Bretland: Alvara 1. apríl í skugga Brexit
Upphaflega varúðarráðstöfunin var gerð í ljósi þess að 1. apríl yrði fyrsti almenni vinnudagur í Bretlandi eftir úrsögnina sem átti að vera 29. mars.
Í breska blaðinu The Daily Telegraph segir í dag (1. apríl) að gripið hafi verið til þess ráðs af hálfu breskra stjórnvalda að banna fjölmiðlum að vera með aprílgabb. Þetta sé gert á grundvelli lagaákvæða frá ári 1653 af ótta við hættuleg áhrif gabbfrétta þar sem almenningur geti ekki lengur áttað sig á því hvort eitthvað sé alvara eða sett fram í gríni.
Segir blaðið að í þessu gamla lagaákvæði sé
lagt blátt bann við því að miðla röngum upplýsingum, sé það gert megi refsa
þeim sem gerist brotlegur með því að kljúfa rifbein hans.
Rök breskra embættismanna fyrir því að beita þessari óvenjulegu bannreglu nú eru sögð vera ótti þeirra við að ofsahræðsla leiði til kaupæðis eða uppþota.
Að sögn blaðsins setti Oliver Cromwell ákvæðið í lög til að banna að fólk gæti hæðst að útliti hans og þannig grafið undan tilraunum hans til að berja niður konungssinna. Ákvæðið hafi aldrei verið afnumið og nú sé það virkjað í krafti laga um ESB-úrsögn Breta.
Upphaflega varúðarráðstöfunin var gerð í ljósi þess að 1. apríl yrði fyrsti almenni vinnudagur í Bretlandi eftir úrsögnina sem átti að vera 29. mars. Yrði hún án samnings kynnu að skapast ýmis vandræði.
Haft er eftir Ali Ploorf, talsmanni stjórnarráðsins:
„Rautt ástand er í öllu landinu 1. apríl. Enginn veit lengur hvað er alvara og hvað er grín. Ímynduð ykkur ef einhver galgopi gengi um Waitrose-verslun í Dover og hrópaði: Ég finn enga mjólk! Engan avokadó! Það færi allt á annan endann. Frá þessari stundu er því allur fíflagangur af þessu tagi bannaður.
Skilaboð okkar til almennings eru þessi: ef þið heyrið hrollvekjandi viðvörun í útvarpinu um Brexit og úrsögn án samnings, er það ekki brandari – það er stefna ríkisstjórnarinnar.“