búnaðarbankans og Urðar, Verðandi, Skuldar rituðu undir samning við Viðar Hreinsson um ritun ævisögu Stephans G. Stephanssonar. Er þetta einstakur samningur um 7 milljón króna styrk. Við þetta tækifæri færði ég Herði Sigurgestssyni, fráfarandi forstjóra Eimskips, þakkir fyrir einstakan stuðning hans við menningu og listir í forstjóratíð hans.

Tók þátt í umræðum um stefnuræðu forsætisráðherra um kvöldið, var síðastur ræðumanna Sjálfstæðisflokksins. Eins og venjulega var Svanfríður Jónasdóttir með allt á hornum sér í menntamálunum og Össur Skarphéðinsson er að fikra sig í slíkan málflutning. Annars vakti sérstaka athygli, að talsmenn Samfylkingarinnar minntust ekki einu orði á utanríkismál og sýnir það, hve þau taka nei-úrslitin í Danmörku nærri sér.

Alþingi var sett að lokinni messu í Dómkirkjunni, sem hófst klukkan 13.30. Að lokinni setningarathöfn var gert hlé til þingflokksfunda til klukkan 16.00 þegar gengið var til þess að kjósa forseta og í nefndir.

Fórum klukkan 14.00 á 70 ára afmælishátíð Tónlistarskólans í Reykjavík í Háskólabíói. Var fjölmenni á hátíðinni, sem stóð til klukkan 16.30, og var unga tónlistarfólkinu, sem þar kom fram fagnað innilega.

Klukkan 10.30 var ég í Ráðherrabústaðnum til að skrifa undir samning um vísindamál við Bandaríkin en Madeleine Albright, utanríkisráðherra Bandaríkjanna, gerði það fyrir þeirra hönd og við Halldór Ásgrímsson utanríkisráðherra fyrir Íslands hönd. Síðan var hádegisverður í Þjóðmenningarhúsinu í boði Halldórs til heiðurs Albright. Hún er mjög viðræðugóð og var greinilega mjög ánægð með að heimsækja Ísland, og hún sagði í ræðu, að vinir sínir öfunduðu sig af að vera hér, enda væri Ísland „in“ í Bandaríkjunum og talið meðal „the hottest places in the world today“. Síðdegis flaug ég síðan til Ísafjarðar, þar sem ég tók þátt í hátíð vegna 30 ára afmælis skólans. Var ánægjulegt að gleðjast með Ísfirðingum af þessu tilefni. Kom heim aftur um 20.30.

Heimsótti síðdegis Rannsóknastofnun um uppeldis- og menntamál. Um kvöldið fórum við Rut og sáum sýningu á leikritinu Horfðu reiður um öxl á Litla sviði Þjóðleikhússins. Ég sá leikritið þegar það var sýnt hér 1958 - 1961. Það stenst vel tímans tönn.

Fór síðdegis að Flúðum, þar sem ég ávarpaði haustþing kennara á Suðurlandi og í Vestmannaeyjum og tók þátt í pallborðsumræðum. Sat síðan kaffifund með Félagi skólastjóra.

Þær gleðilegu fréttir bárust að Vala Flosadóttir hefði unnið bronsið í stangastökki á Ólympíuleikunum í Sydney. Ég horfði á keppnina um morgunin með starfsfólki menntamálaráðuneytisins. Var síðan í sambandi við Stefán Konráðsson, aðalfararstjóra íþróttamannanna í Sydney. Hann flutti Völu kveðju mína. Ræddi við sjónvarps-, útvarps- og blaðamenn og um kvöldið var ég í sjónvarpsþætti með Loga Bergmann og Einari Vilhjálmssyni spjótkastara, þar sem við ræddum um afrek Völu og leikana.

Við Rut flugum til Egilsstaða klukkan 8 um morguninn í einstaklega fallegu veðri og sá yfir landið allt. Var óvenjulegt fyrir okkur að fara um skóginn í hinum fögru haustlitum. Fyrir hádegi skruppum við niður á Seyðsifjörð en rétt fyrir klukkan 14.00 vorum við á Eskifirði, þar sem við tókum þátt í því, þegar glæsileg kirkju- og menningarmiðstöð staðarins var vígð. Flugum síðan heim klukkan 20.30 um kvöldið.

Klukkan 15.00 opnaði ég sýningu Karólínu Lárusdóttur í Gerðarsafni, þar sem segja má, að færri hafi komist að en vildu.

Klukkan 14.00 var ég í Háskólanum í Reykjavík og flutti ávarp við upphaf ráðstefnu um rafræn viðskipti.

Klukkan 10.15 var ég Þjóðmenningarhúsinu og flutti þar ávarp í Farskóla safnamanna.

setti fimmtu alþjóðlegu bókmenntahátíðina í Reykjavík í Norræna húsinu. Hafði mjög gaman að því að hitta Günter Grass Nóbelsverðlaunahafa. Sannfærðist ég þar um, að fjölmiðlar draga ekki alltaf upp rétta mynd af frægu fólki. Hann er greinilega í hópi þeirra útlendinga, sem fá mikinn áhuga á Íslandi við fyrstu kynni. Ræðan sem hann flutti á setningarhátíðinni sýndi að hann hafði þegar myndað sér skýra mynd af Íslandi í huga sínum. Í Göthe Zentrum á föstudagskvöld sagðist hann ekki síður líta á sig sem myndlistarmann en rithöfund og hann hreyfst mjög af birtinu hér og sagðist gjarnan vilja koma með vatnslitamyndabúnaðinn sinn. Í Norræna húsinu sagði hann, að ósýnilegir íbúar Íslands hlytu að vera hluti skýringarinnar á því, að Íslendingar væru svona mikil bókmenntaþjóð.

Opnaði símenntunarfræðsluhátíð í Kringlunni klukkan 10.00.

Klukkan 14.00 setti ég ráðstefnu um Sókrates-áætlunina í Hátíðarsal Háskóla Íslands. Klukkan 15.00 var háskólahátíð og var ég meðal ræðumanna.

Fór klukkan 19.30 á frumsýningu á Íslenska draumnum og hafði mjög gaman að þessari nýju íslensku kvikmynd.

Klukkan 15.00 var ég í Selásskóla og tók þátt í að opna Skólatorg á vegum Tæknivals og Skýrr. Klukkan 17.15 hófst fundur um símenntunarmál í Borgarnesi, þar sem konur á Sívit-tölvunámskeiði skýrðu frá námi sínu.

Klukkan 14.00 tók ég þátt í ráðstefnu um símenntun á Suðurnesjum í Svartsengi, flutti ávarp og sat í pallborði.

Flaug klukkan 8.30 til Akureyrar, þar sem ég setti viku símenntunar klukkan 11.00 á blaðamannafundi í Fiðlaranum. Ókum síðan til Húsavíkur, þar sem ég afhenti skólaliðum og fleirum námskírteini við hátíðlega athöfn í hús verkalýðsfélagsins klukkan 14.00. Á leiðinni til Akureyrar skoðuðum við bílasafnið að Ystafelli og á Akureyri skoðuðum við Minjasafnið áður vélin fór í loftið klukkan 18.10.

Klukkan 20.00 fórum við á tónleika í Hallgrímskirkju, þar sem Hörður Áskelsson lék á Klais-orgelið.