Klukkan 18.00 fór ég í Kristskirkju og hlustað á Voces Thules flytja þriðja þátt Þorlákstíða. Var sérkennileg reynsla að kynnast þessum forna kristna menningararfi okkar Íslendinga á nýjan leik og á Voces Thules mikið lof skilið fyrir framtakið.

Klukkan 16 fórum við í Árnastofnun, þar sem opnuð var fróðleg sýning á handritum og sérstök kynning á Þorlákstíðum. Klukkan 18.00 fórum við í Kristskirkju og hlýddum á Voces Thules flytja Þorlákstíðir.

Síðdegis kom það í minn hlut að opna sýninguna Trú og tónlist í íslenskum handritum í Þjóðarbókhlöðunni.

Síðdegis fór ég upp á Akranes og ritaði þar undir skólasamning milli ráðuneytisins og Fjölbrautaskóla Vesturlands á Akranesi (FVA) og einnig samning við sveitarfélaög um nýbyggingu við skólann. Var þetta liður í skólaslitaathöfn skólans og ávarpaði ég samkomuna. Við fengum leyfi til að aka í gegnum göngin undir Hvalfjörð. Eru göngin ótrúlega mikil samgöngubót og líklega ógjörningur að gera sér ljóst, hvaða áhrif þau hafa, þegar fram líða stundir.

Um kvöldið fórum við á sýningu Nederlands Dans Theater í Borgarleikhúsinu. Ríkti þar mikil hrifning.

Klukkan 14.00 ritaði ég undir samning við ÍSÍ um aðild ríkisins að Afreksmannasjóði með 10 m. kr. framlagi á ári næstu fimm ár. Þar með var farsæll endir fundinn á gömlu og miklu baráttumáli ÍSÍ. Er ég viss um, að þessi samningur á eftir að nýtast íslenskum afreksmönnum í íþróttum vel. Klukkan 16.00 ritaði ég undir samning samning við Bandalag kvenna í Reykjavík um að það taki við rekstri Hússtjórnarskólans í Reykjavík. Jafnframt var formlega lokið samningsgerð um að fjórir aðilar á Austurlandi taki að sér að reka Hússtjórnarskólans á Hallormsstað. Eru þetta þar með orðnir einkaskólar, sem starfa á grundvelli samnings við ríkissjóð. Klukkan 17.00 fór ég í Háteigsskóla og flutti ræðu um nýja skólastefnu á aðalfundi SAMFOKS, það er samtaka foreldrafélaga við skóla í Reykjavík. Um kvöldið fórum við á tónleika Chillingirian strengjakvartettsins í Íslensku óperunni en Einar Jóhannesson lék einnig með kvartettinum á klarinett í kvintett eftir Mozart. Þetta voru einnig sannkallaðir Listahátíðartónleikar.

Um kvöldið fórum við á tónleika Listahátíðar í Hallgrímskirkju, þar sem Jordi Savall, Montserrat Figueras og Rolf Lislevand léku og sungu. Tek ég undir með gagnrýnandanum, sem taldi þetta þetta sannkallaða LIstahátíðartónleika.

Eftir að hafa kosið hófumst við handa við lokaundirbúning vegna veislu fyrir Bjarna Benedikt son okkar, sem varð stúdent frá Menntaskólanum við Hamrahlíð þennan dag. Eftir hátíðlega athöfn í skólanum buðum við fjölda gesta heim til okkar.

Klukkan 20 fórum við í Menntaskólann við Hamrahlíð, þar sem kór skólans og Hamrahlíðakórinn héldu upp á 30 ára afmæli skólakórsins. Er í raun einstakt, að Þorgerði Ingólfsdóttur, mágkonu minni, skuli hafa tekist að halda út með jafnmiklum ágætum jafnlengi. Á hverju hausti hefst hún handa við að smíða þetta hljóðfæri með nýjum röddum, en hún slær aldrei af kröfunum og árangurinn er alltaf í samræmi við það.

Klukkan 15.00 fór ég Íslandsbanka og tók þar þátt í árlegri athöfn, þegar bankinn afhendir námsstyrki. Á heimleið kom ég við í Einholtsskóla, sem hélt upp á 10 ára afmæli sitt. Var fróðlegt að kynnast þessum skóla, sem gegnir mjög mikilvægu hlutverki í grunnskólakerfinu.

Klukkan 16.00 var fundur í Ársal Hótel Sögu, þar sem saman komu fulltrúar í 7 starfsgreinaráðum, sem eru að taka til starfa. Starfsgreinaráð gegna lykilhlutverki við skipulag á starfsnámi í framhaldsskólum. Eru alls 14 slík ráð nú tekin til starfa. Er þessum þætti við nýskipan starfsnámsins þar með lokið. Markar þetta þáttaskil í þróun starfsnáms og verður mjög spennandi að sjá hvaða áhrif þessi nýskipan hefur. Menntamálaráðuneytið boðaði til þessa fundar og flutti ég þar ræðu auk embættismanna. Klukkan 20 fórum við Rut í Þjóðleikhúsið og horfðum á Le Cercle Invisible, það er ósýnilega sirkusinn. Var það skemmtileg kvöldstund og gott framlag til Listahátíðar, sérstaklega var gaman að fylgjast með því, hve börnin í salnum lifðu sig inn í það, sem gerðist á sviðinu.

Klukkan 9 um morgunin fórum við Rut út á Reykjavíkurflugvöll og kvöddum Margréti Danadrottningu og Henrik prins. Atkvæðagreiðsla var á Alþingi fram yfir hádegi og var þá húsnæðisfrumvarpið afgreitt til 3. umræðu. Síðdegis héldum við Árni Johnsen til Víkur í Mýrdal, þar sem við efndum til fundar um kvöldið í Víkurskálanum og ræddum skólamál og stjórnmál almennt. Vorum við komnir heim milli eitt og tvö um nóttina.

Fórum klukkan 10.30 í dansk-íslenska messu í Dómkirkjunni. Klukkan 15.00 kom það í minn hlut að opna sýningu á verkum Max Ernst og um listamanninn í Listasafni Íslands. Síðan fórum við í kosningakaffi sjálfstæðismanna í Valhöll. Klukkan 20 voru síðan hátíðartónleikar til heiðurs Danadrottningu á vegum Listahátíðar í Þjóðleikhúsinu.

Fórum klukkan 10.30 í dansk-íslenska messu í Dómkirkjunni. Klukkan 15.00 kom það í minn hlut að opna sýningu á verkum Max Ernst og um listamanninn í Listasafni Íslands. Síðan fórum við í kosningakaffi sjálfstæðismanna í Valhöll. Klukkan 20 voru síðan hátíðartónleikar til heiðurs Danadrottningu á vegum Listahátíðar í Þjóðleikhúsinu.

Klukkan 9.30 fórum við í Kringluna og opnaði ég þar nýtt sýningarsvæði á vegum Foldu og Kringlunnar. Hófu félagar í Leirlistarfélaginu að nýta þessa aðstöðu, sem er þannig að segja má, að gestir Kringluna gangi á milli listaverkanna. Klukkan 12.00 þáðum við hádegisverðarboð Margrétar Danadrottningar í snekkju hennar, Dannebrog, við Faxagarð í Reykjavíkurhöfn. Var þar allt með einstökum glæsibrag. Að loknum málsverði gengum við með drottningunni, eiginmanni hennar og forsetahjónunum að Hafnarhúsinu. Var mikill fjöldi fólks á hafnarbakkanum að fagna drottningunni. Var uppstytta og sól, þegar við gengum þessa leið. Listahátíð var sett í porti Hafnarhússins. Þar stigu afrískir listamenn frá Togo, sögðu einhverjir, að þetta hefði verið regndans. Þegar borgarstjóri flutti seinni ræðu sína við athöfnina og var að opna sýningu á verkum Erró í Hafnarhúsinu, skall mikið hagél á gestum í portinu. Kom hjálpsamur maður hlaupandi með regnhlíf til okkar Rutar. borgarstjóri hélt áfram að tala, þótt varla heyrðist til hennar, þegar haglið skall á regnhlífum og stéttinni. Líklega hafa gestirnir frá Togo orðið mest undrandi, þar sem þeir stóðu léttklæddir og horfðu á hvítu kornin, sem komu af himni. Síðan flýttu allir sér inn í húsið og skoðuðu myndir Errós. Við Rut höfðum þar stutta viðdvöl en skruppum heim og þegar við komum upp að Snorrabraut virtist ekki nein úrkoma hafa orðið þar. Klukkan 16.00 var sýning Margrétar drottningar á kirkjuklæðum opnuð í Bogasal Þjóðminjasafnsins. Kom það í minn hlut að flytja þar ræðu ásamt herra Karli Sigurbjörnssyni biskupi. Drottning bauð síðan gestum að skoða sýningu sína, sem er mjög fallleg. Klukkan 19.30 var síðan kvöldverður fyrir drottningu og fylgdarlið hennar á Bessastöðum í boði forsetahjónanna.

Klukkan 12.00 vorum við Rut á Reykjavíkurflugvelli til að taka á móti Margréti Danadrottningu og Henrik prins. Það gekk á með skúrum í hvassviðrinu. Pappírsflöggin sem blessuð leikskólabörnin héldu á úti við rauða dregilinn blotnuðu svo fljótt, að sum héldu bara á prikinu, þegar drottningin birtist. Klukkan 13.30 var Menningarnet Íslands opnað við hátíðlega athöfn í Listasafni Íslands. Stefna ráðuneytisins um að opna þetta net var mótuð í ársbyrjun 1996 og síðan hafa margir lagt hönd á plóginn. Vefsíðan er í vörslu Skímu og dr. Gunnar Harðarson er formaður stjórnar Menningarnets Íslands. Hér er um merk þáttaskil í menningarsögunni að ræða, því að netið á eftir að vaxa og dafna. Verður það ómetanlegur vettvangur til að kynna íslenska menningu og stuðla að auknum samskiptum milli stofnana.

Að venju var almennur viðtalstími minn í ráðuneytinu um morguninn og tók ég á móti mörgum viðmælendum. Tekst mér enn að halda listanum yfir þá, sem vilja ræða við mig innan hóflegra marka. Nokkur röskun hefur þó orðið undanfarið vegna utanferða og óvissu um þingstörfin. Til dæmis þurfti ég að rjúka úr viðtalstímanum þessa morgunstund vegna þess að boðað var til atkvæðagreiðslu á Alþingi, af henni varð þó ekki á boðuðum tíma vegna athugasemda stjórnarandstöðunnar. Tek ég undir það með Pétri Blöndal, að Alþingi er sá vinnustaður, þar sem minnst virðing er borin fyrir tíma manna, er hann þó ein dýrmætasta eign hvers og eins. Þessari eign er sóað á þessum vinnustað. Um kvöldið fórum við í Iðnó, sem opnað var endurgert að nýju. Eru þar hin glæsilegustu húsakynni.

Rikisstjórnin samþykkti á fundi sínum tillögu mína varðandi skipun stjórnar Listaháskóla Íslands. Var skýrt frá þeirri niðurstöðu þennan dag og jafnframt hélt Félag um listaháskóla aðalfund sinn og kaus þrjá menn í stjórn. Er stjórn skólans nú fullskipuð. Verður Stefán P. Eggertsson verkfræðingur formaður hennar. Klukkan 15.00 fór ég í Kvikmyndasafnið í Hafnarfirði. Þar hefur nú verið búið vel um það í gamla frystihúsi Bæjarútgerðarinnar. Einnig er unnið að því að breyta Bæjarbíói í sitt upprunalega horf eftir því sem kostur er. Verður þarna mjög góð aðstaða til að sinna þessum þætti kvikmyndasögunnar og kynna hana fyrir þeim, sem vilja afla sér þess fróðleiks. Klukkan 21 fór ég á fund hjá foreldrafélagi í Hofsstaðaskóla í Garðabæ og ræddi þar um nýja skólastefnu og svaraði spurningum á skemmtilegum fundi.

Klukkan 15.00 fór ég í Borgartún 6 og opnaði þar heimasíðu Ríkisútvarpsins og Ljósmyndasafns Reykjavíkur um hernámsárin.

Klukkan 14.00 var hátíð í Borgarleikhúsinu, þar sem ég afhenti nýsköpunarverðlaun til grunnskólanemenda og bauð síðan í kökur og kaffi og djús. Klukkan 16.00 fórum við á tónleika Karlakórs Reykjavíkur í Langholtskirkju, Maísönginn, og hylltum jafnframt Pál Pamplicher Pálsson tónskáld sjötugan.

Klukkan 9 um morgunin sótti ég fund Samiðnar á Grand hótel og ræddi um menntamál og starfsnám. Þennan dag kom aftur dálítill skriður á gang mála á Alþingi, þegar 2. umræðu um sveitarstjórnalögin lauk, greidd voru atkvæði um málið og því vísað til 3. umræðu. Stjórnarandstaðan hafði haldið uppi málþófi alla vikuna. Er málatilbúnaður hennar ósannfærandi, þegar litið er á forsögu sveitarstjórnalaganna og áformin um hálendið. Held ég, að þeir, sem hafa snúist af þessari hörku gegn sveitarstjórnalögunum, séu á villigötum, þegar litið er á efni málsins. Hafi ætlunin verið að koma höggi á stjórnarflokkana með þessum löngu ræðum, misheppnaðist það gjörsamlega. Um kvöldmatarleytið varð frumvarp um stjórn veiða úr norsk-íslenska síldarstofninum að lögum.

Um kvöldmatarleytið fór ég í Rotary-klúbbinn í Árbæ og ræddi nýju skólastefnuna.

Svaraði fyrirspurn á Alþingi um menntun kennara.

Síðdegis fórum við Rut í Háskólabíó, þar sem tónlistarskólar kynntu starfsemi sína með tónleikum nemenda úr þeim.

Klukkan 13.00 setti ég Íslandsmót í samkvæmisdansi í íþróttahúsinu við Strandgötu í Hafnarfirði. Síðan fórum við í Hafnarborg, þar sem Jónína Guðnadóttir var að opna sýningu á innsetningum og lágmyndum. Klukkan 17.00 vorum við aftur komin í Hafnarfjörð til að taka þátt í barnakóramóti bæjarins, sem fór fram í Víðistaðakirkju.

Flugum heim frá München í gegnum Frankfurt og buðum síðan í afmæliskaffi um kvöldið til að minnast 90 ára afmælisdags föður míns.

Klukkan 8.20 hélt flugvélin af stað með okkur frá Köln til München en klukkan 11.30 hófst þar minningarathöfn í einum af kirkjugörðum borgarinnar við leiði dr. Konrads Maurers, prófessors og Íslandsvinar, sem ferðaðist um Ísland árið 1858 og ritaði ferðabók, en Ferðafélag Íslands gaf hana út á síðasta ári í þýðingu Baldurs Hafstaðs. (Mæli ég eindregið með bókinni, því að hún bregður upp mjög góðri mynd af Íslandi á þessum tíma.) Maurer studdi okkur auk þess eindregið í sjálfstæðisbaráttunni við Dani og var vinur Jóns Sigurðssonar auk þess sem hann hvatti til þess, að þjóðsögum væri skipulega safnað hér á landi og bjargaði þannig miklum menningarverðmætum frá glötun. Tæplega hundrað manns tóku þátt í þessari hátíðlegu klukkustundarathöfn í kirkjugarðinum og voru margar ræður fluttar, kom það í minn hlut að tala um Maurer og Ísland. Prófessor Kurt Schier, sem hefur kennt norræn fræði í München og er óþreytandi við að halda íslenskri menningu á loft í Þýskalandi, var driffjöðurinn á bakvið þessa athöfn í München en Ferðafélag Íslands gaf þrjá bautasteina sem hafa verið settir upp á gröf Maurers og konu hans með áletrun á þýsku og íslensku. Er íslenski textinn þannig: Brautryðjandi á sviði norrænna fornfræða, frumkvöðull í frelsisbaráttu Íslendinga, velgjörðarmaður Íslands. Að lokinni minningarstundinni buðu sendiherrahjónin öllum viðstöddum til hádegisverðar í nálægu hóteli.

Snemma morguns fór ég í utanríkisráðuneytið í Bonn með Helga Ágústssyni, ráðuneytisstjóra í utanríkisráðuneytinu, og Ingimundi Sigfússyni sendiherra. Hittum við þar Helmut Schäfer, varautanríkisráðherra og þingmann frjáslra demókrata, en hann fer meðal annars með menningarmál innan utanríkisráðuneytisins, og tvo embættismenn ráðuneytisins. Ræddum við menningarsamskipti Íslands og Þýskalands í ljósi þeirrar ákvörðunar Þjóðverja að loka Goethe-stofnuninni á Íslandi. Er ljóst, að Þjóðverjar hafa alls ekki í hyggju að draga úr menningarsamskiptum við Ísland, þótt stofnuninni hafi verið lokað. Eru þeir með áform um að standa að rekstri þýsks bókasafns og styðja almennt menningarstamstarf þjóðanna. Um hádegið hitti ég síðan Hans Friedrich von Ploetz, ráðuneytisstjóra í þýska utanríkisráðuneytinu, og ræddum við almennt um alþjóðamál og sérstaklega um menningarsamskipti Íslands og Þýskalands. Þá flutti ég ræðu í hádegisverðarboði Ingimundar Sigfússonar sendiherra við upphaf ráðstefnu fyrir ræðismenn Íslands í Þýskalandi, Austurríki og Sviss. Komu þeir saman á dagsfundi til að fjalla um ýmis málefni tengd Íslandi og fengu ræðumenn héðan til þess. Um kvöldið var glæsilegur kvöldverður á heimili sendiherrahjónanna Ingimundar og Valgerðar Valsdóttur, þar sem ritöfundarnir Einar Kárason og Einar Már Guðmundsson lásu úr nýútgefnum bókum sínum á þýsku (eru þeir á rúmlega tveggja vikna kynningarferð vegna bókanna í Þýskalandi og Austurríki á vegum útgefenda sinna í þessum löndum) og Rut lék á fiðlu.

Við Rut flugum til Lúxemborgar og ókum þaðan til Bonn í Þýskalandi.

Klukkan 10.00 fór ég á ráðstefnu Sjálfstæðisflokksins um sveitarstjórnamál í tilefni af komandi kosningum. Klukkan 14.00 opnaði ég formlega Viðskipta- og tölvuskólann í Reykjavík, sem er framsækinn einkaskóli, rekinn af miklum stórhug af rafiðnaðarmönnum; skóli á heimsmælikvarða að mínu mati. Í fréttum hljóvarps ríkisins um kvöldið heyrði ég að Ari Sigvaldason sagði frá þessum atburði án þess að lýsa honum með nokkrum hætti og ræddi frekar um næsta skref rafiðnaðarmanna um margmiðlunar- og fjarkennsluskóla. Klukkan 17.00 fór ég á tónleika Fílharmónukórsins í Langholtskirkju og var þar fram að hlé. Eftir tónleikana fór ég í 60 ára afmæli Óðins í Valhöll.