Krefst brottrekstrar í þágu net-ritskoðunar
Það yrði saga til næsta bæjar, nú þegar rétt 24 ár eru liðin frá því að vefsíðan bjorn.is sá dagsins ljós, að höfundur hennar yrði rekinn vegna jákvæðrar afstöðu hans til EES-samningsins.
Bloggarinn Gunnar Harðarson krefst þess að Guðlaugur Þór Þórðarson utanríkisráðherra leysi upp starfshópinn sem ég leiði og gerir úttekt á EES-samstarfinu vegna þess að ég hafi jákvæða skoðun á EES-samstarfinu og telji þriðja orkupakkann ekki ógna fullveldi Íslands eða leiða til arðráns ESB á auðlindum okkar.
Afstaða mín um þessi efni lá ljós fyrir þegar
utanríkisráðherra fól mér forystu í þessum hópi. Að það geri menn vanhæfa til
að draga fram staðreyndir að þeir hafi skoðun á viðkomandi málaflokki stenst
einfaldlega ekki. Hér er ekki um dómsmál að ræða heldur pólitískt viðfangsefni
sem krefst meðal annars lifandi umræðu til að draga fram ólík sjónarmið.
Ég hef nýtt mér netið til að lýsa skoðunum mínum frá árinu 1995. Allar götur síðan hafa heyrst raddir eins og þessi frá Gunnari nú um að ekki sé við hæfi að ég segi hitt eða þetta vegna starfa sem ég gegni. Ég hef ekki tekið mark á slíkum sjónarmiðum og aldrei fallist á þá kröfu að ég eigi að sætta mig við skert málfrelsi um pólitísk málefni.
Gunnar og aðrir ættu að bíða með dóma sína um það sem fram kemur í skýrslu starfshópsins þar til hún birtist.
Þeir sem hafa aðrar skoðanir en ég á EES-málum ættu frekar að viðra sjónarmið sín og koma þeim á framfæri en vega persónulega að mér. Það yki dýpt þess verkefnis sem ég sinni um þessar mundir, að draga fram kosti og galla EES-samstarfsins. Séu gallarnir þeir að ég hafi einhverja skoðun á EES eru þeir léttvægir.
Það yrði saga til næsta bæjar, nú þegar rétt 24 ár eru liðin frá því að vefsíðan bjorn.is sá dagsins ljós, að höfundur hennar yrði rekinn vegna jákvæðrar afstöðu hans til EES-samningsins.