Mánudaginn 10. júní hitti ég hóp erlendra blaðamanna, sem voru hér í sambandi við norræna fundi. Þeir höfðu meiri áhuga á utanríkismálum og forsetakosningunum en mennta- og menningarmálum. Um kvöldið fór ég á Ljóðakvöld Listahátíðar í Loftkastalanum.

Síðdegis á annan í hvítasunnu, 27. maí, fórum við Rut í heimsókn í Iðnskólann í Hafnarfirði. Var það eini tíminn til að fá tækifæri til að skoða sýningu nemenda í hönnunardeild skólans. Að kvöldi 27. maí er síðan fyrirhuguð ferð í Þjóðleikhúsið til að sjá leikrit þeirra Skagfirðinga, Sumarið fyrir stríð.

Sunnudaginn 26. maí fór ég á leik Íslands og Danmerkur í körfubolta í Laugardalshöllinni.

Að kvöldi laugardagsins 25. maí fórum við Rut í leikhúsferð til Hafnarfjarðar og sáum hið margrómaða leikrit Himnaríki eftir Árna Ibsen.

Í hádegi sunnudaginn 14. apríl buðum við Völu Flosadóttur, Evrópumeistara í stangarstökki kvenna, til hádegisverðar í Ráherrabústaðnum. Með henni voru ungmenni, sem eru í Sidney 2000 hópi Frjálsíþróttasambands Íslands, þjálfari þeirra, stjórn sambandsins og móðir Völu.

Föstudaginn 12. apríl síðdegis skaust ég út af fyrirlestri Mayors í Háskóla Íslands, þegar hann var tekinn til við að svara fyrirspurnum, til að stjórna aðalfundi Sparisjóðs Reykjavíkur og nágrennis, sem ég hef gert í mörg ár. Að kvöldi föstudagsins fórum við á frumsýningu á leikriti Jónasar Árnasonar í Borgarleikhúsinu. Laugardagskvöldið fórum við síðan og sáum Þrjár stórar konur í Tjarnarbíói en það er eftir Edward Albee. Ólíkari verk er vart unnt að sjá.

Miðvikudaginn 10. apríl var Jónmundur Jensson, góður sjálfstæðismaður, jarðsunginn frá Neskirkju. Síðdegis fimmtudaginn 11. apríl kom fulltrúaráð Listahátíðar í Reykjavík saman til fundar og var dagskrá hennar samþykkt.

Tónleikar Hamrahlíðarkórsins í Listasafni Íslands þriðjudagskvöldið 9. apríl voru merkilegur viðburður. Þar voru eingöngu flutt lög eftir íslensk tónskáld.

Klukkan 10.30 að morgni sunnudags 10. mars fór ég biskupsmessu í Jósepskirkju í Hafnarfirði. Þar voru níu kaþólskir biskupar samankomnir.

Klukkan 9.30 að morgni laugardagsins 9. mars var ég við upphaf aðalfundar Bandalags íslenskra skáta og flutti þar ávarp. Þaðan fór ég beint til fundar við blaðamenn fréttablaða á landsbyggðinni, sem voru í endurmenntun í Tæknigarði hjá Sigrúnu Stefánsdóttur hjá Endurmenntunarstofnun HÍ. Ræddum við um skólamál í um það bil klukkustund. Klukkan 14 hófust menningardagar BÍSN með hátíðlegri athöfn í Kennaraháskóla Íslands. Um kvöldið var síðan árshátíð Heimdallar í Þjóðleikhúskjallaranum, þar sem við Rut vorum heiðursgestir. Birti ég ávarp mitt þar annars staðar á heimasíðunni.

Í hádegi föstudaginn 8. mars kom í minn hlut að opna Framadaga í Þjóðarbókhlöðunni með rektor Háskóla Íslands. Það er Aisec, félag viðskiptafræðinema við HÍ, sem stendur fyrir þessum dögum til að efla tengsl nemenda og fyrirtækja. Voru um 40 fyrirtæki með kynningar í Þjóðarbókhlöðunni og er framtakið enn til marks um dugnað nemenda. Síðdegis föstudaginn fór ég síðan í Borgarnes til að ræða um flutning grunnskólans við fulltrúa sveitarfélaganna.

Síðdegis á fimmtudag sótti ég aðalfund Eimskips, þar sem greint var frá frábærum árangri á síðasta ári. Að kvöldi fimmtudags var ánægjuleg frumsýning Herranætur MR á rússnesku leikriti, Sjálfsmorðingjanum.

Mánudag, þriðjudag og miðvikudag var ég í Kaupmannahöfn. Mánudag og fram að hádegi á þriðjudag sat ég fund Norðurlandaráðs um Evrópusamstarfið. Eftir hádegi á þriðjudag var fundur norrænna menntamálaráðherra og fyrir hádegi á miðvikudag norrænna menningarmálaráðherra. Á mánudagskvöld voru afhent bókmennta- og tónlistarverðlaun Norðurlandaráðs. Á þriðjudagskvöldið sá ég Amlóða-sögu, frumlegt leikrit eftir Svein Einarsson með íslenskum leikurum, sem sýnt var í Café Teatern í Kaupmannahöfn.