Komum heim frá Akureyri um hádegisbilið. Klukkan 20.00 vorum við í Þjóðleikhúsinu, þar sem Eddu-verðlaunin voru afhent við glæsilega athöfn.

Sátum málstefnu Menntaskólans á Akureyri um stöðu íslenskrar tungu við lok aldar en ég flutti ávarp við upphaf hennar. Tókum einnig þátt í 120 ára afmæli skólans og vorum viðstödd þegar Ármann Snævarr afhjúpaði eirmynd af hvalbeininu fræga.

Klukkan 14.00 var ég höfuðstöðvum Tals, þar sem kynnt var nýt farsímakerfi, GPRS, sem gerir kleift að tengja farsíma og tölvu. Klukkan 17.00 fórum við Rut til Akureyrar og sáum þar um kvöldið sýningu Leikfélags Akureyrar á Gleðigjöfunum og skemmtum okkur vel.

Dagur íslenskrar tungu. Um hádegisbilið fór ég í Heiðaskóla í Reykjanesbæ og hlýddi á skemmtilega dagskrá nemenda þar í tilefni dagsins auk þess sem ég fékk tækifæri til að skoða þennan einstaklega glæsilega skóla. Klukkan 16.00 var sýningin Frá huga til huga opnuð í Þjóðarbókhlöðunni og flutti ég þar ávarp. Klukkan 17.00 bauð ég til athafnar í Þjóðmenningarhúsinu, þar sem ég afhenti Magnúsi Þór Jónssyni, Megasi, verðlaun Jónasar Hallgrímssonar, og Stóru upplestrarkeppninni og Dr. Richard N. Ringler sérstaka viðurkenningu. Klukkan 20. 00 var hátíðarsýning í Íslensku óperunni á Stúlkunni í vitanum eftir Þorkel Sigurbjörnsson og Böðvar Guðmundsson, en sagan er eftir Jónas Hallgrímsson. Það er ekki oft sem tækfæri gefst til að sjá íslenska barnaóperu, en þessi metnaðarfulla ópera er samin og sýnd í tilefni af fimmtíu ára afmæli Tónmenntaskóla Reykjavíkur. Bera kennarar og nemendur hans hita og þunga verksins.

Síðdegis svaraði ég fjórum fyrirspurnum á alþingi og vísa ég þeim enn á vefsíðu alþingis eða menntamálaráðuneytisins, sem vilja kynna sér um hvað þær snerust. Ein komst í fréttir, það er um skipið Íslending.

Klukkan 14.00 var athöfn í Þjóðmenningarhúsinu vegna útgáfu tveggja sveinsbréfa í myndskurði, hinna fyrstu síðan 1954.

Síðdegis var fyrirspurnartími á alþingi, þar sem ráðherrar svöruðu óundirbúið fyrirspurnum þingmanna. Ásta Ragheiður Jóhannesdóttir spurði mig um starfsmannamál hjá Ríkísútvarpinu. Þær umræður er unnt að sjá með því að fara inn á vef alþingis eða menntamálaráðuneytisins, sjá Slóðirnar mínar hér á síðunni.

Klukkan 10.30 flutti ég ávarp við upphaf Málræktarþings á vegum Íslenskrar málefndar, þar sem rætt var um íslensku sem annað tungumál. Síðdegis fór ég til Grundarfjarðar, þar sem ég sótti fund héraðsnefndar Snæfellsness og ræddi hugmyndir heimamanna um framhaldsskóla. Föstudagur 10. nóvember 2000. Klukkan 13.00 flutti ég ávarp við upphaf þekkingardags.

Klukkan 10.00 fór ég á Hótel Borg, þar sem við Tórbjörn Jacobsen, menntamálaráðherra Færeyja, hittum Bubba Morthens, en Tórbjörn hafði óskað eftir því, þegar við hittumst í fyrsta sinn í Árósum um miðjan ágúst, að ég kæmi á fundi hans og Bubba, þegar hann kæmi til Íslands. Klukkan 15.00 var blaðamannafundur í Þjóðmenningarhúsinu, þar sem forsætisráðherra kynnti áætlun um ritun sögu Stjórnarráðsins, en ég er formaður ritnefndar. Klukkan 19.30 fórum við á tónleika Sinfóníuhljómsveitar Íslands, þar sem Einar Jóhannesson klarinettuleikari frumflutti konsert eftir Jón Nordal við mikla hrifningu.

Klukkan 12.00 var efnt til fundar norrænna menningarmálaráðherra og Norræna menningarmálasjóðsins. Klukkan 14.00 hittumst við norrænu menningarmálaráðherrarnir á fundi í Norræna húsinu og lauk honum ekki fyrr en klukkan 18.00

Klukkan 13.15 var ég á þingi Norðurlandaráðs og svaraði fyrir norræna menningarráðherra. Klukkan 15.00 opnaði ég nýja vefsíðu Norðurlandaráðs við athöfn í Háskólabíói. Klukkan 16.00 efndum við menntamálaráðherrar Færeyja, Grænlands og Íslands til fundar með þingmönnum úr Vestnorræna ráðinu. Klukkan 17.00 opnaði ég netlistarsýningu í Listasafni Reykjavíkur - Hafnarhúsi. Klukkan 18.00 fór ég í Kristkirkju og tók þátt í messu til minningar um Jón Arason og syni hans, sem voru gerðir höfðinu styttri þennan dag fyrir 450 árum.

Klukkan 16.30 var þing Norðurlandaráðs sett í Háskólabíói.

Klukkan 15.00 opnaði ég sýninguna Hærra til þín í Listasafni Sigurjóns Ólafssonar en klukkan 16.00 opnaði borgarstjóri síðan sömu sýningu í Listasafni Reykjavíkur - Ásmundarsafni, en sýningin er samstarfsverkefni safnanna tveggja. Fórum klukkan 17.00 í Listasafn Íslands, þar sem félagar úr London Mozart Players léku í boði James McCulloch, sendiherra Breta, og M-2000.

Fór í hádeginu á fund hjá Bandalagi íslenskra listamanna í Hafnarhúsinu, þar sem rætt var við okkur Ingibjörgu Sólrúnu Gísladóttur borgarstjóra um reynsluna af menningarborgarárinu og hvað við sæjum framundan. Klukkan 15.00 fór ég í Gerðarsafn, þar sem Búnaðarbankinn stendur að yfiritssýningu á verkum Tryggva Ólafssonar listmálara í tilefni af 70 ára afmæli bankans og 60 ára afmæli Tryggva. Einnig er í safninu sýning á verkum eftir Guðrúnu Halldórsdóttur, leirlistamann, undir heitinu Freyjur og för. Klukkan 18.00 fórum við Rut á afmælishátíð Richard Wagner félagsins, þar sem meðal annars var tilkynnt um útgáfu bókarinnar Wagner og völsungar eftir Árna Björnsson þjóðháttafræðing, en þar lýsir hann því, hvernig Wagner nýtti sér Eddurnar og fleira íslenskt efni við sköpun listaverka sinna. einnig flutti Barry Mullington fyrirlestur um Wagner sem félagsveru.

Flutti fyrir hádegi tvö frumvörp á alþingi, annars vegar um námsmatsstofnun og hins vegar um blindarbókasafnið. Var þeim almennt vel tekið af þingmönnum. Fór síðdegis í Rafstöðina í Elliðarárdal, þar sem Ljósahátíð var sett.

Í hádeginu tók ég skóflustungu að nýju húsi fyrir Bandalag íslenskra skáta, sem mun rísa við Hraunbæ í Reykjavík. Fór í Reykholt síðdegis og tók þátt í fundi með skólameisturum framhaldsskólanna. Umræður snerust að sjálfsögðu mest um yfirvofandi verkfall. Það var svo hvasst að við tókum þann kost að aka upp á Mosfellsheiði og um Kjós yfir Dragháls í Reykholt og sömu leið til baka. Var bent á hættu vegna sviptivinda á Kjalarnesi og undir Hafnarfjalli.

Klukkan 13.30 voru umræður utan dagskrár á alþingi um yfirvofandi verkfall í framhaldsskólunum. Síðdegis svaraði ég tveimur fyrirspurnum á þingi, annars vegarr um jafnrétti í skólum og hins vegar um menningarhús og menningarstefnu á landsbyggðinni.

Hélt heim frá Brussel fyrir hádegi, flugvél SA S var 30 mín. of sein að leggja af stað vegna veðurs en náði tímanum að mestu upp á leiðinni til Kaupmannahafnar vegna meðvinds. Flugleiðavélin var á áætlun og var ekki nema 2 tíma og 40 mínútur að fljúga heim frá Kaupmannahöfn. Síðdegis hitti ég sendinefnd frá Frakklandi, sem var hér til viðræðna um menningar-, mennta- og vísindamál.

Klukkan 15.00 hitti ég Philippe Busquin, vísindastjóra Evrópusambandsins, og ræddi við hann í klukkustund um vísindastefnun ESB og hlut okkar Íslendinga, sem hefur verið góður og verður áfram, ef rétt er á málum tekið. Einnig sat ég fundi í sendiráði Íslands en þar eru meðal annars tveir fulltrúar frá menntamálaráðuneytinu til að fylgja eftir málum á starfssviði þess. Veðrið var slæmt þennan dag og gekk mikið óveður yfir suðurhluta Englands en angi þess teygði sig til Brussel.

Flaug snemma morgun um Kaupmannahöfn til Brussel.

Klukkan 13.30 fór ég á þing Iðnnemasambands Íslands og tók þar þátt í skemmtilegum umræðum fram yfir klukkan 15.00.

Klukkan 08.00 fór í ég tíma í stjórnmálafræði í Verslunarskóla Íslands og ræddi við nemendur. Um kvöldið fór ég í Smiðjuna, nýtt nemendaleikhús Listaháskóla Íslands, sem ég tók þátt í að opna og sá síðan sýningu nemenda á Ofviðrinu eftir William Shakespeare. Þótti mér hinir ungu leikarar sýna góð tilþrif auk þess sem skemmtilegt er að sjá, hve öllu er haganlega komið fyrir í þessu gamla smiðjuhúsnæði Landssmiðjunnar við Sölvhólsgötu. Fasteignir ríkissjóðs hafa umsjón með húsnæðinu og hafa komið að endurbótum á því en menntamálaráðuneytið fjármagnaði tækjakaup.

Var með viðtöl fyrir og eftir hádegi en klukkan 15.00 tók ég þátt í athöfn í Þjóðmenningarhúsinu, þar sem afhent var Evrópumerkið svonefnda fyrir gott nýbreytniverkefni í tungumálanámi og kennslu. Að þessu sinni fékk verkefnið Tungumálanám á Neti merkið.

Í hádeginu komu þeir til mín í skrifstofuna Ólafur Hand frá Aco og Viggó Viggóson frá Tölvudreifingu og afhentu mér nýja Office: Mac 2001 hugbúnaðinn. Klukkan 17.15 efndi íþrótta- og æskulýðsnefnd Sjálfstæðisflokksins til opins fundar um afreksstefnu í íþróttum og var ég einn frummælenda. Fundurinn var vel sóttur og líflegar umræður fram yfir klukkan 19.00

Þessi vika er svokölluð kjördæmavika í alþingi, þannig að þar eru ekki fundir. Ég nota tímann meðal annars til þess að efna til funda með starfsfólki menntamálaráðuneytisins, það er einstökum skrifstofum þess. Einnig ætla ég að reyna að kalla á sem flesta, sem hafa óskað eftir viðtali við mig í þessari viku. Vegna ferðalaga til útlanda hafa viðtöl sl. tvo miðvikudaga fallið niður hjá mér.

Fór síðdegis í Austurstræti 17, þar sem World Class var að opna nýja, glæsilega líkamsræktarstöð.

Fór síðdegis í Reykholt í Borgarfirði og tók um kvöldið þátt í fundi Rannsóknarráðs Íslands, þar sem ég reifaði hugmyndir um breytingar á lögum um ráðið.

Við Ingimundur fórum fyrir hádegi á bókasýninguna og heimsóttum Íslendingana, sem þar voru með aðstöðu. Edda, hið sameinaða fyrirtæki Máls og menningar og Vöku-Helgafells, var með stóra sýningaraðstöðu og um 20 manns til að sinna erindum á sýningunni, en okkur var sagt, að aldrei fyrr hefði verið jafmikill áhugi á því að ræða við íslenska útgefendur um það, sem þeir hafa á boðstólnum. Við hittum einnig fulltrúa minni útgefenda, sem stóðu saman að sýningaraðstöðu. Þá hittum við forráðamenn sýningarinnar og fórum í fylgd eins þeirra til fimm þýskra útgefenda, sem gefa út verk íslenskra höfunda og var ánægjulegt að kynnast áhuga þeirra. Flaug heim með Flugleiðum klukkan 14.00 og um kvöldið tók ég þátt í setningartónleikum á ART 2000, þar sem flutt var raf- og tölvutónlist, sem lauk með flugeldatónlist og miklum hvelli.

Flutti ræðu á ráðherrafundinum bækur og rafræna útgáfur. Eftir að fundinum lauk vorum við Ingimundur Sigfússon sendiherra við setningu bókasýningarinnar í Frankfurt, sem er hin stærsta í heimi.

Flaug klukkan 7.25 til Frankfurt en klukkan 15.00 að staðartíma hófst þar ráðstefna menningarmálaráðherra Evrópuráðsríkjanna um bækur og rafræna tækni.