Helga Vala um Helgu Völu
Helga Vala Helgadóttir hefur þörf fyrir að láta umbjóðendur sína vita hve miklu hún fórnar með að sinna stjórnmálastörfum.
Kosið var til alþingis 28. október 2017. Skömmu fyrir þær tóku ritstjórar Morgunblaðsins ákvörðun um að úthluta horni, neðst á leiðarasíðunni, til stjórnmálamanna úr öllum flokkum. Þar geta þeir birt um 450 orð af sjálfvöldu efni á tíu daga fresti ef marka má það sem Helga Vala Helgadóttir, þingmaður Samfylkingarinnar og formaður stjórnskipunar- og eftirlitsnefndar alþingis, segir í grein sinni á leiðarasíðunni föstudaginn 25. janúar.
Helga Vala Helgadóttir hefur þörf fyrir að láta umbjóðendur sína vita hve miklu hún fórnar með að sinna stjórnmálastörfum. Stundum verður henni þó um megn að gera það. Hún hafði til dæmis ekki þrek til að sitja undir ræðu forseta danska þingsins, Piu Kjærsgaard, á þingfundi á Þingvöllum 18. júlí 2018. Birtist mynd af Helgu Völu þar sem hún gekk á brott eftir að hafa laumað sér af þingpallinum.
Mynd af þessu tölvubréfi frá Helgu Völu Helgadóttur til samnefndarmanns á alþingi þar sem bent er á að bjór sé til í krana á Klaustur-bar hefur farið víða um netheima.
Í fyrrnefndri grein í Morgunblaðinu 25. janúar lýsir Helga Vala því að margir hafi spurt hana hvernig hún hafi „geð“ í sér til að skrifa í blaðið. Ástæða fyrirspurnarinnar er að Davíð Oddsson ritstýrir blaðinu. Það sé „óásættanlegt að margra mati að kjörinn fulltrúi jafnaðarmanna á Íslandi, helsta óvinar ritstjórans fyrr og síðar, taki þátt í að fylla blað ritstjórans með orðum sínum“.
Svar Helgu Völu við þessum ábendingum kemur ekki á óvart: Hún hefur ákveðið að fórna sér fyrir „boðskap og stefnu okkar jafnaðarmanna í Samfylkingunni“ með því að skrifa í blaðið þótt margir stuðningsmenn hennar og vafalaust enn fleiri lesendur Morgunblaðsins kysu að hún veldi sama kost og hún gerði á Þingvallafundinum.
Hagar sendu frá sér yfirlýsingu á dögunum þar sem fram kom að Helga Vala hefði aldrei verið kærð fyrir að stela úr verslunum fyrirtækisins (Bónus og Hagkaup).
Daginn áður en Helga Vala birti síðasta boðskap jafnaðarmennskunnar í boði ritstjóra Morgunblaðsins sagði Grímur Atlason, eiginmaður hennar, á Facebook:
„Samkvæmt Davíð Oddssyni, Sigmundi Davíð, Miðflokknum og málgagni þeirra Morgunblaðinu hef ég búið með drykkjukonu [sjá mynd] og þjófi í 20 ár. Við því er þetta að segja: Aum var þeirra sókn en hún var þó hátíð miðað við vörnina.
Ég hef sagt það áður og geri það aftur: Éttann sjálfur ómennið yðar!“
Hugleiðing Helgu Völu í Morgunblaðinu 25. janúar snerist auðvitað um hana sjálfa en ekki hugsjónir jafnaðarmanna, þær eru aðeins yfirvarp.