Stefnuræða forsætisráðherra. Þriðjudagur 5. október Klukkan 11.30 ritað undir samning við Háskóla Íslands í Ráðherrabústaðnum.

Fórum um kvöldið í Hafnarborg og hlýddum á Tríó Reykjavíkur á fyrstu tónleikum vetrarins.

Klukkan 11.00 Menntaskólinn við Sund 30 ára, afmælishátíð þar sem ég flutti ávarp. Klukkan 16.30 litum við inn á 75 ára afmælissýningu Félags ísl. gullsmiða, sem verið var að opna í Ráðhúsinu. Klukkan 17.00 setti ég kínverska kvikmyndahátíð í Háskólabíói og horfði síðan á kvikmyndina Ópíumstríðið. Klukkan 20.30 fórum við í Tjarnarbíói á mögnuðu dansleiksýninguna ber hjá hópnum Dansleikhús með Ekka.

Alþingi sett klukkan 13.30 - messa í Dómkirkjunni, hin fyrsta eftir gagngera viðgerð á henni, sem ekki er lokið. Bekkir hafa meðal annars verið styttir þannig að unnt er að ganga inn í þá frá útvegg kirkjunnar. Um þetta hafði staðið áralöng deila milli safnaðarnefndar og húsafriðunarnefndar. Heimilaði ég að lokum, að bekkirnir yrðu styttir. Sé ég ekki annað en allt sé þetta til bóta í kirkjunni. Klukkan 17.00 haldið upp á 35 ára afmæli Tækniskóla Íslands í Salnum í Kópavogi, þar sem ég flutti ávarp. Klukkan 20.30 fórum við á frumsýningu á hinu áhrifamikla leikriti Fedra í Smíðaverkstæði Þjóðleikhússins.

Klukkan 08.15 fundur á vegum félaga tæknifræðinga og verkfræðinga um Tækniháskóla atvinnulífsins. Var ég meðal þriggja frummælenda. Klukkan 14.00 blaðamannafundur í Ásmundarsafni á vegum Vöku-Helgafells, þar sem kynnt var bókin Þjóðsögur við sjó. Klukkan 16.00 hátíðleg athöfn á vegum Landsteina að Hótel Loftleiðum þegar ritað er undir mikilvægan samning á vegum fyrirtækisins við Adidas, Baug og Navision Software, sem þýðir 300 m. kr. viðskipti.

Þingflokkur sjálfstæðismanna kemur saman til að undirbúa þingstörfin og taka afstöðu til fjölmargra frumvarpa, þar á meðal þriggja frá mér: breytingar á grunnskólalögum vegna valfrelsis í samræmdum prófum, breytingar á framhaldsskólalögum til að skilgreina meðal annars einstakar námsbrautir betur og samræmd próf á framhaldsskólastsigi og endurflutt frumvarp til úvarpslaga.

Snúið frá S-Afríku.

Haldið til Suður-Afríku.

Blaðamannafundur dómnefndar um fræðslumiðstöð á Þingvöllum, þar sem skýrt var frá niðurstöðum í samkeppni.

Klukkan 9.50 var ráðherrum og fleirum stefnt til Bessastaða til að taka þar formlega á móti Lennart Meri, forseta Eistlands, við upphaf opinberrar heimsóknar hans.

Fór á landsleik Íslands og Makedóníu í Kaplakrika um kvöldið. Glæsilegur sigur okkar manna, sem ekki var hnekkt í leiknum í Makedóníu.

Um hádegisbilið lauk dómnefnd í samkeppni arkitekta vegna fræðslumiðstöðvar við Hakið á Þingvöllum störfum, en ég var formaður hennar. Nefndin hafði skamman tíma til að dæma 31 tillögu en komst að einróma niðurstöðu og verður hún kynnt fimmtudaginn 16. september.

Klukkan 16.00 var Listaháskóli Íslands settur að Kjarvalsstöðum.

Klukkan 18.00 var leikur á Laugardalsvelli, þar sem landslið Íslands og Úkraínu kepptu og hinir síðarnefndu sigruðu með einu marki úr vítaspyrnu.

Um kvöldið lauk Kvikmyndahátíð í Reykjavík með forsýningu á myndinni Eyes Wide Shut eftir Stanley Kubrick, en þar leika þau hjónin Tom Cruise og Nicole Kidman aðalhlutverk. Eftir að hafa séð myndina er ég undrandi á því, að kynnendur hennar skuli leggja áherslu á að um óvenjulega djarfa mynd sé að ræða og einnig er gert veður út af því, að krafa hafi verið gerð um að klippa senur úr myndinni í Bandaríkjunum. Vissulega eru sum atriði í djarfari kantinum en miðað við annað, sem er sýnt, virkar þessi kynning eins og auglýsingabrella. Myndin er áleitin eftir að henni lýkur vegna þess sérstaka andrúmsloft sem ríkir í henni, þar sem skilin milli draums og veruleika eru óskýr.

Klukkan 15.20 kom Walter Schwimmer, nýr framkvæmdastjóri Evrópuráðsins, í heimsókn í ráðuneytið. Hann tók við störfum 1. september, en áður var hann austurrískur þingmaður og minnist ég hans frá þeim árum, þegar ég sat á þingi Evrópuráðsins. Klukkan 17.00 fór ég í Nýja garð, þar sem Tungumálastofnun Háskóla Íslands var opnuð. Þessi nýjung í starfi skólans minnir á þá staðreynd, að tungumálakunnátta er nauðsynleg í öllum greinum eins og tölvukunnátta. Klukkan 18.00 var athöfn í Skólabæ í tilefni af því að framhaldsnám er að hefjast í sálarfræði við Háskóla Íslands.

Síðdegis fórum við Árni Johnsen alþingismaður saman á hina miklu sjávarútvegssýningu í Kópavogi, þar sem þúsundir manna fræddust um hið nýjast í tækni og hátækni við sjósókn. Síðan fórum við í Gerðarsafn, þar sem sýning á textílverkum var að hefjast í tilefni af 25 ára afmæli félags textíllistamanna. Um kvöldið kom það í minn hlut að setja hátíð á Broadway til að hylla íslenska dægurtónlist 20. aldarinnar. Var glæsilega að öllu staðið af Ólafi Laufdal, Agli Eðvarðssyni og Gunnari Þórðarsyni. Miðað við hve stemmning var mikil og góð þetta fyrsta kvöld hátíðarinnar er þess að vænta, að hún verði vinsæl.

Klukkan 15.00 var Háskóli Íslands formlega settur með háskólahátíð, þar sem meðal annars kom í minn hlut að flytja ávarp.

Klukkan 15.00 var Háskóli Íslands formlega settur með háskólahátíð, þar sem meðal annars kom í minn hlut að flytja ávarp.

Um hádegisbilið kom hingað til lands Bridget Mabandla, sem fer með menningarmál, rannsóknir og vísindi í ríkisstjórn Suður-Afríku. Voru þrír samstarfsmenn hennar með í ferðinni. Ráðherrann var á ferð til allra Norðurlandanna í tilefni af því að undanfarna mánuði hefur norræna ráðherranefndin staðið fyrir samstarfi um menningarmál við S-Afríku og hefur meðal annars verið efnt til norrænna menningarviðburða í S-Afríku, lýkur þessu formlega samstarfi núna í september og stendur til að ég fari þangað af því tilefni sem formaður ráðherranefndarinnar á þessu ári. Var ánægjulegt að taka á móti frú Mabandla og samstarfsmönnum hennar. Þau höfðu mikinn áhuga á að kynnast Íslandi og hvernig hér er staðið að úrlausn ýmissa mála, þótt langur vegur sé frá því, að þjóðfélag þeirra sé á sama stigi og okkar, þó að ekki sé nema vegna þess eins, að þar eru ellefu opinber tungumál. Dvöldust gestirnir hér til fimmtudags 2. september.

Klukkan 14.00 vorum við í Samvinnuháskólanum á Bifröst og tókum þátt í setningu hans en jafnframt steig skólinn það skref, að allir nemendur hans skyldu hafa eigin fartölvu til umráða og opnað var sérstakt fjarskiptanet skólans á vegum Tals hf.

Fórum á frumsýningu myndar Sólveigar Anspach – Hertu upp hugann – á kvikmyndahátíð, en þar er farið listrænum höndum um viðkvæmt efni.

Klukkan 10.00 hófst dagur símenntunar formlega í Viðskiptaháskólanum í Reykjavík. Flutti ég ræðu um símenntun á 21. öld. Síðan skoðuðum við sýningarbása í húsakynnum Verslunarskólans í Reykjavík. Klukkan 14.00 vorum við Rut í Fjölbrautaskóla Suðurlands á Selfossi, þar sem Fræðslunet Suðurlands tók formlega til starfa með hátíðlegri athöfn. Klukkan 16.00 opnaði Eiríkur Smith málverkasýningu í Hafnarborg í Hafnarfirði. Var mikill mannfjöldi þar, þegar við sóttum sýninguna á leiðinni frá Selfossi. Klukkan 20.00 fórum við á sýningu á Hellisbúanum í Íslensku óperunni. Var þetta hátíðarsýning í tilefni af því, að þarna var sett aðsóknarmet í íslensku leikhúsi. Bjarni Haukur Þórisson leikari var hylltur í lok sýningarinnar ásamt þeim, sem stóðu að því að setja þennan skemmtilega einleik á svið með þeim hætti, að fleiri áhorfendur hafa sótt hann en nokkra aðra sýningu í íslensku leikhúsi.

Klukkan 11.00 flaug ég til Akureyrar, þar beið mín bíll og ókum við til Siglufjarðar þar sem ég flutti ræðu á fundi SSNV og svaraði fyrirspurnum. Síðan hélt ég aftur til Akureyrar og flaug þaðan klukkan 18.10 og var kominn heim um kvöldmatarleytið. Klukkan 20.30 hófst Kvikmyndahátíð í Reykjavík og kom það í minn hlut að setja hana með ræðu. Síðan var sýnd bráðskemmtileg mynd um líf meðal Sígauna á Balkanskaga eftir Emír Kusturica.

Um kvöldið fórum við á tónleika kórs frá Nýfundnalandi, Kórs Kársnesskóla og Kórs Menntaskólans við Hamrahlíð, sem voru í MH. Þarna voru menningarmálaráðherra Nýfundnalands og eiginkona hans ásamt fylgdarliði meðal áheyrenda. Kórinn frá Nýfundnalandi hélt fimmtudaginn 26. ágúst til Finnlands ásamt MH-kórnum, þar sem þeir taka þátt í tónlistarhátíð.

Klukkan 11.00 efndum við Kevin H. Smith frá Vísindasafninu í Buffalo í New York-ríki í Bandaríkjunum til blaðamannafundar í menntamálaráðuneytinu, þar sem hann kynnti niðurstöðu sína á jaspis-steinum frá fornleifauppgreftri að L’Anse aux Meadows á Nýfundnalandi fyrir tæpum 40 árum, en steinarnir eða eldtinnurnar hafa nú verið rannsakaðar með nýrri tækni. Niðurstaðan er, að staðfest hefur verið að menn frá Íslandi voru í þessum þúsund ára gömlu víkingabúðum, niðurstaðan rennir einnig stoðum undir frásögn Grænlendingasögu um vetursetu Þorfinns karlsefnis í Straumfirði.

Klukkan 13.00 fór ég til nágranna minna í Blindrafélaginu við Hamrahlíð og fagnaði með þeim 60 ára afmæli félagsins.

Dr. Henning Scherf, forsætisráðherra í Bremen, minnsta sambandslandi Þýskalands, kom í heimsókn til mín fyrir hádegi. Hann er sá þýskur stjórnmálamaður, sem lengst hefur setið samfellt í ríksstjórn. Var skemmtilegt að kynnast þessum manni, sem er hér og býr á Hjálpræðishernum með félögum sínum, en þeir ætla að sigla síðasta áfanga á heimssiglingu skútu frá Bremen, sem kemur hingað frá Halifax og verður þá skipt um áhöfn. Síðdegis flaug ég til Vestmannaeyja á SUS-þingið og tók síðasta áætlunarflug til baka um kvöldið.

Klukkan 9.30 fór ég á fund með kennurum í Iðnskólanum í Reykjavík, sem voru að koma til fyrsta starfsdags eftir sumarleyfi. Hafði ég verið beðinn að ræða um þróun framhaldsskólastigsins og svara fyrirspurnum. Var þetta fjölmennur og ánægjulegur fundur.

Messa klukkan 13.30 á Laugardalsvelli, upphaf kristnihátíðar í Reykjavíkurprófastdæmi. Veðrið var milt og gott og sagði útvarpið, að um 6000 manns hefðu tekið þátt í messunni.