Miðvikudaginn 6. nóvember svaraði ég fyrirspurn á Alþingi um það, hvort unnið væri samkvæmt verkefnaáætlun gegn útlendingaandúð í skólum.

Eftir að hafa farið í messu til sr. Halldórs Gröndals síðdegis sunnudaginn 3. nóvember fórum við Rut í heimsókn í Tækniskóla Íslands, sem var með opið hús og kynnti fjölbreytt nám sitt. Þaðan fórum við á þrjár málverkasýningar og síðan í Þjóðminjasafnið á tónleika alþjóðlega tónlsitarhópsins Sequentia, sem flutti eddukvæði með eftirminnilegum hætti. Um kvöldið fór ég síðan í troðfulla Laugardalshöllina og sá landsleik Eista og Íslendinga í handbolta.

Laugardaginn 2. nóvember flutti ég ávarp við upphaf málþings um handverk í Norræna húsinu. Var þar fullt út úr dyrum, sem staðfestir hinn mikla og vaxandi áhuga, sem er á þessum málum hér á landi. Það var einnig troðið út úr dyrum í Háskólabíói síðdegis laugardaginn 2. nóvember á 80 ára afmælistónleikum Karlakórsins Fóstbræðra.

Föstudaginn 1. nóvember fór ég fyrir hádegi út af ríkisstjórnarfundi til að flytja ávarp við upphaf aðalfundar Skólastjórafélags Íslands.

Fimmtudaginn 24. október fór ég í heimsókn í Verslunarskóla Íslands. Ræddi við skólastjóra, fulltrúa skólanefndar og Verslunarráðsins, skoðaði skólann og ávarpaði nemendur á Marmara og síðan kennara í kaffistofu þeirra. Er ekki vafi á því, að þessi skóli, sem er eini einkaskólinn af 37 framhaldsskólum, stendur ákaflega vel að vígi. Lét ég í ljós áhuga á því að taka með einum eða öðrum hætti þátt í því, að unnt yrði að koma Verslunarháskóla á fót, en lóð undir hann bíður við hlið Verslunarskólans í Kringlunni. Síðdegis fimmtudaginn 24. október var ég síðan við upphaf Kvikmyndahátíðar í Reykjavík og sá myndina Brimbrot eftir Lars von Trier. Tek ég undir með þeim, sem telja hana í hópi merkari mynda.

Miðvikudaginn 23. október var efnt til fundar í Borgartúni 6 og bundinn endi á tæplega tíu ára starf við skipulag á Grímsnes- Grafnings- og Þingvallahreppum. Tók ég þátt í þeirri athöfn sem formaður Þingvallanefndar og ritaði undir skipulagsuppdráttinn.

Þriðjudaginn 22. október vorum við Rut viðstödd, þegar bókmenntaverðlaun kennd við Halldór Laxness voru afhent í fyrsta sinn. Flutti Skúli Björn Gunnarsson verðlaunaþegi skemmtilega ræðu, þegar hann þakkaði heiðurinn.

Laugardaginn 19. október tók ég klukkan 13 þátt í upphafi ráðstefnu á vegum útvarpsréttanefndar um ofbeldi á ljósvakanum. Flutti ég þar ræðu. Klukkan 18.00 þennan sama laugardag flutti ég ávarp við upphaf sýningar á verkum úr listaverkagjöf Ásgríms Jónssonar í Listasafni Íslands. Að kvöldi þessa sama dags fórum við á frumsýningu á leikritinu Svaninum á vegum Annars sviðs og Leikfélags Reykjavíkur á Litla sviðinu í Borgarleikhúsinu.

Mánudaginn 14. október milli 17 - 19 var ég í húsakynnum sjálfstæðismanna í Grafarvogi og ræddi við þá, sem þangað komu og vildu hitta mig. Var það skemmtileg stund.

Föstudagskvöldið 11. október fórum við í leikhús í Hafnarfirði og sáum Birting eftir Voltaire á mjög skemmtilegri sýningu.

Þriðjudaginn 8. október var 1. umræða fjárlaga og stóð hún frá hádegi fram yfir miðnætti. Nokkuð mæddi á mér vegna gagnrýni á framlög til menntamála. Er þó meira gert úr þeim sparnaði en efni standa til. Fyrr þennan sama dag tók ég þátt í fundi með skólameisturum framhaldsskóla af landinu öllu og ræddi við þá um þessi mál. Hinn 8. október síðdegis efndum við Rut til móttöku í Ráherrabústaðnum fyrir stjórn og verðlaunahafa Móðurmálssjóðs, ritstjóra og fréttastjóra, í tilefni af því, að 150 ár voru þann dag liðin frá fæðingu Björns Jónssonar, ritstjóra og ráðherra, enn Móðurmálssjóðurinn var stofnaður í minningu hans. Jónas Kristjánsson, ritstjóri DV, fékk verðlaun úr sjóðnum að þessu sinni.

Sunnudaginn 6. október flutti ég ávarp á 50 ára afmæli Fósturskóla Íslands og eftir það brugðum við Rut okkur á sex listsýningar í Reykjavík og Kópavogi

Laugardaginn 5. október skaust ég af menntaþingi út í Melaskóla og flutti ávarp á 50 ára afmælishátíð skólans.

Föstudaginn 4. október klukkan 16 var ég við upphaf Prentmessu í Laugardalshöll og flutti þar ávarp. Er ótrúlegt að fylgjast með tækniframförunum á þessu sviði.

Fimmtudagskvöldið 3. október fór ég á frumsýningu Djöflaeyjunnar mér til góðrar skemmtunar.

Strax eftir þingsetningu 1. október fór ég í 70 ára afmæli Ísaksskóla, þar sem afhjúpað var fallegt glerlistaverk eftir Leif Breiðfjörð.

Mánudaginn 30. september hélt Sjónvarpið upp á 30 ára afmæli sitt. Af því tilefni var ég kallaður í beina útsendingu í fréttatíma þess auk þess sem ég flutti ávarp í afmælishófi í sjónvarpshúsinu sama kvöld.

Síðdegis föstudaginn 6. september sátum við síðan 20 ára afmælishátíð félagsvísindadeildar Háskóla Íslands. Að morgni föstudagsins rammaði ég ríkisstjórnarfund inn með viðtali við Andreu Willi, utanríkisráðherra Liechtenstein, sem einnig fer með menningarmál í landi sínu, klukkan 9 og fulltrúa frá Hamborg klukkan 11.30, en þeir hafa verið hér í boði menntamálaráðuneytisins til að undirbúa kynningu á íslenskri barnamenningu í heimaborg sinni haustið 1997.

Síðdegis fimmtudaginn 5. september tókum við Rut þátt í hátíðarhöldum í nýja og glæsilega Hæstaréttarhúsinu

Miðvikudagsmorgna eru viðtalstímar hjá ráðherrum. Þegar þingið situr ekki veiti ég viðtöl allan miðvikudaginn.

Um hádegisbilið mánudaginn 2. september hélt ég til Kaupmannahafnar og sneri heim aftur með kvöldvélinni þriðjudaginn 3. september. Tilefnið var norrænn ráðherrafundur um 5. rammaáætlun Evrópusambandsins um rannsóknir og vísindi. Er unnið að þeirri stefnumótun um þessar mundir og hafa Norðurlöndin leitast við að samræma sjónarmið sín. Höfum við ráðherrarnir sent bréf til Edith Cresson, sem fer með þessi mál í framkvæmdastjórn ESB. Voru þau meðal annars til umræðu á fundinum í Kaupmannahöfn. Í tengslum við fundinn var ritað undir samkomulag milli ríkisstjórna Norðurlandanna um aðgang að háskólamenntun. Þar er gert ráð fyrir greiðsluskyldu ríkjanna, annarra en Íslands, en samkvæmt samkomulaginu, sem gildir í 3 ár skal greiða 22.000 DKR fyrir 75% námsmanna, sem eru í háskóla einhvers staðar á Norðurlöndunum.

Klukkan 9.15 að morgni laugardagsins 31. ágúst hófst ráðstefna Skýrslutæknifélagsins um skólastarf og upplýsingatækni. Flutti ég ávarp við upphaf hennar og hlýddi síðan á nokkur erindi, þar til ég varð að fara til að búa mig undir för á Kirkjubæjarklaustur, þar sem við Rut voru gestgjafar í kvöldverði á ársfundi norrænu UNESCO-nefndanna. Komum við aftur síðdegis sunnudaginn 1. september. Á ráðstefnu Skýrslutæknifélagsins var ánægjulegt að heyra mikið lof borið á rit menntamálaráðuneytisins Í krafti upplýsinga, þar sem gerð er grein fyrir stefnunni við notkun upplýsingatækni í þágu mennta og menningar.

Föstudaginn 30. ágúst klukkan 15.00 var athöfn í Borgarholtsskóla, þegar nýbyggingar hans voru formlega afhentar skólameistara hans. Klukkan 17.00 var opnaður leikskóli í nýjum garði við Háskóla Íslands. Þaðan héldum við beint út á Reykjavíkurflugvöll í afmæli Landhelgisgæslunnar og um kvöldið vorum við síðan á frumsýningu á Hinum kúnum í Kaffileikhúsinu.

Að morgni miðvikudagsins 28. ágúst fórum við Rut af stað til Keflavíkuflugvallar klukkan hálfsex um morgunin til að taka á móti hinum sigursælu íþróttamönnum okkar, sem sóttu Ólympíuleika fatlaðra í Atlanta. Klukkan 20 um kvöldið hófst 10 ára afmælisfagnaður Íslenska útvarpsfélagsins hf. í Perlunni en þar hafði ég verið beðinn að flytja ávarp, sem ég gerði um klukkan 21.30. Líklega hefur það farið fyrir ofan garð hjá flestum, því að kliðurinn var svo mikill og hátalarakerfið veikburða, að aðeins þeir, sem næstir stóðu heyrðu. Um klukkan 23 var ég síðan í beinni útsendingu á Stöð 2 í tilefni afmælisins.

Menningarlífið er að fara af stað að nýju, þótt lítið hlé hafi raunar orðið yfir sumarið. Föstudagskvöldið 13. september fórum við á frumsýningu á verki Árna Ibsens í Borgarleikhúsinu og kvöldið eftir á frumsýningu verks Karls Ágústs Úlfssonar á Litla sviði Þjóðleikhússins, sunnudagskvöldið 15. september lék Erling Blöndal Bengtson á sellóið sitt í Bústaðakirkju á vegum Kammermúsikklúbbsins og hóf hlustendur yfir stund og stað. Síðdegis föstudaginn 13. september flutti ég ræðu á Foreldraþingi Heimilis og skóla og klukkan 9 að morgni laugardagsins 14. september flutti ég ræðu við upphaf málþings á vegum Stofnunar Sigurðar Nordals , í tilefni 10 ára afmælis hennar, eftir hádegið fórum í stutta stund út í Viðey með sjálfstæðismönnum úr Reykjavík og síðan í afmælishóf Stofnunar Sigurðar Nordals , áður en farið var í leikhúsið.

Þjóðhátíðardaginn 17. júní fórum við að heiman rúmlega 10 til að vera komin tímanlega í Alþingishúsið og búa okkur undir þátttöku í skrúðgöngu þaðan út á Austurvöll, þar var setið fram undir 11, þegar messa hófst í Dómkirkjunni, sem stóð til 12, þegar Lýðveldissjóður efndi til hátíðarfundar í Alþingishúsinu, undir kl. 13 var ég komin heim og klukkan 13.30 hófst Háskólahátíð í Laugardalshöll, sem stóð til kl. 16.00, klukkan 17.30 var athöfn að Bessastöðum, þar sem forseti Íslands sæmdi mig stórriddarakrossi fálkaorðunnar og síðan tókum við þátt í veislu þriggja bræðra, sem þennan dag útskrifuðust úr Háskóla Íslands.

Sunnudaginn 16. júní tók ég þátt í 200 ára afmæli Bessastaðakirkju og flutti þar ávarp í nafni ríkisstjórnarinnar í fjarveru dóms- og kirkjumálaráðherra.

Laugardaginn 15. júní fór ég á tónleika píanósnillingsins Kissins - glæsileg listræn frammistaða.

Fimmtudaginn 13. júní fór ég um kvöldið á Listahátíðartónleika Sinfóníuhljómsveitar Íslands.

Miðvikudaginn 12. júní fór ég norður á Húsavík og flutti ræðu um nýju framhaldsskólalögin á aðalfundi þeirra. Um kvöldið í Þjóðleikhúsið á Ævintýrakvöld Kammersveitar Reykjavíkur, þar sem var hljómsveit, söngur, brúðuleikhús og ballett.