Um hádegisbilið var farið í siglingu um höfnina í Höfn í niðaþoku, fórum í land í Austurfjöru og ókum að Horni og skoðuðum hið einstæða bæjarstæði þar, er ógleymanlegt að þokunni létti í kringum bæinn, svo að við sáum Vestrahorn gnæfa yfir hann. Fórum síðan að Hólmi í Laxárdal og fræddi Bjarni Einarsson fornleifafræðingur okkur um blótshúsið þar. Lauk farskólanum síðan í kirkjunni í Bjarnarnesi. Á leiðinni í Fljótshlíðina áttum við Rut stutta viðdvöl í Kvískerjum, því að okkur langaði að hitta bræðurna þar og áttum við ógleymanlega stund með þeim Halfdáni, Helga og Sigurði.

Um hádegisbilið hélt farskólinn í ferðalag í Skaftafell undir góðri leiðsögn. Við snæddum hádegisverð í Smyrlabjörgum, stöðvuðum við Hala, fengum leiðsögn um þjóðgarðinn í Skaftafelli og skoðuðum kirkjuna að Hofi. Um kvöldið var hátíðarkvöldverður í boði bæjarstjórnar Hornafjarðar og þar kom það í minn hlut að afhenda Lýði Pálssyni, forstöðumanni Byggðasafns Árnessýslu, safnaverðlaunin árið 2002.

Um kl. 08.30 héldum við úr Fljótshlíðinni austur á Höfn í Hornafirði og komum þangað um hádegisbilið en klukkan 14.00 hófst þar Farskóli safnmanna og var ég þátttakandi í pallborðsumræðum alþingismanna síðdegis. Um kvöldið var eftirminnilegur humarnáttverður.

Klukkan 09.00 sat ég stjórnarfund Orkuveitu Reykjavíkur, Klukkan 12.00 sat ég fund borgarráðs. Klukkan 14.30 sat ég fund stjórnkerfisnefndar borgarinnar. Síðan ókum við Rut austur í Fljótshlíð og gistum þar að Kvoslæk, þar sem segja má, að við höfum eignast annað heimili.

Klukkan 10.30 sótti ég fyrsta stjórnarfund minn í Aflvaka, en það er félag á vegum Reykjavíkurborgar. Í ljós kom á fundinum, að ekki er auðvelt að átta sig á hlutverki Aflvaka, þrátt fyrir samþykktir félagsins

Klukkan 14.00 hófst borgarstjórnarfundur og stóð til kl. 19.30 með 30 mínútna matarhléi. Við sjálfstæðismenn lögðum fram tillögu okkar um stórlækkun fasteignaskatts á eldri borgara og öryrkja og var hún felld eins og tillaga um lækkun holræsagjalds. Ég var undrandi á því hvernig R-listinn brást við, því að rökin voru þau hjá borgarstjóra, að það mætti ekki mismuna í þágu þessa hóps, þá var sagt að borgarsjóður þyldi ekki tekjutapið og loks að gamla fólkið ætti að selja fasteignir sínar eða skuldsetja til að auka lífeyri sinn.

Klukkan 14.30 héldum við borgarfulltrúar Sjálfstæðisflokksins blaðamannafund í Ráðhúsinu og kynntum stefnumál, sem við ætlum að flytja í borgarstjórn á haustmánuðum. Fréttamenn spurðu mig einnig um umtalið um að Ingibjörg Sólrún ætti að bjóða sig fram til þings í tilefni að skoðanakönnun á vegum Kreml.is, sem sýndi, að undir leiðsögn ISG mundi Samfylkingin bæta við sig 8% fylgi. Klukkan 16.00 var síðan reglulegur fundur í borgarstjórnarflokknum.

Flogið heim frá Stokkhólmi kl. 14.10 lent kl. 15.30 að íslenskum tíma í fyrsta haustrokinu og rigningu.

Ég notaði tímann til að skoða Vasa-safnið, sem er einstaklega vel gert í kringum Vasa-skipið og fór einnig í Nordiska Museet, sem sýnir allt annað en nafnið gefur til kynna, það er sænska hönnun og muni úr daglegu lífi Svía en ekki neitt er tengist víkingum!

Fundahöld með fulltrúa í Bromma-hverfi í Stokkhólmi fram yfir hádegi en síðan frí.

Vorum allan daginn á fundum í ráðhúsinu í Stokkhólmi og síðan í einum bæjarhluta þar með fulltrúum úr hverfisráði.

Vorum á fundum í ráðhúsinu í Kaupmannahöfn fram eftir degi og tókum kvöldmatarflug til Stokkhólms.

Sátum fundi fram yfir hádegi með fulltrúum í bæjarstjórn Bergen og héldum síðan til Kaupmannahafnar með millilendingu í Ósló. Vorum komin nógu snemma til Kaupmannahafnar til að ég gat fengið mér kvöldgöngu og matarbita í Tívólí í góða veðrinu.

Eftir fundi í ráðhúsinu í Ósló og síðan í einu hverfi borgarinnar flugum við um kvöldmatarleytið til Bergen.

Klukkan 07.35 flaug ég frá Keflavík til Ósló ásamt borgarfulltrúunum Árna Þór Sigurðsson og Degi B. Eggertssyni. Þar hittum við Regínu Ástvaldsdóttur starfsmann stjórnkerfisnefndar Reykjavíkurborgar, en nefndin var að hefja vikuferð um borgir á Norðurlöndum til að kynna sér hverfavæðingu þeirra. Veðrið var einstaklega gott í Ósló og raunar alls staðar þar sem við komum alla vikuna, meira en 20 stiga hiti og sólskin.

Klukkan 10.00 hófst stjórnarfundur í Orkuveitu Reykjavíkur í húsakynnum hennar á Akranesi. Um hádegisbilið bauð bæjarstjórn Akraness stjórninni til málsverðar og síðan var ekið að Deildartungu og að Andakílsárvirkjun og skoðuð mannvirki þar. Þá lá leiðin á Nesjavelli og þaðan með Soginu og til Reykjavíkur um Hellisheiði. Ætlunin var að skoða mannvirki og virkjunarstaði OR á þessum slóðum en fallið frá því vegna leiðinlegs veðurs.

Eftir fundarhöld síðdegis 15. ágúst fórum við þingmenn Sjálfstæðisflokksins í kynnisferð um Stykkishólm að morgni þessa dags og síðan í siglingu út á Breiðafjörð og var það í senn fróðleg og skemmtileg ferð. Síðan ákváðum við Rut að skoða okkur um á Snæfellsnesi og gefa okkur góðan tíma á leiðinni til Reykjavíkur. Ókum við fyrir Snæfellsnes og fengum okkur síðdegiskaffi í Fjöruhúsinu á Hellnum, sem er einstakt veitingahús. Þar hitti ég mann, sem minntist þess, að líklega árið 1934 hefði hann hitt Benedikt Sveinsson, afa minn, og Guðrúnu Pétursdóttur, ömmu mína, á göngu á þessum slóðum á leið til Hólahóla og Dritvikur, en afi minn átti þær jarðir, sem nú eru hluti af þjóðgarðinum. Hann minntist þess einnig, að hann var í hópi unglinga, að Anton Björnsson, móðurbróður minn, 22 ára, skyldi koma að Arnarstapa og kenna heimafólki leikfimi eða fimleika, en vikurflutningaskipið Hilmir sökk á leiðinni, án þess að nokkru sinni hafi fengist viðhlítandi skýring á því, sem gerðist - ef til vill grandaði tundurdufl skipinu, en þetta var í síðari heimsstyrjöldinni.

Við fórum af stað til Stykkishólms snemma morguns en klukkan 09.30 hófst þar fundur þingflokks sjálfstæðismanna með kynnisferð í Grundarfjörð og í Snæfellsbæ, en í öllum þessum sveitarfélögum á Snæfellsnesi hafa sjálfstæðismenn forystu í sveitarstjórnarmálum. Raunar fengum við hæsta hlutfall í kosningunum í vor í Snæfellsbæ um 61%. Var ánægjulegt að kynnast krafti og bjartsýni foruystumanna byggðarlaganna.

Klukkan 17.00 átti stofnfjáreigendafundur Sparisjóðs Reykjavíkur og nágrennis (SPRON) að hefjast að Grand hótel, en það tafðist um rúmar 30 mínútur, að hann yrði settur vegna þess hve margir komu til fundarins (545) og alla þurfti að skrá og afhenda kjörseðla. Mér var falin stjórn fundarins og stóðu umræður fram yfir kl. 20.00 án nokkurra vandræða. Ljóst er að SPRON verður ekki breytt í hlutafélag á næstunni og það á eftir að koma í ljós, hvernig félag starfsmanna ætlar að standa að því að framkvæma tilboð sitt um kaup á stofnfjárbréfum.

Frá klukkan 09.00 til 17.00 var ég á kynningarfundi hjá Orkuveitu Reykjavíkur í svonefndu stöðvarstjórahúsi í Elliðaárdal. Var okkur nýjum stjórnrmönnum gefinn kostur á að kynnast öllum meginþáttum í starfsemi þessa stóra fyrirtækis.

Ók úr Fljótshlíðinni í Skálholt og var þar klukkan 14.00 og hlustaði á Orra Vétsteinsson lýsa fornleifagrefrtinum. Sótti síðan tónleika Bach-sveitarinnar með Jaap Schröder í Skálholtskirkju klukkan 15.00 og 17.00 og drakk miðaldarkaffi á milli og snæddi síðan kvöldverð með tónlistarfólkinu áður en ég ók aftur í Fljótshlíðina, en Rut var áfram með Bach-sveitinni fram í næstu viku.

Klukkan 17.00 ég fræðslumiðstöð Þingvalla við hátíðlega athöfn í henni á Hakinu. Voru nálægt 200 manns við athöfnina og lýstu ánægju með sýninguna og húsið. Sýningin er nýstárleg vegna þess að hún byggist á margmiðlunartækni og húsið fellur vel að náttúrunni á þessum viðkvæma stað.

Klukkan 15.00 fórum við Rut að Skógum undir Eyjafjöllum og vorum við athöfn, þegar samgönguminjasafn var opnað þar. Ég hef fylgst með þróun hugmyndarinnar um safnið frá upphafi og kom að henni sem menntamálaráðherra, eftir að Árni Johnsen alþingismaður hafði kynnt mér hana, en hann ýtti mjög á málið, eins og fram kom í máli Þórðar Tómassonar safnvarðar við athöfnina. Síðast vorum við Rut þarna 15. ágúst 2001, sam daginn og ríkisendurskoðun sendi frá sér skýrslu um mál Árna Johnsens, en um þær mundir var í fjölmiðlum reynt að gera þessar framkvæmdir að Skógum tortryggilegar vegna þess eins að Árni hafði lagt þeim öflugt lið. Er nú um ár liðið frá því að það gjörningaveður gekk yfir.

Fór í hádeginu í Háskólabíó, þar sem Apple-umboðið stórð fyrir beinni útsendingu frá setningarræðu Steve Jobs á Macworld í Jacob Javits Center í New York. Boðaðar voru nýjúngar fyrir Makka-notendur.

Fundur í borgarráði kl. 12.00. R-listinn samþykkir að kaupa húseignir Jóns Ólafssonar við Laugaveg fyrir 140 milljónir króna - við sjálfstæðismenn lýsum andstöðu við gjörninginn, þar sem hann sé ekki nauðsynlegur vegna skipulags eða til að gæta hagsmuna Reykvíkinga.

Fundur í borgarráði klukkan 09.00 - ekki haldinn á venjulegum tíma á þriðjudegi vegna heimsóknar varaborgarstjóra Moskvu.

Klukkan 09.00 sat ég fyrsta fund minn í stjórn Orkuveitu Reykjavíkur. Borgarráðsfundur kl. 12.00

Klukkan 15.00 var skýrt frá niðurstöðu í samkeppni um listaverk í nýjar höfuðstöðvar Orkuveitu Reykjavíkur við athöfn í Perlunni. Klukkan 16.30 var ég hjá Gagarín í Kópavogi til að kynnast tillögum um margmiðlunarefni fyrir fræðslumiðstöðina á Hakinu við Almannagjá.

Aukafundur í borgarráði kl. 15.00 til að R-listinn geti gengið frá kjöri stjórnarformanns Innkaupastofnunar Reykjavíkurborgar eftir að hafa breytt kjörgengisskilyrðum til að falla að frambjóðanda sínum.

Klukkan 12.00 var fundur í borgarráði.