Flutti klukkan 08.30 ávarp á ráðstefnu um rafræna stjórnsýslu að hótel Nordica.

Fór rúmlega 13.00 af stað til Stykkishólms með Rut og Ingu, tengdamóður minni, til að taka þátt í 90 ára afmæli Árna Helgasonar, sem haldið var hátíðlegt með sérstökum glæsibrag, Við vorum komin aftur rúmlega 19.30, eftir að hafa þurft að bíða í 15 mínútur á heimleiðinni við Hvalfjarðargöngin, vegna þess hve seint gekk að innheimta veggjaldið.

Tók þátt í fundi í Valhöll klukkan 14.00 með ungu fólki, sem hafði áhuga á að kynna sér stefnu og störf Sjálfstæðisflokksins og ræddi við þau um utanríkismál.

Kynnti klukkan 15.00 á fundi í Grand Hotel stefnu ríkisstjórnarinnar um upplýsingatækni á næstu fjórum árum. Fundurinn var vel sóttur af þeim, sem að þessum málum vinna og blaðamönnum.

Svaraði tveimur fyrirspurnum á alþingi klukkan 13.30.

Klukkan 14.30 fór ég í höfuðstöðvar Landhelgisgæslunnar og fékk skýrslu um strand Baldvins Þorsteinssonar EA og aðgerðir skipinu til bjargar en þyrla gæslunnar bjargaði áhöfninni í land skammt fyrir austan Vík í Mýrdal.

Var klukkan 22.20 á Pressukvöldi í sjónvarpi ríkisins og svaraði spurningum Þórdísar Arnljótsdóttur og Arnar Páls Haukssonar og Kristjáns Guy Burgess um ýmis mál, þar á meðal forystumál Sjálfstæðisflokksins og ráðherraskipti 15. september. Vísaði ég umræðum um þau mál frá mér sem ótímabærum.

Síðdegis og fram á kvöld vorum við í glæsilegu brúðkaupi Ingu Maríu Leifsdóttur og Kristbjörns Helgasonar.

Var sæmdur stjörnu vikunnar af þættinum Ísland í bítið en daginn áður var tekið við mig viðtal af því tilefni, sem sýnt var í þættinum.

Að loknum ríkisstjórnarfundi fór ég til starfa í dómsmálaráðuneytinu, en þar var árlegur tiltektardagur, þar sem starfsmenn láta hendur standa fram úr ermum við hvers kyns tiltektir.

Klukkan 17.00 fór ég í þáttinn Nei, ráðherra! á Útvarpi Sögu og sat þar í klukkustund í viðræðum við þá Hinrik Má Ásgeirsson og Sigurð Hólm Gunnarsson um hugmyndafræði, varnarmál, refsingar og milliliðalaust lýðræði. Var skemmtilegt að ræða málin frá þessum sjónarhóli og voru spyrjendur vel undirbúnir.

Klukkan 10.30 hófst umræða utan dagskrár á alþingi um sérsveit lögreglunnar að frumkvæði Ögmundar Jónassonar. formanns þingflokks vinstri/grænna. Ég skýrði sjónarmið mín í ræðu og hlustaði síðan á málflutning annarra, áður en ég átti lokaorðin eins og venja er í slíkum umræðum.

Framganga Helga Hjörvars, þingmanns Samfylkingarinnar, kom mér sérstaklega á óvart, vegna þess hve ræða hans var innihaldslaus og ómerkileg.

Klukkan 14.00 fór ég á fund í borgarstjórn Reykjavíkur. Þar bar lögreglumál einnig á góma með vísan til þess, hve vel hefur til tekist með hverfalöggæslu í Grafarvoginum og verkefnið Hringurinn þar. Fór svo að Guðlaugur Þór Þórðarson, borgarfulltrúi okkar sjálfstæðismanna, bar fram tillögu, þar sem fagnað var ákvörðun um að fjölga almennum lögreglumönnum í Reykjavík um 10 og hvatt til enn frekari aðgerða til að efla hina góðu hverfalöggæslu. Var tillgana samþykkt með 13 samhljóða atkvæðum af 15 í borgarstjórninni, eftir að R-listanum gafst fimm mínútna fundarhlé til að taka afstöðu til málsins.

Helgi Hjörvar er varaborgarfulltrúi og sat fyrri hluta borgarstjórnarfundarins. Fjarvera hann leiddi til þess, að unnt var að ræða á málefnalegum forsendum um löggæslu og lögreglu og komast að skynsamlegri niðurstöðu.

Ræddi um klukkan 15.30 í síma úr ráðhúsinu við Hallgrím Thorsteinsson á Útvarpi Sögu en hann var með Einar Karl Haraldsson í hljóðstofu hjá sér. Skiptumst við að skoðunum um sérsveitina.

Klukkan 19.30 var ég í Kastljósinu með Ögmundi Jónassyni og ræddi um sérsveitar- og lögreglumál við þá Sigmar og Kristján.

Var með mín venjulegu viðtöl fyrir hádegi að loknu sundi og qi gong æfingum.

Klukkan 13.30 var utan dagskrár umræða á alþingi, þar sem Guðjón A. Kristjánsson, formaður Frjálslynda flokksins, hóf máls á því, hvað ég ætlaði að gera vegna uppsagnar Landspítalans háskólasjúkrahúss á samningi um lækna um borð í þyrlu Landhelgisgæslunnar. Ég sagði málið til athugunar og þar yrði þeirri spurningu svarað, hvort óhjákvæmilegt væri að hafa alltaf lækni um borð.

Eftir að hafa setið á þingflokksfundi okkar sjálfstæðismanna fór ég á fund í borgarstjórnarflokknum okkar og hlustaði þar meðal annars á fróðlega kynningu á áformum um endurreisn miðborgarinnar af hálfu þeirra, sem vilja koma að því að reisa tónlistarhús og fleira á norðurvæng miðborgarinnar.

Helgi Hjörvar alþingismaður tók til máls um störf alþingis í upphafi þingfundar kl. 01.30 síðdegis í dag. Hafði hann hringt í dómsmálaráðuneytið fyrr um daginn og spurt, hvort ég yrði við upphaf þingfundar, hann ætlaði að ræða um sérsveit lögreglunnar og mundi kannski minnast á fjárveitingar til dómstólanna.

Ég var við upphaf fundarins og þar fór Helgi Hjörvar mikinn og meira um dómstólana en sérsveitina og lét eins og ákvörðun um að efla sérsveitina bitnaði á fjárhag dómstólanna og réðst á mig fyrir „ofstopa“ í garð dómstóla auk þess sem ég væri að hrinda í framkvæmd hugmynd um íslenskan her.

Ég lýsti undrun yfir því, að Helgi tæki sérsveitina til umræðu á þessum forsendum, þar sem að ósk Ögmundar Jónassonar hefði verið ákveðin utan dagskrárumræða um lögreglumál fimmtudaginn 4. mars.

Ég itrekaði það sjónarmið mitt, að dómarar hefðu sýnt ábyrgðarleysi með því að lýsa réttaröryggi borgaranna í hættu vegna fjárhagsaðstæðna hjá dómstólunum. (En þetta kom fram í viðtali við mig í kvöldfréttum hljóðvarps ríkisins 1. mars, þegar ég brást við fréttatilkynningu dómarafélagsins.)

Einar Már Sigurðarson, þingmaður Samfylkingarinnar í Norð-austurkjördæmi, tók til máls og sagði löggæslu ekki næga við Kárahnjúka, hvort ekki væri nær að huga að henni en að því að efla sérsveitina.

Ég sagði þessi ummæli sýna, að þingmaðurinn vissi ekkert um hvað málið snerist, því að skipulagsbreyting á sérsveitinni myndi einmitt hafa í för með sér að auðveldara yrði að beita henni til dæmis við Kárahnjúka. Auk þess þætti mér skrýtið að taka þetta mál upp á þessum tíma í þinginu, þar sem fyrir lægi fyrirspurn um löggæslu við Kárahnjúka frá Atla Gíslasyni (varaþingmanni vinstri/grænna). Skildi ég ekkert í því, hvaða æsingur þetta væri hjá Samfylkingunni.

Ögmundur Jónasson, formaður þingflokks vinstri/grænna, tók til máls og lýsti einnig undrun sinni á þessu upphlaupi samfylkingarmanna, þegar mál þessi kæmu síðar á dagskrá og fyrir dyrum stæði að taka málefni heimahjúkrunar til umræðu utan dagskrár að ósk vinstri/grænna. Mátti skilja Ögmund svo, að þeir Helgi og Einar Már væru að reyna að draga athygli frá frumkvæði vinstri/grænna að umræðum um heimahjúkrun.

Klukkan 17.00 var ég í dægurmálaútvarpi Rásar 2 og ræddi sérsveitarmál og fleira við Ævar Örn Jósepsson.

Efndi til blaðamannafundar í ráðuneytinu klukkan 10.30 með Haraldi Johannessen ríkislögreglustjóra og Ingimundi Einarssyni, varalögreglustjóra í Reykjavík, og kynnti breytingar á sérsveit lögreglunnar.

Vorum í Fljótshlíðinni um helgina og fórum síðdegis í messu hjá séra Önundi Björnssyni að Hlíðarenda. Þar var stór hópur eldri borgara og drukkum við með þeim kaffi að lokinni messu að Goðalandi í boði safnaðarins.

Fór klukkan 13.45 um borð í danska her- og eftirlitsskipið Vædderen í Reykjavíkurhöfn og skoðaði það hátt og lágt undir leiðsögn skipstjórans og í fylgd danska sendiherrans auk embættismanna.

Héldum klukkan 08.30 frá hótel Héraði að Kárahnjúkum í fylgd Helga Jenssonar, fulltrúa sýslumanns á Seyðisfirði, og Vals Magnússonar lögreglufulltrúa við embættið. Vorum komnir um klukkan 10.00 á virkjunarsvæðið, en á leiðinni var gott veður, þótt á köflum væri dimmt vegna skafrennings. Það blés dálitíð á Kárahnjúkum en var bjart yfir og 12 stiga frost.

Hittum forsystumenn Impregilo á fundi, Þeir gerðu okkur grein fyrir framkvæmdunum og fóru yfir ýmis mál. Síðan héldum við niður á stíflusvæðið, þar sem Jöklu hefur verið veitt í hjáleiðslugöng og menn hafa hafist handa við undirstöður stíflunnar miklu.

Snæddum hádegisverð í hinu mikla mötuneytí, sem þjónar starfsmönnum Impregilo og fórum síðan í stöðvar Landsvirkjunar á svæðinu og hittum fulltrúa fyrirtækisins og auk þess trúnaðarmann starfsmanna.

Héldum frá Kárahjúkum um klukkan 13.00 og heimsóttum í bakaleiðinni hjónin að Skriðuklaustri, sem halda staðnum vel í glæsileika sínum og fengum höfðinglegar móttökur.

Tókum vél frá Egilsstöðum klukkan 16.10 og var hún á áætlun.

Hélt með embættismönnum dómsmálaráðuneytisins um hádegisbil til Egilsstaða, aldrei þessu vant var 30 mínútna seinkun á vél Flugfélags Íslands. Við komuna til Egilsstaða héldum við til Þorgerðar Erlendsdóttur héraðsdómara og kynntum okkur starfsemi héraðsdómstóls Austurlands.

Ókum síðan á Eskifjörð og hittum Inger L. Jónsdóttur sýslumann og samstarfsfólk hennar á sýsluskrifstofunni. Funduðum með henni Jónasi Wilhelmssyni yfirlögregluþjóni og öðrum lögreglumönnum en héldum síðan í Norfjörð, fórum á netabryggjuna og kynntum okkur aðstæður, þar sem líki af Litháa hafði verið varpað í höfnina. Fórum í Egilsbúð og þágum kaffiveitingar í boði Guðmundar Bjarnasonar bæjarstjóra og Smára Geirssonar forseta bæjarstjórnar. Fórum síðan í lögreglustöðina í Neskaupstað og ræddum við lögreglumenn og kvöddum þar sýslumann og samstarfsmenn hennar.

Gistum á hótel Héraði, Egilsstöðum.

Ríkisstjórnarfundur var að að venju klukkan 09.30 og lauk honum ekki fyrr en undir 11.30. Þá efndi ég til reglulegs fundar með skrifstofustjórum í ráðuneytinu, þar sem við fórum yfir mál, sem eðlilegt er að ræða á slíkum sameiginlegum vettvangi. Í hádeginu hitti ég þá félaga mína, sem komu til málsverðar, en í meira en 30 ár höfum við nokkrir haldið þeirri venju að koma saman í hádegi á föstudögum. Klukkan 15.00 var fundur í ritstjórn stjórnarráðssögu en klukkan 16.30 talaði ég um líkfundinn í Norðfirði og lögreglumál við þá Þorgeir og Kristófer, sem sjá um síðdegisþátt á Bylgjunni. Af þeim, sem eru með slíka þætti, sýna þeir félagar mestan áhuga á þeim málum, sem eru til meðferðar á verksviði dómsmálaráðuneytisins og reyni ég jafnan að bregðast við óskum þeirra um samtal.

Klukkan 19.30 hófst þingveislan að Hótel Sögu.

Flaug klukkan 08.30 frá Heathrow til Brussel og var kominn þangað um klukkan 11.00 að staðartíma. Þórunn J. Hafstein, skrifstofurstjóri hjá EFTA, og fyrrverandi samstarfsmaður minn í menntamálaráðuneytinu, tók á móti mér á flugvellinum og höfðum við tíma til að skreppa í ensku bókabúðina í miðborg Brussel, áður en ég hitt Hauk Guðmundsson, fulltrúa dómsmálaráðuneytisins, í sendiráðinu í Brussel og við bjuggum okkur undir ráðherrafund um Schengen-málefni.

Klukkan 13.00 var tveggja tíma vinnu-hádegisverður, þar sem ráðherrar ræddu óformlega um þau málefni, sem hæst ber, þar á meðal gagnkvæma vegabréfaskyldu og persónuleg kennileiti (biometrics) í vegabréfum. Javier Solana, sem fer með utanríkis- og öryggismál innan framkvæmdastjórnar Evrópusambandsins, tók þátt í málsverðinum og flutti ræðu um tengsl innra og ytra öryggis.

Að loknum þessum hádegisverðarfundi hófst hinn formlegi fundur. Honum var lokið rúmlega 15.30 og þá sá ég, að tími gafst fyrir mig til að taka vél fyrr frá Brussel en ég hafði ætlað og í stað þess að fara í gegnum London heim ákvað ég að fara um Kaupmannahöfn, sem þýddi að ég lenti rúmlega 22.00 í Keflavík í stað þess um miðnætti.

Var með hefðbundin viðtöl í ráðuneytinu fyrir hádegi eins og jafnan á miðvikudögum. Auðveldara er að halda biðlistanum í lágmarki í dóms- og kirkjumálaráðuneytinu en í menntamálaráðuneytinu, því að mun færri biðja um viðtöl við mig hér en í mínu fyrra ráðuneyti. Umræðurefnið er annars eðlis hér en á hinum staðnum og margt átakanlegt í mannlegum samskiptum fæ ég að heyra í þessum trúnaðarsamtölum. Við sumu er unnt að bregðast en annað er þess eðlis, að ráðherra getur ekki haft nein afskipti af því.

Um klukkan 14.30 svaraði ég fyrirspurn Marðar Árnasonar á alþingi um áfengisauglýsingar.

Síðan hélt ég út á Keflavíkurflugvöll en klukkan 17.00 hélt ég með Icelandair til London - gisti þar úti á flugvelli. Sá í bresku blöðunum, að mikil umræða er á breskum stjórnmálavettvangi um viðbrögð við frjálsri för manna á hinu stækkaða Evrópusambandssvæði eftir 1. maí 2004. Íhaldsmenn gagnrýna Blair og stjórn hans fyrir ráðleysi.

Fór um hádegisbil til Selfoss en þar fór ég með starfsmönnum ráðuneytisins í heimsókn til Ólafs Helga Kjartanssonar sýslumanns og samstarfsmanna hans á sýsluskrifstofunni og lögreglustöðinni. Var fróðlegt að kynnast því, hvernig starfið hjá sýslumanni og lögreglumönnum hefur breyst á síðustu árum með stórfjölgun sumarbústaða á svæðinu. Byggðamynstrið er að breytast á þessum slóðum og hefur það rík áhrif á störf sýslumanns og hans fólks. Athyglisvert var að heyra, hve sumarbústaðaeigendur eru tregir til að setja öryggismerkingu á hús sitt, en slík merking er besta úrræðið til að tryggja skjót viðbrögð lögreglu eða sjúkraliða á hættustundu. Undir lok heimsóknarinnar rituðum við sýslumaður undir árangursstjórnunarsamning.

Klukkan 18.00 buðum við laganemum til fordrykks á Hótel Sögu áður en árshátíð þeirra hófst í 50. sinn, þar sem ég flutti hátíðarræðu,

Um kvöldið var árshátíð stjórnarráðsins haldin að hótel Nordica. Hefur hún aldrei verið fjölmennari og rúmaðist tæplega 700 manna hópurinn ekki í stóra ráðstefnu- og veislusal hótelsins.  Heppnaðist hátíðin vel en ég var undrandi á því, hve hljóðkerfi þessa nýja ráðstefnuhúss virkaði illa og hve erfitt virtist að ná með því til alls þessa hóps - raunar tókst Davíð Oddssyni forsætisráðherra það vel, en hann flutti snjalla hátíðarræðu.

Fór um hádegisbilið til Reykjanesbæjar og ritaði þar undir samning bæjarins og Útlendingastofnunar um móttöku hælisleitenda, sem bærinn hefur tekið að sér.

Við rituðum undir samninginn í Duus-húsi, en við hliðina á salnum, þar sem við vorum, var Árni Johnsen að setja upp sýningu sína á steinverkum, sem hann hafði gert, á meðan hann sat inni á Kvíabryggju. Leit ég inn til Árna, hitti hann og skoðaði verkin undir leiðsögn hans. Þennan dag var hann einmitt laus úr fangavist.

Klukkan 19.00 ræddi ég um utanríkismál í stjórnmálaskóla SUS.

Fór á Rotary-fund í hádeginu og hlustaði á Sigurð Helgason, forstjóra Flugleiða hf., flytja fróðlegt erindi um sterka stöðu félagsins.

Dagurinn snerist að verulegu leyti um málefni sérsveitar lögreglunnar og hitti ég hana meðal annars að máli síðdegis á fundi í dómsmálaráðuneytinu auk þess að ræða við forystumenn lögreglunnar og landssambands hennar.

Fór rúmlega 09.00 í heimsókn til Slysavarnafélagsins Landsbjargar, fyrst um höfuðstöðvarnar í Skógarhlíð, síðan til Hjálparsveitar skáta, þá út á Seltjarnanes til slysavarnadeildar kvenna auk þess að kynnast sjó- og rústabjörgunardeildum hjá björgnuarsveitinni Ársæli, loks niður á höfn um borð í björgunarskipið Ásgrím S. Björnssonn og sigldi með því út á ytri höfn.

Fórum á milli staða í björgunarsveitarjeppa.

Var þetta mjög fróðleg og skemmtileg ferð og traustvekjandi að kynnast því, hve vel er að þessum störfum staðið og við góðar aðstæður.

Klukkan 19.30 var afmælisveisla stjórnarráðsins í Iðnó, þegar forsætisráðherrahjónin buðu þangað ríkisstjórn, ráðuneytisstjórum og fyrrverandi ráðherrum.

Flutti klukkan 13.00 ræðu á fundi SAFT og Heimilis og skóla um rétt barna til öryggis á Netinu.

Fórum austur í Fljótshlíð og vorum um kvöldið á fundi í Goðalandi, þar sem Magnús Tumi Guðmundsson jarðfræðingur flutti erindi um eldvirkni í Mýrdalsjökli og Eyjafjallajökli með hliðsjón af hættunni á því, að flóð færi vestur um og niður í Landeyjar.

Borgarstjórn kom saman síðdegis en fundað var fram á kvöld á alþingi til að afgreiða frumvarp vegna sparisjóða.

Klukkan 15.00 fór ég í Fasteignamat ríkisins og kynnti mér landskrá fasteigna og ritaði undir samning um nýtingu hennar í þágu sýslumannsembætta.

Klukkan 12.00 var ríkisstjórnarfundur í Ráðherrabústaðnum til að ganga frá reglugerð um stjórnarráðið í tilefni 100 ára afmælis þess og klukkan 12.30 ríkisráðsfundur á sama stað til að staðfesta reglugerðina.

Klukkan 13.30 var athöfn í Þjóðmenningarhúsinu, þar sem forsætisráðherra voru afhent fyrstu eintökin af sögu stjórnarráðsins

Klukkan 17.00 fór ég á tónleika Kammersveitar Reykjavíkur undir stjórn Pauls Zukofskys í Langholtskirkju.

Klukkan 19.45 fórum við Rut í Þjóðmenningarhúsið og tókum þátt í athöfn í tilefni af afmæli heimastjórnarinnar.