Borgarstjórn kom saman klukkan 14.00 og var ég þar fram til klukkan 19.00 og tók þátt í umræðum verndun húsa við Laugaveg og viljayfirlýsingu um sölu Landsvirkjunar.

Fórum í nýja Churchill-safnið í Cabinet War Rooms í hjarta London og var stórfróðlegt að skoða sýninguna auk þess að kynnast þeirri margmiðlunartækni, sem þar er nýtt.

Hélt heim klukkan 20.45 með Icelandair og var lent um miðnætti.

 

Héldum klukkan 14.56 með Eurostar frá Brussel Gare de Midi og vorum komin til Waterloo-stoðvarinnar í London klukkan 16.23 á enskum tíma, það er ferðin stóð í tæpa tvo og hálfan tíma með lestinni undir Ermarsundið.

Hélt klukkan 09.00 frá Brussel til Mons, þangað sem komið var rétt fyrir klukkan 10.00 en á slaginu 10.00 var þar hátíðleg athöfn, þegar ég hitti Sir John Reith hershöfðingja DSACEUR, það er annan æðsta stjórnanda SHAPE, herstjórn NATO í Evrópu. Lúðrasveit lék þjóðsöng okkar Íslendinga en vegna kuldans í lofti fór athöfnin fram innan dyra af tilliti til blásaranna. Eftir að ég hafði heilsað hermálafulltrúum aðildarríkja NATO var gengið til funda. Þeir stóðu fram yfir hádegisverð og var ég kominn að nýju til Brussel um klukkan 15.30.

Fór klukkan 09.00 á ársfund CEPS í Palais d'Egmont, þar sem rætt var um gildi og ESB, það er trúarleg, efnahagsleg og pólitísk gildi.

Klukkann 16.00 sat ég ráðherrafund með Schengen-ráðherrum, þar sem einkum var rætt um lífkenni og ný ferðaskilríki.

Flaug klukkan 07.35 til Ósló og þaðan klukkan 12.15 til Brussel, þar sem lent var klukkan 14.00.

Klukkan 15.30 var ég á fundi í Berlyamont-byggingunni með Franco Frattini framkvæmdastjóra Evrópusambandsins sem fer með öryggis- lögreglu-, útlendinga og persónuverndarmál. Ræddum við sameiginleg mál ESB og Íslands á okkar verksviði.

Klukkan 16.30 fór ég á fund eftirlitsstofnunar EFTA og ræddi við fulltrúa hennar um mál, sem snerta samskipti við dóms- og kirkjumálaráðuneytið.

Klukkan 19.30 var ég í Palais d'Egmont í Brussel og tók þátt í kvöldverði á vegum CEPS þar sem Jean-Claude Juncker, forsætisráðherra Lúxemborgar og forseti ráðherraráðs ESB, flutti ræðu.

Flutti klukkan 14.00 ræðu á alþingi fyrir breytingu á lögunum um Schengen-aðildina.

Fór klukkan 20.00 á tónleika Kammersveitar Reykjavíkur í Listasafni Íslands en varð að fara í hlénu, því að klukkan 21.00 var ég í stjórnmálaskóla Sjálfstæðisflokksins og ræddi stjórnskipun og stjórnsýslu til 22.15.

Var klukkan 14.00 í Keflavíkurkirkju, þar sem 90 ára afmælis hennar var minnst með hátíðarguðsþjónustu, séra Björn Jónsson þjónaði fyrir altari en herra Ólafur Skúlason biskup prédikaði. Að lokinni messu var boðið til samsætis í glæsilegu safnaðarheimili kirkjunnar.

Þingveisla að Hótel Sögu klukkan 19.30.

Flutti klukkan 20.00 erindi á fræðslufundi KFUM og ræddi trú og stjórnmál.

9. fundur Evrópunefndar var haldinn í hádeginu.

Í tilefni af 85 ára afmæli hæstaréttar buðum við Rut dómurum réttarins og skrifstofustjóra til síðdegisboðs að heimili okkar.

Flutti í hádeginu erindi á fundi félags forstöðumanna ríkisstofnana á Grand hotel, ræddi ég um efni tengt sögu stjórnarráðsins og stjórnmálaástandið núna.

Klukkan 14.00 var borgarstjórnarfundur til klukkan 18.20.

Var klukkan 14.00 í Smáralind og setti 112 daginn með ávarpi.

Hélt síðdegis í Fljótshlíðina en þar hefur ekki verið jafnmikill snjór síðan ég fór að venja þangað komu mína.

Svaraði tveimur fyrirspurnum á alþingi um reiknilíkan fyrir rekstur sýslumannsembætta og brottvísun útlendinga. Hin síðar var frá Katrínu Júlíusdóttur, þingmanni Samfylkingar, sem hafði greinilega litla þekkingu á málinu en var að spyrja til að ýta undir tortryggni um þá reglu, að fyrir yngri en 24 ára dugi hjúskapur ekki til útgáfu dvalarleyfis hér á landi.

Flutti tvö lítil mál á alþingi, annað um breytingu á lögum um helgidagafrið, það er gerð verslana, sem mega hafa opið föstudaginn langa, páskadag og hvítasunnudag.

Fundi okkar í borgarstjórnarflokknum lauk á hótel Rangá klukkan 14.00 og þá hélt ég í Fljótshlíðina.

Fór fyrir hádegi og hlýddi á kynningu á niðurstöðum námskeiðs í Lögregluskóla ríkisins til þjálfunar á notkun hunda til fíkniefnaleitar.

Hélt eftir hádegi austur að hótel Rangá, þar sem borgarstjórnarflokkur sjálfstæðismanna efndi til fundar.

Fór með ráðuneytisfólki í heimsókn í Hæstarétt Íslands klukkan 12.00, skoðaði hið einstaklega glæsilega hús réttarins í fylgd þeirra Markúsar Sigurbjörnssonar, forseta hæstaréttar, og Þorsteins A. Jónssonar, skrifstofustjóra réttarins. Að lokinni kynnisferðinni snæddum við hádegisverð með hæstaréttardómurum,

Fór klukkan 13. 15 um borð í varðskipið Tý, sem var að koma frá Austfjörðum, þar sem áhöfnin hafði í nokkra sólarhringa unnið að því að draga Dettifoss í land í haugasjó og stormi. Þakkaði ég henni vel unnið starf.

Svaraði síðdegis tveimur fyrirspurnum á þingi um nýtt varðskip og íslenskukennslu fyrir útlendinga.

Sótti í hádeginu opinn fund borgarstjórnarflokks sjálfstæðismanna í Valhöll, þar sem rætt var um vanda einkaskólanna í Reykjavík.

Atkvæðagreiðsla á alþingi klukkan 13.30.

Fór af þingi í ráðstefnusal Þjóðminjasafns, en þar hafði ég ekki fyrr sótt málþing. Er aðstaðan hin ágætasta, en fundarefnið var Saga stjórnarráðsins. Sögufélag stóð fyrir málþinginu og voru þau Guðni Th. Jóhannesson sagnfræðingur, Helga Jónsdóttir borgarritari, Svanur Kristjánsson prófessor í stjórnmálafræði og Kristín Ástgeirsdóttir, sagnfræðingur og fyrrverandi alþingismaður, frummælendur. Luku þau öll lofsorði á verkið. Þau Svanur og Kristín töldu, að meira hefði mátt fjalla um hlut alþingis og þingræðið, en ég sagði ritstjórn verksins hafa talið það efni í sérstakt rit á vegum alþingis að lýsa þeim þætti.

Um 16. 30 fór ég á borgarstjórnarfund og sat hann til loka.

Fór klukkan 20.00 á tónleika Kammersveitar Reykjavíkur í Listasafni Íslands en þeir voru einnig upphafstónleikar Myrkra músíkdaga, sem nú var efnt til í 25. skipti.

Fór síðdegis í Laugarásbíó og sá myndina Aviator um Howard Hughes, en hún hefur fengið margar verðskuldaðar tilnefningar til Óskarsverðlauna.

Fór síðdegis í móttöku Hugsmiðjunnar í tilefni af flutningi hennar í nýtt húsnæði við Snorrabraut, en fyrirtækið hefur síðan í nóvember 2002 hýst síðuna mína.

Flaug frá Egilsstöðum klukkan 09.25 og lenti í Reykjavík 10.30.

Klukkan 13.00 hófst fundur forstöðumanna stofnana á vegum dóms- og kirkjumálaráðuneytisins að hótel Nordica með ræðu minni og stóð hann til rúmlega 17.00.

Klukkan 12. 15 kom Evrópunefndin saman til sín 8. fundar.

Svaraði á þingi fyrirspurn frá Helga Hjörvar, þingmanni Samfylkingarinnar, um öryggislögreglu. Að þessu sinni gat þingfundur hafist án þess að stjórnandstaðan veittist að Halldóri Ásgrímssyni vegna andstöðu hans við Saddam Hussein. Nokkrir samfylkingarmenn tóku til máls vegna fyrirspurnarinnar, þar á meðal Ágúst Ólafur Ágústsson, sem var ómálefnalegur að vanda og heyrðist mér hann uppnefna mig Stóra-Björn, sem sannar enn hve barnalegur hann er í öllum málatilbúnaði sínum, blessaður drengurinn.

Flaug klukkan 16.00 til Egilsstaða en þar tóku þeir Guðmundur Skarphéðinsson og Stefán Friðrik Stefánsson á móti mér og óku mér í blíðskaparveðri til Norðfjarðar. Var ævintýralegt að sjá hinar gífurlegu framkvæmdir, sem eru hafnar við Reyðarfjörð vegna álversins.

Klukkan 20. 00 hófst fundur á Hótel Capitano undir stjórn Magna Kristjánssonar, hóteleiganda og bæjarfulltrúa Sjálfstæðisflokksins, var fundurinn haldinn undir kjörorðinu: Með hækkandi sól og höfðu þar auk mín framsögu Halldór Blöndal og Gunnar I. Birgisson, þingmenn Sjálfstæðisflokksins. Voru líflegar umræður að framsögræðum loknum.

Guðmundur ók okkur Gunnari síðan á hótel Hérað á Egilsstöðum og komum við þangað um miðnætti.

Flutti lítið mál um breytingar á fésektarákvæðum almennra hegningarlaga á þingi, en fundur hófst þar klukkan 13.30 og enn á skætingi stjórnarandstöðunnar í garð Halldórs Ásgrímssonar vegna afstöðu hans til og ríkisstjórnarinnar til Saddams Husseins fyrir tveimur árum.

Á þinginu var einnig önnur umræða um breytingu á lagaákvæðum um gjafsókn. Þar flutti Ágúst Ólafur Ágústsson, þingmaður Samfylkingarinnar, ræðu fyrir hönd minnihlutans og var hún að öðrum þræði í þeim barnalega skætingstón, sem hann hefur tileinkað sér á þingi og gerir hann að einum ómálefnalegasta þingmanninum.

Alþingi kom saman eftir jólaleyfi klukkan 15.00. Athygli vakti, að það helsta sem lá á hjarta forystumanna stjórnarandstöðunnar, var að sauma að Halldóri Ásgrímssyni forsætisráðherra vegna tveggja ára gamalla ákvarðana varðandi átökin við Saddam Hussein.

Kjördæmisráðfundur sjálfstæðismanna í Reykjavík haldinn klukkan 13.15 Hótel Sögu.

Klukkan 11.00 vorum við Ingimundur komnir í Heilbrigðisstofnunina á Blönduósi en þar tóku þau á móti okkur Sveinfríður Sigurpálsdóttir, Valbjörn Steingrímsson framkvæmdastjóri og Ómar Ragnarsson yfirlæknir og kynntu okkur starfsemi stofnunarinnar.

Klukkan 12.00 þáðum við hádegisverðarboð Bjarna Stefánssonar sýslumanns með Jónu Fanneyju Friðriksdóttur bæjarstjóra og fleiri gestum.

Klukkan 13.30 hlýddum við á kynningu Kristjáns Þorbjörnssonar yfirlögregluþjóns á umferðarannsóknum á vegum lögreglunnar, en rannsóknirnar byggjast á upplýsingum, sem lögreglumenn afla við störf sín.

Klukkan 14.00 var athöfn á sýsluskrifstofunni, þar sem ný endurgerð lögreglustöð var formlega tekin í notkun og lyftuhús við stjórnsýslubygginguna. Samgönguráðherra og þingmenn voru við athöfnina ásamt heimamönnum en embættismenn, sem boðið hafði verið, komust ekki vegna veðurs en Holtavörðuheiði var lokuð þá um morguninn en var opnuð að nýju um hádegisbil.

Klukkan 15.00 héldum við Ingimundur til Hvammstanga, þar sem við hittum sýslumann og yfirlögregluþjón að nýju og tókum húsnæði útibús embættis sýslumanns þar formlega í notkun. Síðan skoðuðum við bókasafnið og aðra starfsemi í því húsi, þar á meðal Forsvar, sem Karl Sigurgeirsson stjórnar.

Héldum var af stað til Reykjavíkur um klukkan 16.30 og fengum gott færi suður Holtavörðuheiði og var ég kominn heim rétt fyrir klukkan 20.00

Hélt rétt fyrir klukkan 10.00 með Jón Geir Jónatanssyni, nýjum bílstjóra mínum frá áramótum, og Bjarna Benediktssyni alþingismanni norður á Sauðárkrók. Þangað komum við klukkan rúmlega 14.00 en klukkan 15.00 hófst fundur undir kjörorðinu Með hækkandi sól á Kaffi Króki undir stjórn Jóns Magnússonar og stóð hann til klukkan 17.00.

Þá ókum við að Hvammstanga og vorum komnir þangað rúmlega 18.30 en klukkan 19.30 hófst þar fundur Með hækkandi sól á Þinghús-bar undir stjórn Karls Sigurgeirssonar og stóð hann til tæplega 22.00.

Þeir Jón Geir og Bjarni héldu akandi suður til Reykjavíkur en ég fór með Ingimundi Sigfússyni að Þingeyrum, þar sem ég gisti í boði hans.