Þessi dagur fór verulega úr skorðum, ef svo má orða það, vegna afgreiðslu laganna til lausnar sjómannadeilunni á þingi. Vegna atkvæðagreiðslu aflýsti ég bæði þátttöku minni í aðalfundi Sparisjóðs Reykjavíkur og nágrennis og för minni í Þjóðleikhúsið til að horfa á frumsýningu á nýju leikriti eftir Birgi Sigurðsson. Klukkan 14.30 efndi ég til blaðamannafundar til að kynna úttekt á kennaramenntastofnunum þremur, Kennraháskóla Íslands, Háskóla Íslands og Háskólanum á Akureyri.

Klukkan 13.30 fór ég í Listasafn Einars Jónssonar og skoðaði það með Hrafnhildi Schram forstöðumanni og Ármanni Snævar stjórnarformanni eftir gangerar endurbætur innan húss og utan. Er gleðilegt að sjá, að tekist hafi að varna stórfelldum skemmdum á þessu merka safni. Klukkan 15.00 sat ég fund í boði Hins íslenska kennarafélags til að ræða um nýju skólastefnuna. Voru þar forráðamenn HÍK og formenn fagfélaga og voru umræðurnar hinar gagnlegustu.

Klukkan 16.00 boðaði menntamálaráðuneytið fulltrúa í 7 starfsgreinaráðum af 14 til fundar í Ársal Hótel Sögu. Sátu rúmlega 100 manns fundinn og var þessum fyrstu ráðum ýtt þar úr vör. Bind ég miklar vonir við störf þeirra í þágu starfsmenntunar, en ráðin eiga meðal annars að gera tillögur um námskrár einstakra starfsgreina. Um kvöldið var Kastljós-þáttur í sjónvarpinu undir stjórn Ernu Indriðadóttur um nýju skólastefnuna. Hef ég orðið var við, að hann hafi mælst vel fyrir. Sjálfum þótti mér hann vel gerður.

Klukkan 16.00 boðaði menntamálaráðuneytið fulltrúa í 7 starfsgreinaráðum af 14 til fundar í Ársal Hótel Sögu. Sátu rúmlega 100 manns fundinn og var þessum fyrstu ráðum ýtt þar úr vör. Bind ég miklar vonir við störf þeirra í þágu starfsmenntunar, en ráðin eiga meðal annars að gera tillögur um námskrár einstakra starfsgreina. Um kvöldið var Kastljós-þáttur í sjónvarpinu undir stjórn Ernu Indriðadóttur um nýju skólastefnuna. Hef ég orðið var við, að hann hafi mælst vel fyrir. Sjálfum þótti mér hann vel gerður.

Um kvöldið fór ég á fund um nýju skólastefnuna í Mýrarhúsaskóla á Seltjarnanesi. Var hann skipulagður af sjálfstæðismönnum í bænum. Fjölmennti fólk úr öllum stjórnmálaflokkum til að ræða málið.

Vegna veðurs aflýsti ég í annað sinn auglýstum fundi um nýju skólastefnuna á Akureyri. Er þetta síðasti fundurinn um málið, sem ráðuneytið skipuleggur og frestaði ég honum fram á síðdegi fimmtudagsins 2. apríl.

Klukkan 11 fórum við með vél Flugmálastjórnar til Sauðárkróks. Þegar ég vaknaði og hlustaði á fyrstu veðurfréttir var ég sannfærður um, að ég yrði að aka norður til að komast þar á fund klukkan 14.00. Ég var í þann mund að leggja af stað, þegar sagt var, að unnt yrði að fljúga. Nokkuð hvasst var þegar við lentum og töldu menn á jörðu niðri, að vélin myndi ekki lenda. Allt gekk þó að óskum enda vanir menn við stjórnvölinn og fundum við raunar meira fyrir vindinum, þegar farið á loft um fimmleytið, þótt þá hefði mikið lægt. Fundurinn á Sauðárkróki var haldinn í Kaffi Krókur og var salurinn þéttsetinn. Nokkrir komu alla leið frá Hvammstanga til fundarins.

Klukkan 16.00 kom það í minn hlut að opna sýninguna Matur '98 í Smáranum. Var skemmtilegt og fróðlegt að ganga á milli sýningarbása og kynnast því, sem í boði var. Klukkan 18.00 sat í fyrir svörum í þjóðarsálinni á Rás 2 en Sigríður Arnardóttir stjórnaði þættinum. Hringdu fjölmargir. Klukkan 20.00 var skólastefnufundur í Skútunni í Hafnarfirði. Þar var einnig þéttsetinn salur og margir tóku til máls.Var sérstaklega ánægjulegt, hve margir foreldrar létu í sér heyra á fundinum.

Fórum á skólastefnufund á Selfossi. Var hann haldinn í hótelinu þar og hófst klukkan 20. Var þéttsetinn salur og urðu miklar umræður. Fyrir fundinn fór ég í hálftímaviðtal við Valdimar Bragason í Svæðisútvarpi Suðurlands, sem er einkastöð og nær til alls Suðurlands, þar með Vestmannaeyja.

Við Rut fórum á námskynningu í Háskóla Íslands, það er í tveimur húsum, Odda og Árnastofnun. Þaðan héldum við síðan í opið hús í Borgarholtsskóla. Á báðum stöðum var margt um manninn.

Ók um morguninn með Ólafi Ragnarssyni, sveitarstjóra á Djúpavogi, til Fáskrúðsfjarðar, þar sem ég efndi klukkan 10.30 til fundar um hina nyju skólastefnu í hótelinu. Var hann vel sóttur og urðu góðar umræður. Um klukkan 13.00 héldum við Ólafur áfram leið okkar í fögru en köldu veðri til Egilsstaða, þar sem menntamálaráðuneytið hafði boðað til fyrsta almenna fundarins um nyju skólastefnuna klukkan 15.00. Var hann haldinn í hinu nýja hóteli við góðar aðstæður og var fundurinn vel sóttur. Fór ég heim með kvöldvélinni frá Egilsstöðum og lenti hún um kl. 21.00

Klukkan 12.00 athöfn í þjóðarbókhlöðunni við upphaf Framadaga námsmanna, þar sem ég flutti stutt ávarp. Klukkan 14.00 flogið til Hafnar í Hornafirði, þar sem Egill Jónsson alþingismaður tók á móti mér. Við fórum síðan í grunnskólann, þar sem ég ræddi um skólamál við forystumenn sveitarfélagsins og skólamenn. Síðan ókum við Egill til Djúpavogs, þar var fundur í Löngubúð um kvöldið, þar sem ég skyrði hina nyju skólastefnu og tók þátt í líflegum umræðum. Var sérstaklega ánægjulegt að koma til Djúpavogs og ekki síst að sjá, hve vel hefur tekist til við að endurreisa Löngubúð.

Ragnhildur Sverrisdóttir kom fyrir hádegi og tók viðtal um hina nyju skólastefnu fyrir Morgunblaðið, sem birtist í sunnudagsblaði þess. Klukkan 20.00 ÍR-mót í stangarstökki kvenna og hástökki karla í Laugardalshöll.

Klukkan 13.30 svaraði ég fyrirspurn Svanfríðar Jónasdóttur á Alþingi um umræður um skólamál eftir að birtar voru niðurstöður samræmdra prófa í einstökum skólum. Klukkan 14.00 tók ég þátt í athöfn og flutti stutt ávarp í Íþróttamiðstöðinni í Laugardal, þegar Landslið Íslands gegn fíknefnum var kynnt, en þetta var upphaf skipulegs forvarnarstarfs íþróttahreyfingarinnar. Klukkan 15.15 hófst blaðamannafundur um hina nyju skólastefnu í Fjölbrautaskólanum í Garðabæ. Klukkan 19.30 hófst kvöldverður til heiðurs Völu Flosadóttur í Ráðherrabústaðnum.

Klukkan 13.30 voru umræður utan dagskrár á Alþingi um íslenska skólakerfið í ljósi TIMSS-skýrslnanna og var Svanfríður Jónasdóttir þingflokki jafnaðarmanna málshefjandi. Klukkan 21.30 vorum við Rut komin út á Keflavíkurflugvöll til að taka á móti Völu Flosadóttur.

Formenn Hins íslenska kennarafélags, Kennarasambands Íslands, fulltrúar Rafiðnaðarskólans og Viðskipta- tölvuskólans komu í ráðuneytið og rituðu með mér undir samkomulag um endurmenntun framhaldsskólakennara að því er varðar tölvunotkun. Klukkan 17.00 efndi þingvallanefnd til fundar með fulltrúum frá landeigendum við þingvallavatn og kynnti þeim áform um stækkun þjóðgarðsins og verndun vatnasviðsins.

Eftir of langt hlé gafst mér tóm til að skjótast í bíó og sá myndina Sjö ár í Tíbet en bókina las ég fyrir mörgum árum, því að Bókfellsútgáfan gaf hana út á sjötta áratugnum, ef ég man rétt. Lýsir hún einstæðri för til Tíbets og kynnum að þjóðinni og Dalai Lama, þeim sem enn lifir, ungum. Þá kynnumst við einnig eyðileggingarstefnu Kínverja í Tíbet, þar sem þeir hafa nú í fimm áratugi keppst við að eyðileggja þetta friðsama og trúaða þjóðfélag. Framganga kínversku kommúnistanna í Tíbet er þeim til ævarndi skammar en gagnrýni á þjóðarútrýmingarstefnuna þar svara þeir jafnan með þeim hroka, sem þeim einum er laginn og við kynntumst, þegar Tævanir sóttu okkur heim síðastliðið haust. Þótti mér leiðinlegt, hve fáir voru í salnum til að sjá þessa fróðlegu og sönnu mynd.

Fyrir hádegi fór ég í Laugarnesskólann og heimsæki þar bekkinn, sem kemur fram í auglýsingamynd ráðuneytisins vegna námskrárkynningarinnar. Var það mjög skemmtileg stund með krökkunum og vinsamlega á móti okkur tekið af Jóni Frey Þórarinssyni skólastjóra. Klukkan 15.00 fór ég í Menntaskólann í Reykjavík og fór þar um með Ragnheiði Torfadóttur rektor til að átta mig á þeim miklu framkvæmdum, sem nú standa fyrir dyrum við skólann. Klukkan 17.00 fór ég í Kennaraháskóla Íslands til að fagna því, að fyrstu íbúðirnar voru formlega teknar í notkun í nýjum stúdentagörðum Byggingarfélags námsmanna við Bólstaðarhlíð, en ég tók þar fyrstu skóflustungu 28. febrúar 1997.

Klukkan 14.00 efnir Þingvallanefnd til fundar með sveitarstjórnarmönnum í uppsveitum Árnessýslu um stækkun þjóðgarðsins.

Um kvöldið var í ég stjórnmálaskóla Sjálfstæðisflokksins og ræddi um menntamál.

Við Rut förum í nokkurra daga frí til Bretlands og heimsækjum meðal annars gamlan og góðan vin okkar, Kenneth East, sem var sendiherra Breta hér í síðasta þorskastríðinu og varð að gera hlé á störfum sínum, þegar stjórnmálasambandi landanna var slitið vorið 1976.

Klukkan 13.30 útför Halldórs Kiljans Laxness og erfidrykkja. Klukkan 20 frumsýning í Skemmtihúsinu á leikriti um Guðríði Þorbjarnadóttur eftir Brynju Benediktsdóttur.

Fyrir hádegi þrjú frumvörp til umræðu á Alþingi. Klukkan 18.00 samverustund Bandalags íslenskra listamanna til minningar um Halldór Laxness á Ingfólfstorgi.

Klukkan 15.30 tveimur fyrirspurnum svarað á Alþingi. Klukkan 20 frumsýning á Meiri gauragangi í Þjóðleikhúsinu.

Klukkan 17 var brjóstmynd af frú Vigdísi Finnbogadóttur afjúpuð í Ráðherrabústaðnum. Klukkan 19 var í Íslandi í dag í Stöð 2 og ræddi um stjórnmálaafskipti Halldór Laxness.

Klukkan 14 fórum á Háskólahátíð í Háskólabíói og þáðum kaffi í boði rektors að athöfninni lokinni, er það góð nýbreytni og gefur mönnum færi á að hittast á annan hátt en þann að ganga saman í prósessíu inn og út úr salnum. Eftir hátíðina fórum við í Gerðarsafn, þar sem Baltazar var að opna mikla sýningu í öllum sölum hússins. Er undarlegur norna-óhugnaður í sumum málverkanna, en þau eru alls 32. Þaðan fórum við í Hafnarborg þar sem Björg Þorsteinsdóttir var að opna sýningu á vatnslitamyndum og Kristján Jónsson var einnig að opna sýningu á málverkum sínum, sem tengjast meðal annars húsum í Reykjavík með sérkennilegum og skemmtilegum hætti. Klukkan 20 fórum við í Borgarleikhúsið til að vera við frumsýningu hjá Íslenska dansflokknum, sem minntist jafnframt 25 ára afmælis síns. Þrjú verk voru á dagskránni. Hið fyrsta við tónlist eftir Arvo Pärt og hafði Rut einmitt farið með Pärt á æfingu hjá dansflokknum og hann séð verkið í fyrsta sinn sér til gleði. Danshöfundurinn Ed Wubbe var við frumsýninguna í Borgarleikhúsinu og var hann undrandi og glaður yfir því,. að Pärt hefði fyrst fengið tækifæri hér til að sjá verk sitt. Þegar ég tók við sem menntamálaráðherra var mikil óvissa um framtíð Íslenska dansflokksins. Hann var í skipulagslegri, fjárhagslegri og húsnæðislegri kreppu. Ný stjórn sem ég setti yfir flokkinn hefur unnið þrekvirki á tveimur árum. Magnús Árni Skúlason framkvæmdastjóri hefur siglt skipinu af öryggi frá degi til dags, en hann hefur nú sagt starfi sínu lausu og hefur verið auglýst eftir nýjum framkvæmdastjóra. Skipulagið er í réttri þróun. Fjárhagslega hefur verið tekið til hendi. Dansflokkurinn hefur fengið samstað í Borgarleikhúsinu. Síðast en ekki síst hefur verið mótuð ný listræn stefna undir forystu Katrínar Hall og skilaði hún sér vel í sýningunni á laugardag. Frumsýningarkvöldið gekk ekki áfallalaust að þessu sinni frekar en kvöldið áður, því að ekki var unnt að draga upp tjaldið eftir hlé vegna bilunar í tölvu - gekk það erfiðlega í upphafi sýningarinnar en alls ekki eftir hlé. Voru áhorfendur sendir úr salnum eftir að þeir höfðu sest að loknu hléi og beðið það í um 20 mínútur. Gengu menn þá til þess verks að fella tjaldið í orðsins fyllstu merkingu og var salurinn opnaður að nýju, eftir að tjaldið hafði verið fjarlægt. Var hléð um klukkustund á þessari sýningu, ívið lengra en kvöldið áður.

Klukkan 20 fórum við í Íslensku óperuna og horfðum á Ástardrykkinn. Fréttnæmt þótti, að ítalski tenórinn var með hálsbólgu og varð að lengja hléð um helming meðan farið var með hann á sjúkarhús til rannsókna, söng hann þó verkið á enda Jóni Ásgeirssyni gagnrýnanda Morgunblaðsins til lítillar gleði eins og sjá má í blaðinu í dag. Sýningin var lífleg og skemmtileg.

Klukkan 16.00 efndi Rannsóknarráð Íslands til athafnar í Þjóðarbókhlöðunni í tilefni af því, að rannsóknagagnasafn þess var opnað á netinu. Kom það í minn hlut að skrá mig sem fyrsta notandann. Gagnasafnið er vistað hjá Miðheimum-Skímu og gat ég talað af eigin reynslu í um það bil þrjú ár, þegar ég sagði, að allan þann tíma hefði ég vistað vefsíðu mína hjá Miðheimum og aldrei lent í neinum vandræðum. Klukkan 17.00 var athöfn í Listasafni Íslands, þar sem forseti Íslands afhenti menningarverðlaun VÍS en Kjartan Gunnarsson, stjórnarformaður VÍS, kynnti verðlaunahafa og bauð til kampavínsveislu.

Klukkan 13.15 flutti ég ræðu á fundi á vegum Samtaka iðnaðarins um menntamál. Á Alþingi svaraði ég fyrirspurn frá Össuri Skarphéðinssyni um fjöldatakmarkanir í læknadeild Háskóla Íslands. Klukkan 17 tók ég þátt í hátíðlegri athöfn á vegum Skýrslutæknifélags Íslands vegna útgáfu á Tölvuorðasafni. Er þetta fjórða útgáfa orðasafnsins, hin veglegasta bók. Verður það ekki fullþakkað, að menn skuli leggja jafn hart að sér og gert hefur verið við þessa miklu vinnu að þýða tækniorð og hugtök á íslensku. Í ræðum manna við athöfnina kom fram eindreginn vilji til að beita sér fyrir því, að stýrikerfi í tölvum verði íslenskað. Miklar umræður hafa farið fram um þetta mál á netinu undanfarið. Klukkan 20 fórum við í Borgarleikhúsið, en þar var á Litla sviðinu frumsýnt leikrit eftir Nicky Silver, Feitir menn í pilsum. Hafi það verið ætlun höfundarins að ganga fram af áhorfendum tókst það gagnvart okkur.

Klukkan 10 fyrir hádegi fór ég í Perluna og var viðstaddur, þegar ritað var undir samning Íslenskrar erfðagreiningar og svissneska fyrirtækisins Hoffmann-la Roche. Á sama tíma var athöfn í Norræna húsinu, þar sem ritað var undir samning milli fyrirtækisins Hugvit og IBM, sem byggist á hugbúnaðarvinnu Hugvits. Báðir þessir samningar eru stórmerkilegir og sýna, að Íslendingar standa framarlega í læknis- og líffræði og tölvunarfræðum. Klukkan 17. 00 voru íslensku bórkmenntaverðlaunin afhent þeim Guðbergi Bergssyni og Guðjóni Friðrikssyni við hátíðlega athöfn á Bessastöðum.